ប្រទេសសឹង្ហបុរី ៖ កាលពីមួយឆ្នាំមុន មានជនជាតិសឹង្ហបុរី ម្នាក់ឈ្មោះថា Chiya Amos គាត់បានរស់ក្នុងក្តីសុបិន្តរបស់គាត់ថា ថ្ងៃណាមួយគាត់នឹងអាចក្លាយជាអ្នកដឹកនាំវង់តន្ត្រីរបស់គាត់ទៅបង្ហាញនៅក្នុងប្រទេសនានាក្នុងប៉ែកអ៉ឺរ៉ុប ដោយក្នុងនាមជាអ្នកប្រគំតន្ត្រីបុរាណ ជាអ្នករបាំបាឡេ និងល្ខោនអូប៉េរ៉ា ។
ប៉ុន្តែចាប់តាំងពីខែមករា មកគាត់បានប្រែក្លាយជីវិតរបស់គាត់ ដោយធ្វើការរយៈពេល ១២ម៉ោងក្នុងមួយថ្ងៃ ក្នុងការជិះកង់ក្រោមកំដៅថ្ងៃដ៏ក្តៅ និងការចុះអាប់ (នៅពេលរាត្រី) ដើម្បីដឹកជញ្ជូនចែកចាយអាហារ ភេសជ្ជៈ និងអាហារសម្រន់ជាដើមជុំវិញប្រទេសសឹង្ហបុរី ។ ដូចអ្នកគ្រប់គ្នាទូទាំងពិភពលោកបានដឹងហើយថា ជំងឺរាតត្បាតកូវីដ ១៩ បានធ្វើឱ្យអាជីវកម្ម ក៏ដូចជាអាជីពជាច្រើនត្រូវបានផ្អាក និងភាគច្រើនបានផ្លាស់ប្តូរមកជាអាជីវកម្មអនឡាញ ឬក៏កន្លែងខ្លះបិទតែម្តង រួមទាំងប៉ែកអ៉ឺរ៉ុបឯនោះវិញក៏មិនធម្មតានោះ Chiya Amos អត់ការងារធ្វើអស់រយៈពេល ១០ខែ ក្នុងប្រទេសរ៉ុស្សី ដូចនេះគាត់បានសម្រេចចិត្តវិលត្រឡប់មកប្រទេសសឹង្ហបុរីវិញ ដើម្បីត្រឡប់មកទីជម្រកដែលមានសុវត្ថិភាពវិញ ។
ដោយឡែកនៅក្នុងប្រទេសរបស់គាត់នេះ ក៏មិនមានការងារជាតន្ត្រីករឱ្យគាត់ធ្វើនោះដែរ។ យោងតាមការស្រង់សម្តីរបស់ Chiya Amos បានប្រាប់សារព័ត៌មានរ័យទ័រ នៅថ្ងៃទី ១១ ខែមីនា ឆ្នាំ ២០២១នេះថា ៖ «មានតន្ត្រីករជាច្រើនមិនមានការងារធ្វើនោះទេ ។ ហើយខ្ញុំបានដាក់ពាក្យសុំការងារជាង ៤០កន្លែងចាប់តាំងពីខែមករា ឆ្នាំមុនមក ប៉ុន្តែខ្ញុំមិនបានទទួលដំណឹងពីពួកគេទាំងអស់នោះទេ» ។
បុរសដែលធាក់កង់ដឹកជញ្ជូនអាហារវ័យ ៣០ឆ្នាំរូបនេះបានបន្តថា ទោះបីជាការរឹតបន្តឹង ត្រូវបានបន្ធូរបន្ថយនៅក្នុងប្រទេសរុស្ស៊ី ក៏ដោយក៏នៅតែមិនសូវមានការងារសម្រាប់ជនបរទេសដែលទៅធ្វើការនៅទីនោះដែរ ។
