ខ្សែភាពយន្តភាគថៃថ្មីរបស់ស្ថានីយទូរទស្សន៍ PNN ដែលមានចំណងជើងថា ព្យុះជីវិតក្នុងភ្លើងសង្គ្រាម បាននិងកំពុងអប់រំទស្សនិកជននៅក្នុងប្រទេសកម្ពុជា ឲ្យចេះរួបរួមសាមគ្គីគ្នា ដើម្បីយកជ័យជំនះលើរាល់ឧបសគ្គ
ខ្សែភាពយន្តភាគថៃថ្មីរបស់ស្ថានីយទូរទស្សន៍ PNN ដែលមានចំណងជើងថា ព្យុះជីវិតក្នុងភ្លើងសង្គ្រាម បាននិងកំពុងអប់រំទស្សនិកជននៅក្នុងប្រទេសកម្ពុជា ឲ្យចេះរួបរួមសាមគ្គីគ្នា ដើម្បីយកជ័យជំនះលើរាល់ឧបសគ្គ និងទុក្ខលំបាកទាំងអស់។
ខ្សែភាពយន្តនេះ ក៏បានផ្តល់ជាមេរៀនមួយដែលបង្ហាញឲ្យឃើញថា ការស្រឡាញ់របស់មនុស្សចំពោះគ្នាទៅវិញ ទើបអាចជួយឲ្យពួកគេទទួលបានជោគជ័យផងដែរ។
រឿង ព្យុះជីវិតក្នុងភ្លើងសង្គ្រាម ដែលបានចាក់ផ្សាយនៅលើទូរទស្សន៍ PNN កាលពីថ្ងៃសៅរ៍ ទី៣០ សីហា គឺជាខ្សែភាពយន្តភាគបែបបុរាណដែលរៀបរាប់អំពីដំណើររឿងរបស់វីរបុរសមួយក្រុមក្នុងការប្រយុទ្ធប្រឆាំងនឹងកងទ័ពឈ្លានពានដែលព្យាយាមចង់ដណ្តើមយកទឹកដីភូមិកំណើតរបស់ខ្លួន។
តារាល្បីៗដែលចូលរួមសម្តែងនៅក្នុងខ្សែភាពយន្តនេះ មានដូចជា លោក Toey Pongsakorn កញ្ញា Nichari Chokprajakchat និងលោក Art Pasut។ ខ្សែភាពយន្តនេះឆ្លុះបញ្ចាំងពីកម្លាំងតស៊ូរបស់អ្នកភូមិបាងរ៉ាចាន់ និងភាពនិរាសព្រាត់ប្រាស់ ល្បិចកលក្នុងការធ្វើសង្គ្រាម ដែលមាននៅក្នុងរឿងពិតនាសម័យបុរាណ នៅពុទ្ធសករាជ ២៣០៨។ ខ្សែភាពយន្តនេះ ក៏ឆ្លុះបញ្ចាំងពីរឿងរ៉ាវស្នេហារវាងនាយថាប់ និងនាងហ្វឿង ដែលត្រូវបានថតនៅក្នុងទីតាំងប្រវត្តិសាស្ត្រដ៏គួរឲ្យចាប់អារម្មណ៍ផងដែរ។
លោក Glen Felgate អគ្គនាយកទូរទស្សន៍ PNN បានមានប្រសាសន៍ថា «ឈុតឆាកសម្តែងនៅក្នុងសាច់រឿងនេះមានភាពទាក់ទាញអស្ចារ្យ រួមទាំងសម្លៀកបំពាក់ផងដែរ។ យើងជឿថា ទស្សនិកជនទាំងអស់នឹងជក់ចិត្តនៅពេលដែលបានទស្សនាខ្សែភាពយន្តនេះ»។
ខ្សែភាពយន្តភាគមនោសញ្ចេតនាស្នេហាមួយទៀតរបស់ទូរទស្សន៍ PNN គឺរឿង ចិត្តស្អប់បង្កប់សេ្នហ៍ ត្រូវបានចាក់ផ្សាយនៅថ្ងៃទី០២ កញ្ញា ដែលសម្តែងដោយ កញ្ញា Yaya និងលោក James។
កញ្ញា Yaya ដើរតួជាក្មេងកំព្រាក្រីក្រម្នាក់ឈ្មោះប៉ុម ដែលមានទំនាក់ទំនងស្នេហាជាមួយនឹងកម្លោះសង្ហាឈ្មោះហ្នឹង ជាកូនប្រុសរបស់មន្ត្រីការទូតម្នាក់ ហើយ ហ្នឹង សម្តែងដោយលោក James។
ហ្នឹង ចាប់ចិត្តស្រឡាញ់ ប៉ុម ដោយមិនបានដឹងថា ខ្លួនបានស្គាល់នាងតាំងពីវ័យក្មេងនោះទេ។ ប៉ុន្តែ ប៉ុម ចាំបានថា ហ្នឹង ជាមនុស្សមានចរិកក្រអឺតក្រទម និងធ្លាប់ធ្វើបាបនាងកាលនៅក្មេងៗ។ ប៉ុម មិនចង់ពាក់ព័ន្ធនឹង ហ្នឹង ទេ ហើយថែមទាំងព្យាយាមគេចចេញពី ហ្នឹង ថែមទៀត។ ដោយសារតែបែបនេះទើបធ្វើឲ្យ ហ្នឹង អាក់អន់ចិត្ត និងរងនូវភាពអាម៉ាស់។ ក្រោយមកជម្លោះរវាង ហ្នឹង និង ប៉ុម ក៏ក្លាយទៅជាសេចក្តីស្នេហាដែលអាចព្យាបាលជម្លោះគេបាន។
នៅខែកញ្ញា ទូរទស្សន៍ PNN ក៏បានបន្ថែមចាក់ផ្សាយខ្សែភាពយន្តភាគថៃរឿង «ម្ចាស់គ្រងធរណី» នៅវេលាថ្ងៃត្រង់ ដោយផ្តើមចាក់បញ្ចាំងនៅថ្ងៃទី១០ កញ្ញា នេះផងដែរ។
លោក Glen Felgate មានប្រសាសន៍បន្ថែមទៀតថា «ទូរទស្សន៍ PNN ពិតជាមានចំណីអារម្មណ៍ប្លែកសម្រាប់ទស្សនិកជនទាំងអស់នៅក្នុងខែកញ្ញានេះ ហើយយើងនឹងរង់ចាំមើលការឆ្លើយតបពីទស្សនិកជនវិញ តាមរយៈបណ្តាញទំនាក់ទំនងសង្គម Facebook និង Line»។
លោកអ្នកអាចធ្វើការទំនាក់ទំនងមកកាន់ទូរទស្សន៍ PNN តាមរយៈ Facebook: PNN-TV Cambodia និង Line ID: @pnntv ។
ចែករំលែកព័តមាននេះ