រាជធានីភ្នំពេញ ៖ ការរក«ស.ខ្មៅ»ចំពោះការលើកឡើងរបស់មតិមួយចំនួនថា រាជរដ្ឋាភិបាលបានប្រើប្រាស់ផែនទីក្លែងក្លាយ ទៅបោះបង្គោលព្រំដែនជាមួយប្រទេសវៀតណាមនោះ ក្រុមអ្នកស្រាវជ្រាវនៅរាជបណ្ឌិត្យសភាកម្ពុជា
រាជធានីភ្នំពេញ ៖ ការរក«ស.ខ្មៅ»ចំពោះការលើកឡើងរបស់មតិមួយចំនួនថា រាជរដ្ឋាភិបាលបានប្រើប្រាស់ផែនទីក្លែងក្លាយ ទៅបោះបង្គោលព្រំដែនជាមួយប្រទេសវៀតណាមនោះ ក្រុមអ្នកស្រាវជ្រាវនៅរាជបណ្ឌិត្យសភាកម្ពុជា បានធ្វើការបង្ហាញនិងផ្ទៀងផ្ទាត់ផែនទីដែលទទួលបានពីភាគីមួយចំនួន ប៉ុន្តែក្រុមអ្នកស្រាវជ្រាវបានច្រានចោលផែនទី២ផ្ទាំង ដែលផ្តល់ឱ្យដោយគណបក្សសង្គ្រោះជាតិ ។
ក្នុងសន្នីសិទសារព័ត៌មានមួយនាព្រឹកថ្ងៃទី១៤ សីហា នៅរាជបណ្ឌិត្យសភា លោកបណ្ឌិតសុខ ទូច ប្រធានក្រុមការងារស្រាវជ្រាវ បានលើកឡើងថា ក្រុមការងាររបស់លោកបានទទួលផែនទីចំនួន២៦ផ្ទាំងពីរាជរដ្ឋាភិបាល ២៦ផ្ទាំងពីវិទ្យាស្ថានភូមិសាស្ត្រ ជាតិ IGN បារាំង និង២៦ផ្ទាំងពីគណបក្សសង្គ្រោះជាតិ។ ក្នុងចំណោមផែនទីនោះមានផែនទីរបស់រាជរដ្ឋាភិបាល និងផែនទីរបស់គណបក្សសង្គ្រោះជាតិ ដូចគ្នាចំនួន២៤ផ្ទាំង ។ ប៉ុន្តែផែនទី២ផ្ទាំង របស់គណបក្សសង្គ្រោះជាតិមិនអាចយកជាមូលដ្ឋានគ្រឹះបានទេ ព្រោះថាមួយផ្ទាំងជាផែនទីដែលចូលក្នុងទឹកដីវៀតណាម និងមួយផ្ទាំងទៀតជាផែនទីរួម ដែលមិនអាចយកជាការបាន ។
លោក បណ្ឌិត សុខ ទូច បានស្នើឲ្យគណបក្សសង្គ្រោះជាតិរកផែនទីចំនួន២ផ្ទាំងនោះ មកបំពេញបន្ថែម ដើម្បីធ្វើការផ្ទៀងផ្ទាត់ជាមួយផែនទីរបស់រាជរដ្ឋាភិបាល និងដើម្បីធ្វើការផ្ទៀងផ្ទាត់ជាមួយផែនទីអង្គការសហប្រជាជាតិ ដែលគ្រោងធ្វើការផ្ទៀងផ្ទាត់ នៅថ្ងៃទី២០សីហាខាងមុខនេះ ។
លោកថា ការបង្ហាញផែនទីនេះដើម្បីកុំឲ្យអ្នកនយោបាយ ចេះតែយកបញ្ហាព្រំដែនចោទ ប្រកាន់គ្នាទៅវិញទៅមក និងកុំឲ្យប្រទេសជិតខាងមើលងាយនិងសើចចំអកឲ្យ ។ ការបង្ហាញផែនទីនេះ ដើម្បីឲ្យមានការឯកភាពជាតិមិនប្រកាន់បក្សនយោបាយ ណាមួយនោះទេព្រោះព្រំដែនជាតិតែមួយ ។
លោកបញ្ជាក់ពីរឿងបញ្ហាផែនទីនេះថា «ទោះចង់ឬមិនចង់ យើងមានតំណាងគណបក្សប្រជាជនកម្ពុជា និងគណបក្សសង្គ្រោះជាតិដែលមានអាសនៈក្នុងសភា បានមកធ្វើជាសាក្សីថាតើយើងខុសត្រង់ណា ? តើអ្នកណាប្រើផែនទីក្លែងក្លាយ យើងចង់បញ្ចប់ទាក់ទិននឹងរឿងចម្រូងចម្រាសគ្នាឲ្យអស់» ។
ជាមួយគ្នានោះដែរលោកអ៊ូ ច័ន្ទឬទ្ធិ សមាជិកសភាមកពីគណបក្សសង្គ្រោះជាតិបានទទួលស្គាល់ចំពោះផែនទីដែលគណបក្សសង្គ្រោះជាតិប្រគល់ជូនរាជបណ្ឌិត្យសភា ដើម្បីស្រាវជ្រាវថា មានលក្ខណៈដូចគ្នានឹងផែនទីរាជរដ្ឋាភិបាល និងចំពោះផែនទីពីរផ្ទាំង ដែលក្រុមការងារច្រានចោលនោះ គណបក្សសង្គ្រោះជាតិនឹងខិតខំស្វែងរកមកប្រគល់ជូនរាជបណ្ឌិត្យសភាឲ្យគ្រប់ ។
