រាជធានីភ្នំពេញ ៖ កម្មវិធីប្រឡងចម្រៀងប្រពៃណី ចម្រៀងយីកេ និងចម្រៀងបាសាក់ផ្សាយបន្តផ្ទាល់រៀងរាល់រសៀលថ្ងៃអង្គារវេលាម៉ោង៤និង៣០នាទី នៅស្ថានីយទូរទស្សន៍បាយ័នបឹងស្នោ មានបេក្ខជនពីគ្រប់ទិសទីចូលរួម ហើយបានការគាំទ្រពីទស្សនិកជន ។
អ្នកដឹកនាំកម្មវិធីប្រឡងចម្រៀងបុរាណនោះប្រាប់អ្នកយកព័ត៌មានកោះសន្តិភាពថា កម្មវិធីប្រឡងឆ្នាំនេះមានបីវិញ្ញាសា គឺចម្រៀងប្រពៃណី យីកេ និងបាសាក់ ។ ក្នុងឆ្នាំ២០១៥នេះជាជំនាន់ទី៧ បន្ទាប់ពីបានបង្កើតកម្មវិធីនេះ៦ជំនាន់មកហើយ ។ កន្លងមកការប្រឡងធ្វើតែលើវិញ្ញាសាពីរប៉ុណ្ណោះ គឺ «ចម្រៀងប្រពៃណីនិងយីកេ» ប៉ុន្តែក្នុងឆ្នាំនេះសម្តេចតេជោ ហ៊ុន សែន បានបន្ថែមវិញ្ញាសាមួយទៀត គឺផ្នែក «ចម្រៀងបាសាក់» ទៅតាមសំណូមពររបស់លោកព្រឹទ្ធាចារ្យសិល្បៈនាថភក្តីនិម្មិតអ៊ុំ សាមិត ដែលលើកឡើងស្នើសុំនាឱកាសទិវាវប្បធម៌៣ មីនា កន្លងមក ។
មិនត្រឹមតែប៉ុណ្ណោះទេ ចំពោះអ្នកជាប់ចំណាត់ថ្នាក់លេខ១បានរង្វាន់ទឹកប្រាក់៥ពាន់ដុល្លារ ទូរទស្សន៍១គ្រឿង ។ ចំណាត់ថ្នាក់លេខ២ទឹកប្រាក់៤ពាន់ដុល្លារ និងទូរទស្សន៍មួយគ្រឿង ។ ចំណាត់ថ្នាក់លេខ៣ទឹកប្រាក់៣ពាន់ដុល្លារ ទូរទស្សន៍១គ្រឿង និងជ័យលាភីចំណាត់ថ្នាក់លេខ៤ ជាជ័យលាភីកិត្តិយស បានទឹកប្រាក់ចំនួន១ពាន់ដុល្លារ ។
អ្នកដឹកនាំកម្មវិធីថ្លែងថា «ជាទូទៅកម្មវិធីមរតកវប្បធម៌ខ្មែរនេះធ្វើឡើងដើម្បីលើកស្ទួយមរតកវប្បធម៌ខ្មែរ ហើយតែងតែប្រារព្ធពិធីចែករង្វាន់នេះនាឱកាសអបអរសាទរទិវា «ជាប្រវត្តិសាស្ត្រ៧មករា» ។ បានន័យថា ការចែករង្វាន់នេះយកថ្ងៃ៧មករា ជាគោល ក្នុងនោះយើងក៏បានផ្តោតលើគណៈកម្មការដាក់ពិន្ទុ គឺយើងយកអ្នកជំនាញលំដាប់ប្រទេសតែម្តង សុទ្ធតែជាអ្នកឆ្អិនផ្នែកវិញ្ញាសាទាំង៣ប្រភេទអាចថា ជាគ្រូដើម បើយីកេសុទ្ធតែជាគ្រូវរសិល្បករ សូម្បីអ្នកលេងភ្លេងក៏ជាវរសិល្បករ ឆ្នើមៗបែបមរតកមនុស្សរស់ ។ កម្មវិធីមរតកវប្បធម៌ខ្មែរនេះមិនមែនក្រុមការងារនឹកឃើញទេ ជាគំនិតផ្តួចផ្តើមឡើង