ខេត្តបន្ទាយមានជ័យ ៖ សេចក្តីរាយការណ៍ឲ្យដឹងថា កាលពីវេលាម៉ោង៣រសៀលថ្ងៃទី១១ មេសា ឆ្នាំ២០២១ មានករណីភ្លៀងមួយមេ នឹងនៅរលឹមស្រិចៗ ក៏មានរន្ទះបាញ់សម្លា.ប់មនុស្សម្នាក់នៅចំណុចវាលត្រពាំងកក់ខាងត្បូង ភូមិម្កាក់ ចំងាយប្រហែល ៣គីឡូម៉ែត្រ ស្ថិតក្នុងសង្កាត់ម្កាក់ ក្រុងសិរីសោភ័ណ ខេត្តបន្ទាយមានជ័យ ខណៈជនរងគ្រោះកំពុងជិះម៉ូតូទៅផ្ទះ ។
ជនរគ្រោះឈ្មោះ ចក់ ចាន់ធី ភេទប្រុស អាយុ២៥ឆ្នាំ មុខរបរ ជាកសិករ រស់នៅភូមិពីរ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។ ជនរងគ្រោះត្រូវរន្ទះបាញ់ដេកស្លា.ប់នៅក្បែរម៉ូតូដោយមានដងឫស្សីប្រវែង២ម៉ែត្រ សំរាប់ខ្វាត្រីឈ្លូញ រុំជាប់កៅស៊ូយឺតពណ៌ខ្មៅ មួយចំហៀងជាប់នៅលើតួម៉ូតូ ឯមួយចំហៀងទៀតនៅជាប់លើទ្រូងសាកសព ចំណែកដែកខ្វាត្រីឈ្លូញនៅជាប់ចុងជើង សាកសពដេកផ្ងារនៅលេីផ្លូវលំចូលស្រែ ជាប់មាត់ប្រឡាយ ដៃទាំងពីរបោះឡេីងលេី ជេីងសណ្តូកត្រង់ ស្បែងជេីងជាប់និងបាតជេីង ពាក់អាវយឺតដៃវែង ពណ៌ខ្មៅ ស្លៀកខោខាវប៊ូយជេីងខ្លីត្រឹម ជង្គង់។
តាមការបំភ្លឺរបស់ប្រជាពលរដ្ឋដែលកំពុងធ្វើស្រែក្បែរនោះបានឲ្យដឹងថា នៅវេលារសៀលថ្ងៃខាងលើ ដំបូងមានភ្លៀងធ្លាក់មួយមេ បន្ទាប់មកក៏ស្ងប់ទៅវិញតែនៅរលឹមស្រិចៗ ពេលលឺស្នូរន្ទះបាញ់ប្រាវ តែពុំដឹងថាត្រូវមនុស្សទេ ។ លុះមួយសន្ទុះក្រោយមកកសិករម្នាក់នោះ បានឡើងពីស្រែក្នុងគោលបំណងត្រឡប់ទៅផ្ទះវិញ ពេលដើរមកដល់លើផ្លូវ ស្រាប់តែឃេីញមនុស្សម្នាក់ដេកស្លាប់នៅលេីផ្លូវក្បែរម៉ូតូ ទើបគាត់រាយការណ៍ប្រាប់សមត្ថកិច្ច នគរបាលប៉ុស្តិ៍មូលដ្ឋាន ។ បន្ទាប់សមត្តកិច្ចបានចុះទៅពិនិត្យជុំវិញកន្លែងកើតហេតុ និងធ្វើកោសល្យវិច័យ នឹងបានប្រគល់ជូនសាច់ញាតិ យកទៅធ្វើបុណ្យតាមប្រពៃណី ៕ ដោយ៖ ឃឹម ប៊ុនណាក់
ចែករំលែកព័តមាននេះ