រាជធានីភ្នំពេញ ៖ រយៈពេលជិត២ឆ្នាំមកនេះ តារាសម្តែងអ្នកនាងស្វែង សុជាតា សម្ងំព្យាបាលជំងឺដ៏កាចអាហាវមួយដែលយាយីជីវិតនាងរហូតបានជាសះស្បើយស្ទើរនឹកស្មានមិនដល់។ អ្វីដែលសុជាតាកំពុងប្រឈមជាបន្តទៀតនោះ គឺបញ្ហាជីវភាព ដែលពេលនេះនាងចាប់ផ្តើមជីវិតជាថ្មីទាំងបាតដៃទទេ ព្រោះទ្រព្យសម្បត្តិដែលនាងធ្លាប់មានទាំងប៉ុន្មានបានចំណាយលើការព្យាបាលអស់ពីខ្លួន ។
ការចាប់ផ្តើមពីចំណុចសូន្យនេះត្រូវអ្នកនាងស្វែង សុជាតា អះអាងថា វាជាការលំបាក ប៉ុន្តែនាងមិនអស់សង្ឃឹមឡើយព្រោះនាងកំពុងតែពុះពារក្នុងជីវិតថ្មីទំនងជាល្អនាពេលខាងមុខ ខណៈពេលនាងបានចូលប្រឡូកក្នុងវិស័យសិល្បៈជា បណ្តើរៗឡើងវិញហើយ ។
ថ្លែងប្រាប់កោះសន្តិភាពតាមទូរស័ព្ទនៅថ្ងៃទី៣០ កញ្ញា ឆ្នាំ២០១៥ តារាសម្តែងដែលល្បីខាងតួកាចឆ្នាសឆ្នើមអ្នកនាងស្វែង សុជាតា ឲ្យដឹងថា រយៈពេលជិត២ឆ្នាំមកហើយដែលនាងបាត់មុខពីពិភពសិល្បៈ ព្រោះសម្ងំព្យាបាលជំងឺកាចសាហាវដែលមិននឹកស្មានថានឹងអាចជាស្បើ។ «ក្រោយពីព្យាបាលជំងឺបានជាសះស្បើយនាងខ្ញុំធ្លាក់ខ្លួនមានជីវភាពលំបាកខ្វះមុខខ្វះក្រោយ ព្រោះទ្រព្យសម្បត្តិដែលនាងខ្ញុំមានបានចំណាយទៅលើការព្យាបាលអស់ពីខ្លួនរហូតដល់ខ្ចីគេថែមទៀតផង» ស្វែង សុជាតា និយាយបែបនេះ ។
អ្នកនាងស្វែង សុជាតា សព្វថ្ងៃកំពុងស្នាក់នៅក្នុងបន្ទប់ជួលមួយមានតម្លៃ៦០ដុល្លារក្នុងមួយខែ និងមានម៉ូតូកញ្ចាស់មួយគ្រឿងសម្រាប់ជាមធ្យោបាយធ្វើដំណើរ ។ ស្ថិតនៅក្នុងជីវភាពដ៏លំបាកនេះ អ្នកនាងស្វែង សុជាតា មិនដែលចេញមុខប្រាប់អ្នកណាឡើយ ប៉ុន្តែអ្នកដែលជិតស្និទ្ធបំផុតទើបដឹងពីជីវិតពិតរបស់នាង ។ មិនចង់ឲ្យមនុស្សមួយចំនួនបានដឹងពីការលំបាករបស់ខ្លួនឡើយ ដោយសារតែអ្នកនាងសុជាតាមិនចង់ឲ្យមានពាក្យថានាងចង់បានជំនួយ ។
«មនុស្សដប់ ពិតណាស់មិនមែនល្អទាំងដប់ឡើយ មានអ្នកខ្លះដែលធ្លាប់ស្គាល់នាងខ្ញុំពីមុនមកបានកាត់ផ្តាច់ការទាក់ទងជាមួយនាងខ្ញុំដោយសារតែខ្លាចនាងខ្ញុំស្វែងរកការជួយផ្នែកណាមួយ ប៉ុន្តែនាងខ្ញុំមិនបានគិតខឹងអ្នកទាំងនោះឡើយ ដោយសារតែនាងខ្ញុំតែងតែប្រកាន់គំនិតមួយថា ប្រសិននាងខ្ញុំនៅមានលទ្ធភាពអាចក្រោកឈរ នាងខ្ញុំមិនទៅពឹងពាក់គេឡើយ គឺត្រូវប្រឹងប្រែងតាមកម្លាំងដែលមាន» តារាជំនាញខាងសម្តែងតួកាចឆ្នាសឆ្នើមមានទស្សនៈបែបនេះ។ ទោះជាយ៉ាងណាក្តី អ្នកនាងស្វែង សុជាតាថ្លែងអំណរគុណដល់សប្បុរសជនមួយចំនួនទាំងក្នុងរង្វង់សិល្បៈ និងក្រៅសិល្បៈ ជាពិសេសជនរួមជាតិនៅក្រៅប្រទេសដែលបានជួយឧបត្ថម្ភជាបន្តបន្ទាប់ធ្វើឲ្យជីវភាពរបស់នាងបានធូរស្រាលមួយកម្រិត ។
រាល់អំណោយពីសប្បុរសជន ក្រៅពីដោះស្រាយជីវភាពប្រចាំថ្ងៃ មួយផ្នែកទៀតអ្នកនាងស្វែង សុជាតា សន្សំដើម្បីបង្កើតរបររកស៊ីមួយ ព្រោះនាងមិនអាចរស់ដោយសារសប្បុរសជនរហូតឡើយ ។
បច្ចុប្បន្នអ្នកនាងស្វែង សុជាតាបានសហការជាមួយគ្រូថ្នាំខ្មែរម្នាក់ដែលព្យាបាលរូបនាង ក្នុងការផ្សំថ្នាំបុរាណលក់ក្នុងតម្លៃថោកសមរម្យ ។ ប្រាក់ដែលបានមកពីសប្បុរសផង និងការចេញថតកុនជាថ្មី សុជាតាចំណាយដើម្បីពង្រីកទៅលើមុខរបររកស៊ីមួយនេះ ដែលនាងរំពឹថាវានឹងអាចធ្វើឲ្យកម្រិតជីវភាពបានប្រសើរឡើង ហើយអាចជួយអាយុជីវិតមនុស្សផងដែរ ។
មុខរបរដែលអ្នកនាងស្វែង សុជាតាកំពុងប្រកបនេះនៅមិនទាន់បានទូលំទូលាយនៅឡើយទេ ដោយសារតែត្រូវការរកប្រាក់បន្ថែមមួយចំនួនទៀត ដើម្បីធ្វើឲ្យវាអាចដំណើរការទៅតាមអ្វីដែលនាងគ្រោងទុក ។
ផ្តើមជីវភាពពីចំណុចសូន្យនេះ តារាសម្តែងអភ័ព្វស្នេហ៍អ្នកនាងស្វែង សុជាតា បានសន្យាថានឹងចាប់ផ្តើមជីវិតជាថ្មីឡើងវិញ និងមិនធ្វើរឿងងងឹតល្ងង់ដូចពីមុនទៀតឡើយ ក្នុងពេលដែលនាងបានជួបរឿងអកុសលរយៈពេលជាង៥ឆ្នាំកន្លងមកនេះ បន្ទាប់ពីបែកបាក់ស្វាមី ៕
ចែករំលែកព័តមាននេះ