រាជធានីភ្នំពេញ ៖ ដោយមើលឃើញការនិយាយស្តី និងការស្លៀកពាក់របស់អ្នកសិល្បៈមួយចំនួនហាក់មិនសមរម្យ លោកកុយ ស៊ីឌឿន ដែលជាទីប្រឹក្សាក្រសួងព័ត៌មាន និងជាអនុប្រធានផ្នែកហេរញ្ញិកសមាគមសិល្បករខ្មែរបានអំពាវនាវឱ្យមានការកែលម្អ ។
លោកកុយ ស៊ីឌឿន និយាយថា ក្រសួងព័ត៌មានប្រកាសឲ្យស្ថានីយទូរទស្សន៍ឈប់ចាក់បញ្ចាំងខ្សែភាពយន្តបរទេសនៅមុនម៉ោង៩យប់ ចាប់ពីដើមខែវិច្ឆិកា ២០១៥ទៅដូច្នេះសិល្បករខ្មែរត្រូវគិតគូរចំពោះខ្លួនឯងដើម្បីកុំឱ្យឆ្គាំឆ្គងទាំងការប្រើប្រាស់ពាក្យសម្តី ទាំងការស្លៀកពាក់ ។ ពេលមានភាពយន្តខ្មែរឬកម្មវិធីខ្មែរចាក់ផ្សាយលើកញ្ចក់ទូរទស្សន៍ សិល្បករគួរតែទស្សនាការផ្សាយអ្វីដែលជារបស់ខ្មែរនោះ ។ ជាទូទៅខ្សែរឿងរបស់ខ្មែរយើងសុទ្ធតែបង្ហាញការអប់រំចំពោះការនិយាយស្តី និងការស្លៀកពាក់។ ការនិយាយស្តីរបស់បរទេសខុសពីខ្មែរយើងរាប់ទាំងការស្លៀកពាក់ គឺចែកគ្នាដាច់តែម្តង។ ដូចនេះពេលមានភាពយន្តខ្មែរនៅលើកញ្ចក់ទូរទស្សន៍ គួរតែយុវជន ព្រមទាំងអ្នកសិល្បៈឈ្វេងយល់ និងរកចំណុច ល្អៗមកដាក់ក្នុងខ្លួន ។
ក្នុងនាមសមាគមសិល្បករ លោកកុយ ស៊ីឌឿន តែងតែសង្កេតឃើញថា សិល្បករមួយចំនួនស្លៀកពាក់មើលទៅនៅមានកម្រិតជ្រុលនិយមបែបបរទេស ពោលគឺធ្វើតាមគេច្រើនពេក ។ ការស្លៀកពាក់មិនត្រូវតាមប្រពៃណី។ កន្លងមកលោកស៊ីឌឿន និងក្រុមការងារបានជួបសំណេះសំណាលជាមួយរដ្ឋមន្ត្រីក្រសួងវប្បធម៌និងវិចិត្រសិល្បៈ លោកជំទាវភឿង សកុណា ហើយលោកជំទាវបានផ្តល់មតិឲ្យផ្សព្វផ្សាយពីការស្លៀកពាក់របស់សិល្បករ ដូច្នេះសិល្បករត្រូវគិតពីចំណុចនេះផង ។
លោកកុយ ស៊ីឌឿន អំពាវនាវដល់សិល្បករគួរមានភាសានិយាយស្តីឲ្យបានល្អ ។ «ជាក់ស្តែងការសម្តែងកំប្លែងរបស់សិល្បករមួយចំនួនប្រើពាក្យមិនសមរម្យ ។ អ្នកកំប្លែងបរទេសសម្តែងតែកាយវិការទេគឺទស្សនិកជនគេសើច ។ ចំពោះតារាកំប្លែងខ្មែរយើងនាយកុយគាត់មានស្ទីលសម្តែងល្អ មើលទៅមិនឈ្លើយ ហើយភាសានិយាយអាចទទួលយកបាន ។ នេះប្រហែលជាគាត់មានគ្រូ មានការរៀនសូត្រក្នុងសាលា ទើបគាត់មានបាតវិជ្ជាសិល្បៈត្រឹមត្រូវ» ។
ស្របពេលនេះ លោកកុយ ស៊ីឌឿន បានស្នើឲ្យសិល្បករទាំងអស់ មិនថាថ្មី ឬចាស់ទេ គួរតែចុះឈ្មោះធ្វើប័ណ្ណសមាជិកជាមួយសមាគមសិល្បករខ្មែរ ព្រោះវានឹងមានប្រយោជន៍ច្រើនជួយត្រលប់ទៅវិញ ។ ចុះឈ្មោះជាសមាជិកសមាគមអាចមានឱកាសចូលរួមក្នុងសកម្មភាពបម្រើសិល្បៈ និងជួយខ្លួនឯងឲ្យបានលេចធ្លោក្នុងពិភពសិល្បៈ ។ ក្រៅពីនេះចំពោះតារាថ្មីអាចទាក់ទងឲ្យបានចេញសម្តែងតាមស្ថានីយទូរទស្សន៍នានា ព្រោះសមាគមមានអ្នកស្គាល់ច្រើន ហើយអាចបើកផ្លូវជូនបាន ។ លើសពីនេះតារាចម្រៀង ល្បីៗក្នុងផលិតកម្មគួរតែយកកិត្តិយសរបស់ខ្លួនជួយសមាគមដើម្បីឲ្យកាន់តែមានការចាប់អារម្មណ៍ពីទស្សនិកជនចៀសវាងការមិនអើពើព្រោះតាំងពីលោកចូលកាន់ការងារនេះមកហាក់មិនសូវឃើញតារា ល្បីៗចូលរួមទេ មើលទៅហាក់ប្រកាន់បក្សពួកណាស់ ៕
ចែករំលែកព័តមាននេះ