រាជធានីភ្នំពេញ ៖ ក្នុងគោលបំណងលើកកម្ពស់ និងបង្កើនសមត្ថភាពប្រកួតប្រជែង បង្កើតស្នាដៃភាពយន្តជាតិ សំដៅពង្រឹងគុណភាពនិងអភិវឌ្ឍន៍ឧស្សាហកម្មភាពយន្តនៅកម្ពុជា ក្រសួងវប្បធម៌គ្រោងនឹងរៀបចំឲ្យមានកម្មវិធីមហោស្រពភាពយន្តជាតិលើកទី៤ ដែលនឹងប្រព្រឹត្តទៅចាប់ពីថ្ងៃទី៤ដល់ថ្ងៃទី១០ ខែធ្នូ ឆ្នាំ២០១៥ ។
យោងតាមសេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈកាលពីពេល ថ្មីៗកន្លងមកបញ្ជាក់ថា ក្រសួងបាន និងកំពុងទទួលពាក្យស្នើសុំចូលរួមប្រកួតចាប់ពីថ្ងៃទី១ដល់ថ្ងៃទី៣១ ខែតុលា ។ គ្រប់ស្នាដៃដែលដាក់ប្រកួតប្រជែងត្រូវស្ថិតក្រោមខ្លឹមសាររឿងដោយផ្តោតសំខាន់ទៅលើការអប់រំផ្សព្វផ្សាយចំណេះដឹងអំពីវប្បធម៌ ទំនៀមទម្លាប់ ប្រពៃណីជាតិ, ការបណ្តុះស្មារតីស្នេហាជាតិ មាតុភូមិ និងការអភិវឌ្ឍ, ការលើកស្ទួយវប្បធម៌សន្តិភាព និងអហិង្សានិងការពង្រឹងសាមគ្គីភាពនិងឯកភាពជាតិ ។ ជាមួយគ្នានេះដែរគ្រប់ខ្សែភាពយន្តទាំងអស់ដែលដាក់ឲ្យប្រកួតប្រជែងត្រូវតែជាខ្សែភាពយន្តខ្មែរដែលដឹកនាំដោយអ្នកដឹកនាំរឿងជាជនជាតិខ្មែរ, ជាស្នាដៃដែលផលិតក្នុងចន្លោះឆ្នាំ២០០៩ដល់ឆ្នាំ២០១៥ និងមិនដែលចូលរួមប្រកួតប្រជែងក្នុងមហោស្រពភាពយន្តជាតិកន្លងមក ។
គ្រប់ស្នាដៃភាពយន្តទាំងអស់ដែលត្រូវចូលរួមប្រកួតប្រជែងនឹងត្រូវពិនិត្យវាយតម្លៃវិនិឆ្ឆ័យដោយផ្អែកលើស្នាដៃឯកទេសទាំង៨ រួមមាន ស្នាដៃអត្ថបទនិពន្ធភាពយន្ត, ស្នាដៃដឹកនាំរឿង, ស្នាដៃថត, តួឯកបុរសនារី, ស្នាដៃតុបតែងឆាក, ស្នាដៃបច្ចេកទេសពន្លឺ, ស្នាដៃដំឡើងរូបភាព និងស្នាដៃផ្គុំសំឡេងដោយឆ្លងតាមគោលការណ៍វិនិច្ឆ័យ និងជ្រើសរើសជាពីរដំណាក់កាល។ ដំណាក់កាលទី១ គឺជាការជ្រើសរើសយកភាពយន្តឆ្នើមចំនួន៨រឿង សម្រាប់ចូលរួមប្រកួតប្រជែង ។ ដំណាក់កាលទី២ គឺការពិនិត្យជ្រើសរើសវាយតម្លៃប្រកាសជាជ័យលាភីរបស់មហោស្រពជាតិលើទី៤ ឆ្នាំ២០១៥ ។
ជ័យលាភីនិងរង្វាន់ នឹងត្រូវចែកចេញជាបីផ្នែក គឺផ្នែកទី១ ស្នាដៃភាពយន្តពីលេខ១ដល់លេខ៣ ។ ផ្នែកទី២ រង្វាន់ឯកទេសសម្រាប់បុគ្គលមានអ្នកនិពន្ធឆ្នើម, អ្នកដឹកនាំរឿងឆ្នើម, អ្នកថតភាពយន្តឆ្នើម, អ្នកសម្តែងតួឯកឆ្នើមបុរស, អ្នកសម្តែងតួឯកឆ្នើមនារី, អ្នកតុបតែងឆាកឆ្នើម, អ្នកបច្ចេកទេសពន្លឺឆ្នើម, អ្នកដំឡើងរូបភាពឆ្នើម និងអ្នកផ្គុំសំឡេងឆ្នើម ។ ផ្នែកទី៣ គឺរង្វាន់ទស្សនិកជនដែលជាជ័យលាភីសម្រាប់ខ្សែភាពយន្តដែលទទួលបានការគាំទ្រច្រើនបំផុតពីទស្សនិកជនដែលគ្រប់ជ័យលាភីទទួលបានពាន អមដោយទឹកប្រាក់ ៕
ចែករំលែកព័តមាននេះ