រោគទាស់4ប្រភេទដែលស្ត្រីគួរយកចិត្តទុកដាក់នៅពេលសម្រាលកូនរួច
ទាស់ជាឈ្មោះរោគកើតដោយអាហារចំណី ឬដោយធ្វើការអ្វីធ្ងន់ក្នុងវេលាដែលខ្លួនមិនទាន់ជាស្រឡះអំពីអំណាចនៃការសម្រាលកូន ឬអំពីជំងឺណាមួយចូលមកបៀតបៀនរាងកាយ ។
ទាស់ជាឈ្មោះរោគកើតដោយអាហារចំណី ឬដោយធ្វើការអ្វីធ្ងន់ក្នុងវេលាដែលខ្លួនមិនទាន់ជាស្រឡះអំពីអំណាចនៃការសម្រាលកូន ឬអំពីជំងឺណាមួយចូលមកបៀតបៀនរាងកាយ ។ ខាងក្រោមនេះជារោគសញ្ញានៃជំងឺទាស់៖
១-រោគទាស់ដោយមានគ្រុនក្តៅ ៖ បានជាមានជំងឺទាស់ហើយមានគ្រុនក្តៅផងនោះ អាចបណ្តាលមកពីការសម្រាលកូនយកទងសុកចេញមិនអស់ពីស្បូន ឬយកដៃក្រខ្វក់ទៅប៉ះពាល់ស្បូនជាហេតុនាំឲ្យកើតមានមេរោគចូលទៅក្នុងស្បូន ។ គួរតែទៅមន្ទីរពេទ្យដើម្បីពិភាក្សាជាមួយគ្រូពេទ្យ ។
២-ទាស់ដោយមានគ្រុនក្តៅនិងរងាមកជាមួយផង ៖ កាលណាបើសម្រាលកូនហើយ ស្បូនមិនព្រមរួមតូចមកវិញហើយវានៅតែរីកធំដដែលនោះ នៅត្រង់បរិវេណក្បាលពោះមានការឈឺចុកចាប់ខ្លាំង និងមានអាការក្អក ឈឺដើមទ្រូងដកដង្ហើមតឹងរកកល់ផុតម្តងៗ ។ នេះជាអាការធ្ងន់ធ្ងន់ហើយ ព្រោះសរសៃឈាមខ្មៅនៃស្បូនត្រូវហើម ហើយមានខ្ទុះទៀតត្រូវប្រញាប់នាំអ្នកជំងឺទៅមន្ទីរពេទ្យជាបន្ទាន់ និងត្រូវឲ្យគាត់ដេកផ្ងារនៅមួយកន្លែងស្ងៀមហាមធ្វើចលនាព្រោះខ្លាចខ្ទុះក្នុងស្បូនហូរចូលទៅដល់សួត ជាហេតុនាំឲ្យមានគ្រោះថ្នាក់ខ្លាំងណាស់ ។
៣-ទាស់ដោយសារហើមជើងនិងស្ពឹកជើង ៖ ជំងឺនេះក៏អាចបណ្តាលមកពីឆ្មបមិនមានអនាម័យ ដៃមិនបានលាងសម្អាតដើម្បីសម្លាប់មេរោគនាំឲ្យប៉ះពាល់ទ្វារមាសរបស់ស្ត្រីបញ្ជូនមេរោគចូលទៅក្នុងស្បូនយ៉ាងងាយ ។ បន្ទាប់ពីសម្រាលបានប្រហែលជា២០ថ្ងៃមក ជំងឺនេះនឹងចាប់ផ្តើមធ្វើទុក្ខដែលភាគច្រើនវាកើតនៅលើជើងឆ្វេងមុននិងមានអាការឡើងហើម-ស្ពឹកជើងក្នុងរយៈពេលប៉ុន្មានថ្ងៃទើបអន់ទៅវិញ តែបើក្នុងអំឡុងពេលហើមនិងស្ពឹកនោះ បើយើងមិនសម្រាកនៅមួយកន្លែងទេគឺចេះតែធ្វើចលនា ជំងឺនេះអាចនឹងបណ្តាលឲ្យមានគ្រោះថ្នាក់យ៉ាងធ្ងន់បាន ។
របៀបនៃការព្យាបាលតម្រូវឲ្យអ្នកជំងឺសម្រាកនៅមួយកន្លែងរហូតបាត់ហើមហើយមិនត្រូវយកដៃទៅស្ទាបនៅកន្លែងដែលឈឺនោះទេដោយអនុវត្តទៅតាមវេជ្ជបញ្ជា ។
៤-រោគទាស់ក្អកមានឈាមនិងស្គមរីងរៃ ៖ ដែលសភាពបែបនេះភាគច្រើន កើតមានរបេងសួតនៅពេលស្ត្រីសម្រាលកូនរួច ខ្លួនកាន់តែស្គមទៅៗ និងមានក្អក ដែលជួនកាលមានឈាមមកជាមួយកំហាកផង ហើយបរិភោគមិនបាន សម្រាន្តក៏មិនសូវលក់ទៀត ត្រូវតែទៅមន្ទីរពេទ្យដើម្បីពិនិត្យនិងព្យាបាលឲ្យបានទាន់ពេលវេលា ៕
ចែករំលែកព័តមាននេះ