រាជធានីភ្នំពេញ ៖ បើទោះបីអតីតតារាសម្តែងលោកយាយម៉ែម៉ឺន លាចាកលោកជាច្រើនឆ្នាំមកហើយក្តី ក៏លោកយាយនៅមានឈាមជ័រជាអ្នកសិល្បៈបន្តវេនក្នុងជំនាន់ថ្មីនេះដែរ នោះគឺចៅប្រុសឈ្មោះគង់ បញ្ញាសិទ្ធិ ។ ដោយសារតែស្រលាញ់អាជីពសិល្បៈ និងចង់មានកេរ្តិ៍ឈ្មោះល្បី គង់ បញ្ញាសិទ្ធិ សុខចិត្តព្យួរការសិក្សាផ្នែកវេជ្ជសាស្ត្រ ។
លោកគង់ បញ្ញាសិទ្ធិ ជាកូនពៅក្នុងចំណោមបងប្អូន៤នាក់ ក្នុងនោះស្រី៣នាក់ ។ ឪពុករបស់គេជាកូនបង្កើតរបស់លោកយាយម៉ែម៉ឺន ។ បច្ចុប្បន្នម្តាយឪពុករបស់បញ្ញាសិទ្ធិរស់នៅ និងប្រកបរបរនៅខេត្តបន្ទាយមានជ័យ ។
ដោយមានទេពកោសល្យល្អ គង់ បញ្ញាសិទ្ធិ ត្រូវផលិតកម្មមួយចំនួនផ្តល់ឱកាសឱ្យចូលសម្តែងក្នុងរឿង «វេរាស្នេហ៍ឆ្លងភព», រឿង «លាក់ស្នេហ៍ក្នុងបេះដូង», និងរឿង «ស្នេហានិងកិត្តិយស» ដែល ចាក់បញ្ចាំងនៅលើកញ្ចក់ទូរទស្សន៍រួចហើយ ។ ក្រៅពីសម្តែងភាពយន្ត បញ្ញាសិទ្ធិ ថតស្ប៉តពាណិជ្ជកម្មឱ្យបណ្តាក្រុមហ៊ុននានា និងសម្តែងខារ៉ាអូខេផងដែរ ។ រយៈពេលជិត២ឆ្នាំហើយ ដែលបញ្ញាសិទ្ធិ បណ្តែតជីវិតក្នុងពិភពសិល្បៈ ។
តារាសម្តែងវ័យ២៣ឆ្នាំ គង់ បញ្ញាសិទ្ធិ កាលពីពេល ថ្មីៗកន្លងមកនិយាយថា លោកមានចិត្តស្រឡាញ់សិល្បៈយូរមកហើយ ប៉ុន្តែទើបតែប្រមាណជិត២ឆ្នាំកន្លងមកនេះបានបំពេញចំណង់ចំណូលចិត្តរបស់ខ្លួន។ «ដោយសារតែលោកយាយម៉ែម៉ឺនរបស់ខ្ញុំជាតារាភាពយន្តមានការទទួលស្គាល់ពីមហាជន ទើបខ្ញុំតាំងចិត្តថា នឹងធ្វើឱ្យមានកេរ្តិ៍ឈ្មោះល្បីដូចលោកយាយ ទោះជាលំបាកក៏ត្រូវតែស៊ូទ្រាំ។ ដោយស្រលាញ់សិល្បៈ ខ្ញុំបានព្យួរការសិក្សាដល់ទៅពីរជំនាញ ក្នុងនោះបានសម្រេចចិត្តព្យួរការសិក្សាផ្នែកវេជ្ជសាស្ត្រត្រឹមឆ្នាំទី៣ និងផ្នែកអក្សរសាស្ត្រអង់គ្លេស ដោយគិតទៅមានរយៈពេលជាង១ឆ្នាំមកហើយ ។ ខ្ញុំមិនអស់សង្ឃឹមឡើយ ព្រោះការលះបង់ការសិក្សារបស់ខ្ញុំបានទទួលផលប្រសើរខ្លះដែរ ។ ក្រោយចូលសិល្បៈខ្ញុំទទួលបានការងារសម្តែងបន្តបន្ទាប់ ហើយពេលនេះកាន់តែមមាញឹកជាងមុន» ។
ក្រោយពីបញ្ចប់ការថតខ្សែភាពយន្តមួយចំនួនមក ពេលនេះលោកគង់ បញ្ញាសិទ្ធិ ត្រៀមថតរឿងភាគថ្មីបន្តទៀត ។ ក្រៅពីចាប់អាជីពសម្តែង បញ្ញាសិទ្ធិ ក៏ចាប់អាជីពជាអ្នកចម្រៀងដែរ ដោយកន្លងមកលោកច្រៀងតាមពិធីមង្គលការទាំងនៅភ្នំពេញ និងតាមបណ្តាខេត្ត ។ អាជីពចម្រៀងនេះ បញ្ញាសិទ្ធិ បានបង្កើតវង់តន្ត្រីសម័យមួយមានឈ្មោះថា «បញ្ញាសិទ្ធិតន្ត្រី» ដែលទទួលប្រគំតាមកម្មវិធី ផ្សេងៗទាំងនៅក្នុងរាជធានី និងតាមបណ្តាខេត្ត ។ លោកគង់ បញ្ញាសិទ្ធិ យល់ថា ជីវិតសិល្បៈត្រូវតែតស៊ូ គោរពពេលវេលា និងមានអត្តចរិតល្អទើបជួយរុញឱ្យមានកេរ្តិ៍ឈ្មោះល្បី ៕
ចែករំលែកព័តមាននេះ