The Australian កាលពីពេល ថ្មីៗកន្លងមកផ្សាយថា សហគមន៍ក្នុងភូមិមួយនៅរដ្ឋឧត្ដរប្រទេសនៃប្រទេសឥណ្ឌាបានប្រកាសគំរាមថា នឹងឱ្យស្ត្រី២នាក់បងប្អូនដើរស្រាតនៅជុំវិញភូមិ ជាពិសេសឱ្យបុរសនៅក្នុងភូមិចាប់រំលោភ ជាការដាក់ទោសដែលបងប្រុសរបស់ពួកនាងលួចពង្រត់ស្ត្រីដែលមានប្តីគេចខ្លួនបាត់ ។
សហគមន៍ក្នុងភូមិនោះមានអំណះអំណាង ថា ដាក់ទោសដោយការចាប់រំលោភ ទើបអាចជួយស្រោចស្រង់កិត្តិយសដល់ក្រុមគ្រួសាររបស់បុរសដែលត្រូវប្រពន្ធរត់តាមប្រុសនោះ ។ ទោះជាយ៉ាងណាក្ដីនៅពេលលេចឮពីការដាក់ទោសបែបនោះ នារីទាំង២នាក់បានគេចចេញពីភូមិបាត់ ។
អង្គការលើកលែងទោសអន្តរជាតិបានអំពាវនាវដល់រដ្ឋាភិបាលក្រុងញូវដេលី ឱ្យការពារសុវត្ថិភាពនារីទាំង២នាក់នោះ និងគួរលុបបំបាត់ចោលទំនៀមទម្លាប់តាមបែបបុរាណរបស់អ្នកស្រុក ។
មនុស្សម្នាក់ក្នុងចំណោមមិត្តភក្តិ បងប្អូនរបស់នារីរងគ្រោះបញ្ជាក់ប្រាប់អង្គការលើកលែងទោសអន្ដជាតិថា សហគមន៍នៅក្នុងភូមិមិនពេញចិត្តការអំពាវនាវនោះទេ មិនតែប៉ុណ្ណោះគំរាមថា ពួកគេមិនខ្លាចប៉ូលិសនៅក្នុងមូលដ្ឋានទេ ហើយចាប់ពីពេលនេះតទៅអាចកើតមានហេតុការណ៍ចលាចលនៅក្នុងភូមិបើធ្វើអ្វីប៉ះពាល់ពួកគេ ។
ចំពោះគូស្នេហ៍ដែលរត់តាមគ្នានោះ បច្ចុប្បន្នបានយល់ព្រមចូលខ្លួនទៅជួបប៉ូលិស បន្ទាប់ពីឮដំណឹងថា សមាជិកក្រុមគ្រួសាររបស់ពួកគអាចនឹងរងគ្រោះថ្នាក់ដោយសារអ្នកភូមិធ្វើបាប៕
ចែករំលែកព័តមាននេះ