នៅតាមកន្លែងសក្ការៈផ្សេងៗមានទីវត្តអារាមជាដើមឃើញមានរូបព្រះពុទ្ធបដិមាជាច្រើនសណ្ឋានក្នុងនោះមានរូបព្រះពុទ្ធប្រក់នាគជាដើម បើនិយាយពីអត្ថន័យរូបពុទ្ធបដិមាទាំងនោះប្រហែលជាពុំសូវមានអ្នកដឹងពីប្រវត្តិរឿងរ៉ាវច្រើនប៉ុន្មានទេ និងមានន័យបែបណាឡើយ ។ ដូនេះសូមលើកយករូបព្រះពុទ្ថបដិមាប្រក់នាគមកបង្ហាញដូចតទៅ ។
យោងតាមគម្ពីរព្រះពុទ្ធសាសនាបានរង្គាយសេចក្តីថា ក្រោយពេលបានត្រាស់ដឹងធម៌រួចហើយ ព្រះពុទ្ធបានបន្តធ្វើសមាធិនៅជិតស្រះទឹកបុរាណដ៏ធំមួយ នៅក្នុងសប្តាហ៍ទី៦ ដែលកាលនោះមានភ្លៀងព្យុះយ៉ាងខ្លាំងដែលជាហេតុនាំឱ្យរំខានដល់ការភាវនារបស់ព្រះអង្គ ។
នៅពេលនោះមានស្តេចនាគឈ្មោះ មុចលិន្ទដែលរស់នៅក្នុងមហាស្រះនោះ បានចេញមកជួយសម្រួលដល់ការធ្វើសមាធិរបស់ព្រះអង្គ ។ ស្តេចនាគបានវារឡើងពីទឹកលូនមកដល់ព្រះអង្គ ហើយបានឆ្វាយខ្លួនជារង្វេលលើដើម្បីឱ្យព្រះអង្គគង់ពីលើហើយបើកពពារបែងភាគក្បាល៧ប្រក់ពីលើដើម្បីកុំឲ្យព្រះអង្គទទឹក ។
ឯព្រះពុទ្ធវិញយកព្រះហស្តដាក់ត្រួតលើគ្នាក្នុងស្ថានភាពសម្រាក និងព្រះភ័ក្ត្រញញឹមបន្តិចបង្ហាញនូវចិត្តស្ងប់ប្រកដដោយមេត្តាធម៌ ។ អ្វីដែលអស្ចារ្យគឺ ព្រះនេត្រទាំងពីរបើកតែពុំសម្លឹងមកយើងទេ ផ្ទុយទៅវិញព្រះនេត្រទាំងគូបានបង្ហាញពីការប្រមូលអារម្មណ៍ក្នុងចិត្តព្រោះព្រះពុទ្ធកំពុងធ្វើសមាធិ ។
ព្រះពុទ្ធបញ្ចប់ការធ្វើសមាធិនៅថ្ងៃទី៤៩ បន្ទាប់មកព្រះអង្គយាងទៅសម្តែងធម៌ប្រោសសត្វលោកគ្រប់ទិសទី នេះគឺប្រវត្តិប្រក់នាគ ៕ សាន សារិន
ចែករំលែកព័តមាននេះ