បើទោះបីជាគាត់ធាក់កង់ ដើម្បីដឹកជញ្ជូនអាហារក្នុងមួយថ្ងៃជាមធ្យម ៣០ដងក្តី ក៏គាត់នៅតែមានមិត្តជិតស្និទ្ធរបស់គាត់នោះ គឺតន្ត្រី ដោយគាត់ស្តាប់តន្ត្រីបណ្តើរធាក់កង់បណ្តើរ ។ ការងារមួយនេះ វាពិតជាជួយគាត់ខ្លាំងណាស់ Chiya Amos អាចរកចំណូលសឹងតែប្រហាក់ប្រហែលនឹងចំណូលគាត់ពីមុន ប៉ុន្តែគ្រាន់តែគាត់ត្រូវការប្រើពេលវេលាយូរជាការងារធម្មតា និងត្រូវកម្លាំងដើម្បីធាក់កង់នោះ ។
សូមជម្រាបថា នៅពេល Chiya Amos អ្នកសម្តែងល្ខោនអូប៉េរ៉ា នៅក្នុងប្រទេសរ៉ុស្សី នោះ គាត់ក៏មានភរិយាជាជនជាតិរ៉ុស្សី ផងដែរ ប៉ុន្តែប្រពន្ធរបស់គាត់មិនអាចមកប្រទេសសឹង្ហបុរី ជាមួយនោះ ដូចនេះអ្នកទាំងពីរ ជួបគ្នាត្រឹមក្នុងវីដេអូខលប៉ុណ្ណោះ ។ គាត់បានបន្តដូចនេះថា ៖ «ខ្ញុំនឹកនៅពេលខ្ញុំបានឈលើឆាកដើម្បីសម្តែង ។ ពិតណាស់ ខ្ញុំនឹកអ្នកសម្តែងដទៃទៀតផងដែរ ដែលធ្លាប់ធ្វើការជាមួយ ខ្ញុំនឹកពេលខ្ញុំគ្រវីដៃ និងបង្កើតតន្ត្រីវេទមន្តលើឆាកសម្តែង» ។ គាត់បន្តថា ការងារដឹកជញ្ជូនម្ហូបអាហារនេះ គឺមានភាពស្រដៀងគ្នាខ្លះដែរជាមួយនឹងការសម្តែង ។
គាត់បន្ថែមថា ៖ «ការនាំស្បៀងអាហារដល់មនុស្ស គឺនាំចំណីអាហារដល់មនុស្ស មិនខុសពីតន្ត្រីករ គឺនាំចំណីអារម្មណ៍ ការកម្សាន្តសម្រាប់មនុស្សដូចគ្នា» ។ លោក Chiya សង្ឃឹមថាកន្លែងជាច្រើននឹងបើកដំណើរការជាថ្មី បន្ទាប់ពីមានមនុស្សនៅលើពិភពលោកទទួលបានវ៉ាក់សាំងកូវីដ ១៩ ក៏ព្រោះថា គាត់មានការកក់សំបុត្រមួយរួចហើយ សម្រាប់ពិធីបុណ្យនិទាឃរដូវ (រដូវផ្ការីក) នៅទីក្រុងតូក្យូ ដែលនឹងមកដល់ក្នុងខែមេសា ខាងមុខ ។
នៅពេលដែលគាត់បានធ្វើការងារនេះ (ជិះកង់ដឹកជញ្ជូនអាហារ) គាត់មានអារម្មណ៍ គាត់ទទួលបានបទពិសោធន៍ថ្មី និងបទពិសោធន៍មួយនេះអាចជួយឱ្យគាត់មានការគិតចាស់ទុំជាងមុន ។ លោកបន្ថែមថា ៖ «ខ្ញុំនឹងធ្វើការងារនេះឱ្យបានច្រើន តាមដែលខ្ញុំអាចធ្វើបាន ព្រោះវាជាបទពិសោធន៍យ៉ាងជូរចត់មួយសម្រាប់ខ្ញុំ នឹងធ្វើឱ្យខ្ញុំកាន់តែរឹងមាំ ហើយខ្ញុំវាពិតជាបានធ្វើឱ្យខ្ញុំល្អជាងមុនផងដែរ» ៕
ចែករំលែកព័តមាននេះ