រាជធានីភ្នំពេញ ៖ កាលពីល្ងាចថ្ងៃអាទិត្យ ទី៤ តុលា ឆ្នាំ២០១៥ សមាគមចលនាវប្បធម៌ជាតិ ដើម្បីកុមារកំព្រា កុមារក្រីក្រ បានរៀបចំកម្មវិធី«រាត្រីនៃក្តីសង្ឃឹម» ក្រោមប្រធានបទ «យើងចែករំលែកក្តីស្រលាញ់របស់អ្នក» ។ ពិធីនោះក្រោមអធិបតីភាពលោកជំទាវភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ។
តារា ល្បីៗដូចជាលោក ឆន សុវណ្ណរាជ, កញ្ញាលាង សុផាឡែន, កញ្ញា Nikki Nikki, បេក្ខជនជ័យលាភី និងបេក្ខជនលេចធ្លោក្នុងកម្មវិធី The Voice Cambodia លោកប៊ុត សីហា, លោកឃុន វុត្ថា, កញ្ញាចំរើន សុភ័ក្ត្រ, កញ្ញាសាមុត ស្រីកា បានចូលរួមសម្តែងញ៉ាំងឱ្យពិធីនោះកាន់តែអធិកអធម ។ លើសពីនេះទៅទៀត មានការអញ្ជើញចូលរួមជាភ្ញៀវកិត្តិយសពីតារា ល្បីៗជាច្រើនដូចជាកញ្ញា ឱក សុគន្ធកញ្ញា, លោកណុប បាយ៉ារិទ្ធ, លោកហ្សូណូ, លោក ញ៉ែម សុគន្ធ, កញ្ញាទឹម រដ្ឋា, លោកទុំ សារ៉ុត ហៅនាយឃ្លោក, លោកអ៊ុំ ដរ៉ា ព្រមទាំងសិស្ស-និស្សិត និងសប្បុរសជនច្រើនកុះករ ។
លោកស៊ូ សាវ៉ាង ហៅលោកតាហ្វុ៊យសូ នាយកប្រតិបត្តិសមាគមចលនាវប្បធម៌ជាតិ ដើម្បីកុមារកំព្រា កុមារក្រីក្រថ្លែងថា «កម្មវិធីសប្បុរសធម៌រាត្រីនៃក្តីសង្ឃឹមបង្កើតឡើង នាឱកាសនេះ ក្រោមការរៀបចំរបស់សមាគមចលនាវប្បធម៌ជាតិ ដើម្បីកុមារកំព្រា កុមារក្រីក្រ ហៅកាត់ថា មជ្ឈមណ្ឌលកុមារកំព្រា (NACOPCA) រួមជាមួយគេហទំព័របណ្ណាសារដ្ឋាន អាមេហ្ស៊ីងខេមបូឌា ព្រមទាំងមានការសហការ និងចូលរួមពីសិស្ស-និស្សិតពីគ្រប់សាកលវិទ្យាល័យទាំងអស់ទូទាំងរាជធានីភ្នំពេញសរុប៨១នាក់ ។ គោលបំណងកម្មវិធីនេះ គឺដើម្បីស្វែងរកការឧបត្ថម្ភជួយទ្រទ្រង់ដល់ដំណើរការសមាគមឱ្យមាននិរន្តរភាព និងជួយសម្រួលដល់ជីវភាពរស់នៅដែលកំពុងខ្វះខាត លើកកម្ពស់វិស័យអប់រំរបស់កុមារកំព្រា និងទីទ័លក្រដែលជាផ្នែកមួយយ៉ាងសំខាន់ក្នុងការអភិវឌ្ឍ ធនធានមនុស្ស និងប្រទេស ។
កម្មវិធីនេះមានអត្ថន័យនិងខ្លឹមសារផ្សារភ្ជាប់គ្នានូវផ្នត់គំនិតនៃការចែករំលែក ហើយអ្វីដែលជាការជំរុញ និងលើកទឹកចិត្តសម្រាប់ការបង្កើតកម្មវិធីនេះឡើង គឺជំហានដំបូងដែលលោកស៊ូ សាវ៉ាង គិតមុនគេ គឺការអភិរក្ស និងការបាត់បង់នូវសិល្បៈវប្បធម៌ខ្មែរនាពេលបច្ចុប្បន្ន តាមរយៈការហូរចូលនៃវប្បធម៌បរទេសដ៏ជឿនលឿន ហើយកំពុងតែជ្រាបចូលយ៉ាងគំហុកក្នុងប្រទេសយើង ។ ចំពោះសមាគមរបស់លោកមានការខ្វះខាត ដែលប្រឈមនឹងការបាត់បង់ឱកាសបន្តការងាររបស់ខ្លួនក្នុងការជួយកុមារកំព្រា និងក្រីក្រក្នុងសមាគម ។
ក្នុងឱកាសនោះ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈមានប្រសាសន៍ថា «យុវជនខ្មែរស្រឡាញ់ និងថែរក្សាវប្បធម៌ជាតិរបស់ខ្លួនឱ្យបានគង់វង្ស ហើយស្វែងរកទេពកោសល្យរបស់ខ្លួនពីក្នុងខ្លួនឯងផ្ទាល់ ។ បើទេវតាយកសមត្ថភាពទេពរបស់មនុស្សលាក់ទុកនៅលើកំពូលភ្នំដ៏ខ្ពស់ ឬទឹកសមុទ្ទដ៏ជ្រៅសែនជ្រៅ គង់តែមានមនុស្សរកឃើញ តែទេវតាបានយកសមត្ថភាពទេពរបស់មនុស្សលាក់ទុកក្នុងខ្លួនមនុស្សដែលជាកន្លែងមនុស្សពិបាកស្មានដល់» ។
ក្នុងកម្មវិធីតន្ត្រីសប្បុរសធម៌នោះ មានការសម្តែងសិល្បៈច្រើនទម្រង់ ដូចជាលោកឆន សុវណ្ណរាជ និងកញ្ញាចំរើន សុភ័ក្ត្រ ស្លៀកពាក់ និងច្រៀងបទប្រពៃណី ។ ក្រៅពីនេះមានការចូលរួមសម្តែងក្បាច់គុនបុរាណខ្មែរ យុទ្ធគុនខម, ច្រៀងចម្រៀងសម័យពីតារាចម្រៀងពេញនិយម, ការបង្ហាញម៉ូដសម្លៀកបំពាក់កែច្នៃ La Chhouk Fashion, ការរាំសម័យរបស់ក្រុម Fire Fox និង PPSS ដោយបិទកម្មវិធីជាមួយការច្រៀងបទចម្រៀង «We are the world » រួមគ្នាជាក្រុមរបស់កុមារ តារា និងអ្នកចូលរួមទាំងអស់ ដោយបានបង្ហាញពីការស្រឡាញ់ ស្មារតីសប្បុរសធម៌ យ៉ាងសប្បាយរីករាយប្រកបដោយស្នាមញញឹម គ្រប់ៗគ្នា ៕
ចែករំលែកព័តមាននេះ