រាជធានីភ្នំពេញ ៖ ខ្សែភាពយន្តខ្នាតធំ រឿង«ភូមិអត់មនុស្ស» ដែលជាវណ្ណកម្មដំបូងរបស់ផលិតកម្មរេដភីកឈ័រ (RED Picture) គ្រោងនឹងដាក់បញ្ចាំងនាចុងសប្តាហ៍នេះនៅគ្រប់រោងភាពយន្ត ទំនើបៗក្នុងរាជធានីភ្នំពេញជាមួយនឹងក្តីរំពឹងបានការគាំទ្រច្រើន ។
រឿង «ភូមិអត់មនុស្ស» ជាខ្សែភាពយន្តដែលអ្នកនិយមប្រើប្រាស់ហ្វេសប៊ុកចាប់អារម្មណ៍ខ្លាំងនឹងឈុតឆាក ខ្លីៗសម្រាប់ផ្សព្វផ្សាយ ។
ចាងហ្វាងផលិតកម្ម RED Picture លោក ឌៀប សុវណ្ណតារា បញ្ជាក់ថា មូលហេតុដែលដាក់ចំណងជើងថា «ភូមិអត់មនុស្ស» ព្រោះជាភូមិគេបោះបង់ចោលដែលជាប្រភេទរឿងខ្មោច និងកំប្លែងតម្រូវទីផ្សារសព្វថ្ងៃ ។ មានចំណុចសំខាន់៣ ដែលនឹងធ្វើឲ្យខ្សែភាពយន្តនេះទទួលបានការគាំទ្រពីទស្សនិកជន ។ ទី១គឺការចូលរួមសម្តែងដោយតារាសម្តែង តារាកំប្លែងល្បីនៅកម្ពុជាមិនក្រោម១០នាក់ទេ ។ ទី២ គឺសាច់រឿងប្លែកខុសពីរឿង មុនៗ ។ ទី៣ គឺការប្រើប្រាស់បច្ចេកវិទ្យា ទំនើបៗពិសេសប្រភេទកាមេរ៉ា Red ដែលធ្វើឲ្យរូបភាពកាន់តែទាក់ទាញ ។ ដើមឡើយរឿងនេះទំហំការចំណាយប្រហែលជាង៥ម៉ឺនដុល្លារ ប៉ុន្តែក្រោយបញ្ចប់ការផលិត គឺឡើងដល់៨ម៉ឺនដុល្លារ ព្រោះតែការសម្តែងក្នុងរដូវវស្សា ហើយតារាសម្តែងសុទ្ធតែ ល្បីៗពិបាកនឹងរកថ្ងៃបានថតរួមគ្នា ។
អ្នកដឹកនាំសម្តែង និងអ្នកនិពន្ធលោកឌៀប សុវណ្ណតារា មានបទពិសោធជាច្រើនឆ្នាំដោយកន្លងមកលោកធ្លាប់និពន្ធ និងដឹកនាំរឿងឲ្យផលិតកម្មLD Picture ទទួលបានការគាំទ្រខ្ពស់ដូចជារឿង «អាបពាក់មួយសុវត្ថិភាពវគ្គ១» រឿង «កូនប្រសាឡឺកឺ» រឿង«សំណើចអ្នកផ្សងព្រេងទាំង៤» រឿង«ក្រឡអីហ្នឹង» និងរឿង «អ្នកលេងជើងខ្វេរ»ជាដើម ។
តារាសម្តែងល្បីដែលចូលរួមថ្ងៃក្រុងពលីរឿង«ភូមិអត់មនុស្ស»មានអ្នកនាងសុខ សោម៉ាវត្តី, លោក ប៉ែន ចំរ៉ុង, នាយពែកមី, លោកជា សុវណ្ណារា, លោកប៊ីអាយជី, អ្នកនាងប៉េងប៉ោង, នាយគ្រឿន, នាយក្រូច, ក្រុមហ្វ្រេស៊ីហ្គើល និងនាយចឺមជាដើម ។
អ្នកនាងសុខ សោម៉ាវត្តី បានបញ្ជាក់ថា នាងនឹងសម្តែងជាតួអង្គឈ្មោះនាងតី ជាគ្រូពេទ្យស្ម័គ្រចិត្តចូលរួមសង្គ្រោះព្យាបាលអ្នកជំងឺនៅតាមភូមិស្រុកនានា ។ ខ្សែភាពយន្តនេះមានភាពទាក់ទាញច្រើនដែលតម្រូវទៅតាមទីផ្សារភាពយន្តបច្ចុប្បន្ន គឺភាពភ័យខ្លាច និងកំប្លែងសើចចុកពោះ ពិសេសគឺជំនាញបច្ចេកទេសផលិតខ្ពស់គួរជាទីទុកចិត្ត ។ ទោះមានការលំបាកច្រើនក្តី ប៉ុន្តែការប្តេជ្ញាចិត្តនឹងសហការគ្នាឱ្យបានល្អធ្វើឲ្យខ្សែភាពយន្តនេះបញ្ចប់ដោយជោគជ័យនិងបានបញ្ចាំងតាមកាលកំណត់ ។
អ្នកនាងសុខ សោម៉ាវត្តី រំពឹងថា ខ្សែភាពយន្តនេះនឹងទទួលបានការគាំទ្រច្រើនពីទស្សនិកជន ។
តារាកំប្លែងល្បីឈ្មោះនាយពែកមី បានបញ្ជាក់ថា ដោយតបស្នងការដឹងគុណចំពោះផលិតករ លោកបានស្ម័គ្រចិត្តថតខ្សែភាពយន្តនេះដោយមិនយកកម្រៃ ។ ក្នុងខ្សែភាពយន្តនេះ នាយពែកមីសម្តែងជាតួគ្រូសច្ចំ ។
នាយពែកមីរំពឹងថា រឿង«ភូមិអត់មនុស្ស» អាចនឹងទទួលបានការគាំទ្រខ្ពស់ដោយសារក្រុមអ្នកផលិតធ្លាប់មានស្នាដៃល្អ ទាក់ទាញអ្នកទស្សនាបានច្រើន ពិសេសរឿងនេះប្រមូលផ្តុំដោយតារាសម្តែង តារាកំប្លែងល្បីឈ្មោះចូលរួមសម្តែង ៕
ចែករំលែកព័តមាននេះ