រាជធានីភ្នំពេញ ៖ រថយន្តក្រុងមួយគ្រឿងបានបើកយ៉ាងលឿនបុកម៉ូតូអាយខុនពីក្រោយ និងកិនពីលើបណ្តាលឱ្យបុរសម្នាក់ស្លា.ប់ភ្លាមៗនៅកន្លែងកើតហេតុ ដែលហេតុការណ៍នេះបានកើតឡើងកាលពីវេលាម៉ោង៧ និង១០នាទីយប់
រាជធានីភ្នំពេញ ៖ រថយន្តក្រុងមួយគ្រឿងបានបើកយ៉ាងលឿនបុកម៉ូតូអាយខុនពីក្រោយ និងកិនពីលើបណ្តាលឱ្យបុរសម្នាក់ស្លាប់ភ្លាមៗនៅកន្លែងកើតហេតុ ដែលហេតុការណ៍នេះបានកើតឡើងកាលពីវេលាម៉ោង៧ និង១០នាទីយប់ ថ្ងៃទី៣០ សីហា ២០១៥ នៅតាមបណ្តោយផ្លូវភ្នំពេញ-ហាណូយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
សមត្ថកិច្ចបានឱ្យដឹងថា ជនរងគ្រោះដែលត្រូវរថយន្តក្រុងបុកពីក្រោយ និងកិនពីលើស្លាប់នេះមានឈ្មោះ ស៊ង វិចិត្រ ភេទប្រុស អាយុ៣៤ឆ្នាំ មុខរបរសន្តិសុខឯក រស់នៅភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ ។
ប្រភពនៅកន្លែងកើតហេតុបានឱ្យដឹងថា មុនពេលកើតហេតុ គេឃើញរថយន្តក្រុងមួយគ្រឿង (មានតែអ្នកបើកបរ គ្មានអ្នកដំណើរជិះ) ពណ៌ស ពាក់ស្លាកលេខ ភ្នំពេញ 3B-8950 បើកបរដោយបុរសម្នាក់តាមបណ្តោយផ្លូវភ្នំពេញ-ហាណូយក្នុងទិសដៅពីត្បូងទៅជើងយ៉ាងលឿន ខណៈមកដល់ចំណុចកើតហេតុស្រាប់តែបុកម៉ូតូមួយគ្រឿងម៉ាកអាយខុន ពណ៌ទឹកក្រូចលាយខ្មៅ ពាក់ស្លាកលេខ ភ្នំពេញ 1Y-6297 បើកបុរសដោយបុរសម្នាក់ ក្នុងទិសដៅស្របគ្នាពីក្រោយ ហើយកិនពីលើបណ្តាលឱ្យបុរសអ្នកបើកបរម៉ូតូស្លាប់ភ្លាមៗ ។ បន្ទាប់មករថយន្តបើកទៅមុខបានប្រហែល១០០ម៉ែត្រក៏ត្រូវប្រជាពលរដ្ឋស្ទាក់ឃាត់បាន តែអ្នកបើកបរបានបើកទ្វារចុះរត់គេចខ្លួនបាត់ ។
ក្រោយពេលកើតហេតុ ទាំងរថយន្ត និងម៉ូតូត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលខណ្ឌសែនសុខ ដើម្បីដោះស្រាយគ្នានៅពេលក្រោយ ចំណែកសពជនរងគ្រោះប្រគល់ទៅឱ្យបងប្អូនយកទៅធ្វើបុណ្យតាមប្រពៃណី ៕
ចែករំលែកព័តមាននេះ