លោកបន្តថា កន្លងមកគណបក្សសង្គ្រោះជាតិមិនដែលបានចោទប្រកាន់រាជរដ្ឋាភិបាលប្រើ ប្រាស់ផែនទីក្លែងក្លាយនោះទេ បើមានក៏វាជាការលើកឡើងរបស់បុគ្គលនោះទេ ។
លោក សុខ ទូច បានមានប្រសាសន៍ទៀតថា ផែនទីដែលក្រុមការងារបានយកមកផ្ទៀង ផ្ទាត់គ្នានេះ សុទ្ធតែមានត្រាបញ្ជាក់ទទួលស្គាល់ច្បាស់លាស់ ពីការផលិតនិងថែ្ង ខែ ឆ្នាំ ហើយចំពោះផែនទីដែលក្រុមការងាររបស់លោក ស៊ា ប៉េងសែ ប្រធានគណៈកម្មាធិការព្រំដែនប្រចាំប្រទេសបារាំងប្រគល់ឲ្យនោះ ក្រុមការងាររបស់លោកមិនបានយកមកធ្វើការផ្ទៀងផ្ទាត់នោះទេ ព្រោះថា គ្មានការអនុញ្ញាតពីលោក ស៊ា ប៉េងសែ ដែលខុសនឹងក្រមសីលធម៌របស់អ្នកស្រាវជ្រាវ ។
លោកបន្ថែមថា ចំពោះផែនទីដែលក្រុមការងារធ្វើការផ្ទៀងផ្ទាត់នឹង ប្រសិនបើមានភាពដូចគ្នានោះ ក្រុមការងារនឹងយកតាមផែនទីរាជរដ្ឋាភិបាល ព្រោះថាផែននោះមានការទទួលត្រឹមត្រូវ ។ សម្រាប់ពេលដែលធ្វើការផ្ទៀងផ្ទាត់ជាមួយផែនទី ដែលអង្គការសហប្រជាជាតិនឹងប្រគល់ជូនកម្ពុជានៅថ្ងៃទី២០ សីហាខាងមុខ រួច ក្រុមការងាររបស់លោកនឹងចុះពិនិត្យតាមព្រំដែនជាក់ស្តែងថា មានទឹកដីណាខ្លះបានបាត់បង់ ។ប៉ុន្តែលោកថារាជរដ្ឋាភិបាលនឹងធ្វើការបោះបង្គោលព្រំដែនជាមួយភាគីវៀតណាម ។
លោក ឈាង វុន សមាជិកសភាមកពីគណបក្សប្រជាជនកម្ពុជា ដែលបានចូលរួមក្នុងការបង្ហាញនោះមានប្រសាសន៍ថា លោកទទួលចំពោះការធ្វើបទបង្ហាញ របស់ក្រុមអ្នកស្រាវជ្រាវរាជបណ្ឌិត្យសភា ដើម្បីកុំឱ្យមានការចោទប្រកាន់ថា រាជរដ្ឋាភិបាលប្រើប្រាស់ផែនទីក្លែងក្លាយទៀត ។
ក្នុងសន្នីសីទនោះដែរ លោកបណ្ឌិត សុខ ទូច បានលើកឡើងពីការចង់ធ្វើវិសោធនកម្ម រដ្ឋធម្មនុញ្ញមាត្រា២ផងដែរ ប៉ុន្តែលោកថា មុននឹងឈានដល់វិសោធនកម្មច្បាប់នោះ ត្រូវមានការឯកភាពពីតំណាងរាស្ត្រ ដែលមានអាសនៈក្នុងរដ្ឋសភាសិន ជាងនេះគឺត្រូវការ បោះបង្គោលព្រំដែនឲ្យរួចសិនទើបធ្វើវិសោធនកម្មជាក្រោយ។
គួរបញ្ជាក់ថា ផែនទីដែលក្រុមអ្នកស្រាវជ្រាវយកមកផ្ទៀងផ្ទាត់ មានពីភាគីរាជរដ្ឋាភិបាល គណបក្សសង្គ្រោះជាតិ វិទ្យាស្ថានភូមិសាស្ត្រជាតិ IGN បារាំង និងអង្គការសហប្រជាជាតិ ។ ក្នុងការបង្ហាញនោះ មានការចូលរួមពីសមាជិករដ្ឋសភាមកពីគណបក្សប្រជាជនកម្ពុជា គណបក្សសង្គ្រោះជាតិ សមាជិកព្រឹទ្ធសភា តំណាងអង្គការសង្គមស៊ីវិល ភាគីពាក់ព័ន្ធ និងអ្នកសារព័ត៌មានច្រើនទៀត ដែលចង់ដឹងពីបញ្ហាផែនទីដែលកំពុងឲ្យមានកម្តៅនយោបាយ នោះផងដែរ ៕
ចែករំលែកព័តមាននេះ