ព្រះមហាក្សត្រ ត្រាស់បង្គាប់ តែងតាំងលោក ឃួង ស្រេង បន្តកាន់តំណែង ជាអភិបាលរាជធានីភ្នំពេញ នៅអាណត្តិទី២
- ភ្នំពេញ
ភ្នំពេញ៖ ក្នុងព្រះរាជក្រឹត្យ ចុះថ្ងៃទី៥ ខែកុម្ភៈ ឆ្នាំ២០២១ ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី…
ភ្នំពេញ៖ ក្នុងព្រះរាជក្រឹត្យ ចុះថ្ងៃទី៥ ខែកុម្ភៈ ឆ្នាំ២០២១ ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី បានត្រាស់បង្គាប់ តែងតាំងឯកឧត្តម ឃួង ស្រេង ឋានន្តរស័ក្តិឧត្តមមន្ត្រី ថ្នាក់លេខ១ ជាអភិបាល នៃអគៈអភិបាលរាជធនីភ្នំពេញ សម្រាប់អាណត្តិទី២ ក្នុងដែនសមត្ថកិច្ចដដែល។ លោក ឃួង ស្រេង បានកាន់តំណែងអភិបាលរាជធានីភ្នំពេញ កាលពីខែមិថុនា ឆ្នាំ២០១៧។
សម្តេចតេជោ នាយករដ្ឋមន្ត្រី ហ៊ុន សែន បានក្រាបបង្គំទូលថ្វាយព្រះមហាក្សត្រ ដើម្បីចេញព្រះរាជក្រឹត្យ ត្រាស់បង្គាប់តែងតាំងលោកឃួងស្រេង ឲ្យបន្តតំណែងជាអភិបាលរាជធានីភ្នំពេញ មួយអាណត្តិទៀត។
កើតនៅថ្ងៃទី២ ខែវិច្ឆិកា ឆ្នាំ១៩៦៦ លោក ឃួង ស្រេង បានចូលបម្រើការងារក្នុងក្របខណ្ឌរដ្ឋ កាលពីខែមេសា ឆ្នាំ១៩៩៨ ជាមន្ត្រីសាលាខណ្ឌទួលគោក ក្នុងរាជធានីភ្នំពេញ។ ចាប់ពីឆ្នាំ១៩៩៩-២០០៨ លោក ឃួង ស្រេង ជាអភិបាលរងខណ្ឌទួលគោក។
នៅឆ្នាំ២០០៨-២០០៩ លោកឃួងស្រេង ជាអនុរដ្ឋលេខាធិការក្រសួងពាណិជ្ជកម្ម។ ចាប់ពីឆ្នាំ២០០៩-២០១២ លោក ឃួង ស្រេង ជាអភិបាលខណ្ឌសែនសុខ ក្នុងរាជធានីភ្នំពេញ។ ចាប់ពីឆ្នាំ២០១២-២០១៧ លោក ឃួង ស្រេង ជាអភិបាលរង រាជធានីភ្នំពេញ។ នៅខែមិថុនា ឆ្នាំ២០១៧ លោក ឃួង ស្រេង ត្រូវបានតែងតាំងជាអភិបាលរាជធានីភ្នំពេញ ជំនួសលោក ប៉ា សុជាតិវង្ស។
លោក ឃួង ស្រេង ដែលមានស្រុកកំណើត នៅភូមិរំលង ឃុំទ្រៀល ស្រុកបារាយណ៍ ខេត្តកំពង់ធំ បានបញ្ចប់ការសិក្សាមធ្យមសិក្សាទុតិយភូមិ នៅវិទ្យាល័យ សន្ធរម៉ុក ក្នុងរាជធានីភ្នំពេញ នៅឆ្នាំ១៩៨៧។
ឆ្នាំ១៩៨៨ – ១៩៩២ បញ្ចប់បរិញ្ញាប័ត្រវិស្វកម្ម នៅសាកលវិទ្យាល័យសហភាពសូវៀត។ ឆ្នាំ ១៩៩២ – ១៩៩៧ លោក ឃួង ស្រេង បានបញ្ចប់ការសិក្សាថ្នាក់ឧត្តមសិក្សា នៅមហាវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច។ ឆ្នាំ ២០០២ – ២០០៤ លោក ឃួង ស្រេង បានបញ្ចប់ការសិក្សាសញ្ញាបត្រជាន់ខ្ពស់ វិទ្យាសាស្ត្រនយោបាយ នៅសាកលវិទ្យាល័យ ចំរើនពហុបច្ចេកវិទ្យា។ ២០០៤-២០០៧ លោក ឃួង ស្រេង បានទទួលសញ្ញាប័ត្របណ្ឌិតវិទ្យាសាស្ត្រនយោបាយ។
លោក ឃួង ស្រេង មានភរិយាឈ្មោះ ជា ស៊ីណា និងមានកូនចំនួន ០៤នាក់ (កូនស្រី ០៣ នាក់ និងកូនប្រុស ០១ នាក់)៕
ចែករំលែកព័តមាននេះ