ខេត្តមណ្ឌលគិរី ៖ អភិបាលខេត្តមណ្ឌលគិរី បានចេញបញ្ជាដល់មន្ត្រីជំនាញ និងមន្ត្រីពាក់ព័ន្ធត្រូវពង្រឹងប្រសិទ្ធភាពការងារ លើសកម្មភាពប្រមូលផលអនុផលព្រៃឈើនៅតាមបណ្តាក្រុមហ៊ុនដីសម្បទានសេដ្ឋកិច្ច ដែលកំពុងប្រតិបត្តិការនៅស្រុកកោះញែក ឲ្យមានប្រសិទ្ធភាព និងចៀសវាងការបង្កើតបទល្មើសក្នុងរូបភាព កន្ទេលធំបន្លំដេក…
ខេត្តមណ្ឌលគិរី ៖ អភិបាលខេត្តមណ្ឌលគិរី បានចេញបញ្ជាដល់មន្ត្រីជំនាញ និងមន្ត្រីពាក់ព័ន្ធត្រូវពង្រឹងប្រសិទ្ធភាពការងារ លើសកម្មភាពប្រមូលផលអនុផលព្រៃឈើនៅតាមបណ្តាក្រុមហ៊ុនដីសម្បទានសេដ្ឋកិច្ច ដែលកំពុងប្រតិបត្តិការនៅស្រុកកោះញែក ឲ្យមានប្រសិទ្ធភាព និងចៀសវាងការបង្កើតបទល្មើសក្នុងរូបភាព កន្ទេលធំបន្លំដេក ។
ឯកឧត្តម ស្វាយ សំអ៊ាង មានប្រសាសន៍ក្នុងដំណើរចុះពិនិត្យក្រុមហ៊ុន លឹមរ៉ូយ៉ាល់ និងក្រុមហ៊ុន ណេង ណា ដែលមានទីតាំងនៅស្រុកកោះញែក កាលពីថ្ងៃទី០២ ឧសភា ២០២១ ថា ដើម្បីគ្រប់គ្រងការទាញផលអនុផលព្រៃឈើឲ្យមានប្រសិទ្ធភាពខ្ពស់ ។ មន្ត្រីជំនាញ និងមន្ត្រីពាក់ព័ន្ធដទៃទៀតត្រូវសហការជាឲ្យបានម៉ត់ចត់ ត្រួតពិនិត្យរាល់ឯកសារ និងចំនួនឈើត្រូវដឹកចេញពិដីសម្បទាន ។ ហើយត្រូវទប់ស្កាត់និងបង្ក្រាបចំពោះសកម្មភាពលួចកាប់ឈើក្រៅដែនដីក្រុមហ៊ុន ដែលផ្តល់សិទ្ធិដោយរដ្ឋ។
ឯកឧត្តមអភិបាលខេត្តបានលើកឡើងថា រាល់ក្រុមហ៊ុនដែលទទួលបានសិទ្ធិវិនិយោគពីរាជរដ្ឋាភិបាល ត្រូវគោរពឲ្យបាន១០០% តាមកិច្ចសន្យា ត្រូវបន្តសកម្មភាពដាំដុះដំណាំលើផ្ទៃដីដែលបានឈូសឆាយរួច មិនត្រូវទុកដីឲ្យនៅទំនេរឡើយ។ បើមានក្រុមហ៊ុនណា ល្មើសកិច្ចសន្យា អាជ្ញាធរនឹងស្នើសុំគោលការណ៍ ពីថ្នាក់ជាតិ ដើម្បីលុបអាជ្ញារប័ណ្ណក្រុមហ៊ុននោះ ព្រមទាំងចាត់វិធានការច្បាប់ដោយមិនលើកលែងឡើយ។
បើតាមការបញ្ជាក់ពីមន្ទីរកសិកម្មខេត្ត ក្រុមហ៊ុនទាំងពីរខាងលើ បច្ចុប្បន្នកំពុងឈួសឆាយលើផ្ទៃដីដែលរដ្ឋបានកំណត់ផ្តល់សិទ្ធិឲ្យវិនិយោគ លើដំណាំ ស្វាយចាន់ទី កៅស៊ូ ដំឡូងមី ជាដើម។ ហើយក្រុមហ៊ុនបានប្រមូលយកដើមឈើដែលបានឈូសឆាយ កែច្នៃសម្រាប់នាំចេញ ដោយមានការត្រួតពិនិត្យត្រឹមត្រូវពីមន្ត្រីជំនាញ ដើម្បីបង់ពន្ធចូលរដ្ឋ៕
ចែករំលែកព័តមាននេះ