ដោយលោកជំទាវ ហ៊ុន មា៉ណា អគ្គនាយិកាវិទ្យុ និងទូរទស្សន៍បាយ័ន ដោយក្រុមការងារគ្រាន់តែជាប្រតិបត្តិករទទួលតាមការណែនាំ ។ យើងមានមោទនភាពដោយសារតែវិញ្ញាសា នីមួយៗបានបង្ហាញឱ្យឃើញនូវប្រភេទលំដាប់ចម្រៀងមួយ ដូចជាផ្នែកប្រពៃណីទាក់ទងសម័យនគរគោកធ្លកព្រះថោងតោងស្បៃ ចំណែកចម្រៀងយីកេគឺកើតមានក្នុងអំឡុងពេលសម័យចាមជ្វា ឯបាសាក់កើតនៅកម្ពុជាក្រោមនាទឹកដីបាសាក់ វាជាទុនមួយគួរឈ្វេងយល់ ។
ចំពោះបេក្ខជនដែលប្រឡងជាប់កន្លងមកគឺមានឱកាសល្អបានច្រៀងនៅក្រៅប្រទេស បានកើនផ្នែកជីវភាពជាងមុន ។ ជ័យលាភីដែលចេញពីកម្មវិធីទៅ គឺសុទ្ធតែមានសមត្ថភាព សូម្បីតែជ័យលាភីកិត្តិយសក៏ល្បីពេញប្រទេសដែរ ព្រោះយើងត្រឹមត្រូវ ហ្មត់ចត់ មិនបន្លំឡើយ» ។
ចំពោះបេក្ខជន កែវ ឆាត ពីខេត្តកំពត និងជាអ្នកយកព័ត៌មានរបស់សារព័ត៌មានកោះសន្តិភាពដែលចូលរួមប្រឡងផ្នែកចម្រៀងប្រពៃណីឈានដល់ជុំទី៤ កាលពីថ្ងៃទី២៩ កញ្ញា ២០១៥ និងជាប់ទៅជុំទី៥ បាននិយាយថា លោកបានឆ្លងកាត់៤វគ្គជោគជ័យជាបន្តបន្ទាប់ ។ នៅវគ្គទីមួយ លោកឆាត ច្រៀងបទមានចំណងជើងថា «ស្ពានព្រែកវាសនារកាកោង» ។ វគ្គ២ច្រៀងបទ «វាសនាស្ពានគុណគ្រូ» ។ វគ្គ៣ច្រៀងបទ «ទឹកភ្នែកសម្តេចហ៊ុន សែន» ។ វគ្គ៤ច្រៀងបទ «សំណាងស្រុកក្រូចឆ្មារ» ។ បេក្ខជននៅវគ្គទី៤សុទ្ធតែជាអ្នកខ្លាំង សំឡេងពីរោះ ដូច្នេះលោកឆាតត្រូវច្រៀងដោយប្រិតពប្រៀងបំផុត ហើយទីបំផុតបានឆ្លងទៅវគ្គទី៥ទៀត ។
នៅវគ្គទី៤ បេក្ខជន-បេក្ខនារីវិញ្ញាសាចម្រៀងប្រពៃណីមានចំនួន៣នាក់ ហើយគណៈកម្មការសម្រេចឱ្យឆ្លងទៅវគ្គទី៥ទាំង៣នាក់ ។
លោកកែវ ឆាត ជាអ្នកចម្រៀងបុរាណនិងសម័យនៅខេត្តកំពត ដោយលោកមានវង់តន្ត្រីអាជីពផ្ទាល់ខ្លួន ។ កន្លងមកលោកឆាតធ្លាប់ចូលរួមប្រឡងចម្រៀងទាំងផ្នែកសម័យ និងបុរាណជាច្រើនលើកនៅស្ថានីយទូរទស្សន៍មួយចំនួន។ ចំណែកនៅឆ្នាំនេះលោកកែវ ឆាត ប្រឡងចម្រៀងបុរាណឆ្លងដល់វគ្គទី៥ ហើយប្រាថ្នាឆ្លងទៅវគ្គបន្ទាប់ទៀត ៕
ចែករំលែកព័តមាននេះ