រាជធានីភ្នំពេញ ៖ មានការភ្ញាក់ផ្អើលមួយកាលពីវេលាម៉ោង២និង៣០នាទីរសៀលថ្ងៃទី២៧ តុលា ២០១០ ខណៈពេលដែលគេប្រទះឃើញជនបរទេសម្នាក់ដេកស្លាប់នៅលើគ្រែពូក ក្នុងបន្ទប់លេខ០០១ ផ្ទះសំណាក់យីហោ ឌីយ៉ាម៉ង់ លេខ៥៤Eo ផ្លូវលេខ១៣ សង្កាត់ផ្សារកណ្តាលទី១ ខណ្ឌដូនពេញ។ អ្នកគ្រប់គ្រងផ្ទះសំណាក់ឌីយ៉ាម៉ង់បានឱ្យសមត្ថកិច្ចដឹងថា ជនរងគ្រោះដែលស្លាប់មិនដឹងមូលហេតុ ក្នុងផ្ទះសំណាក់នេះឈ្មោះ PHILIP SAM ភេទប្រុស អាយុ៣២ឆ្នាំ ជនជាតិន័រវេស មកកម្ពុជាជាអ្នកទេសចរ ហើយចូលស្នាក់នៅកាលពីយប់ថ្ងៃទី២០ តុលា ២០១០។
នៅមុនពេលកើតហេតុ មិនឃើញបុរសរងគ្រោះចុះមកក្រោមធ្វើឱ្យអ្នកទទួលខុសត្រូវផ្ទះសំណាក់មានការសង្ស័យ ទើបទូរស័ព្ទហៅឱ្យនគរបាលប៉ុស្តិ៍រដ្ឋបាលផ្សារកណ្តាលទី១ ចុះមកជួយពិនិត្យ។ ខណៈពេលសមត្ថកិច្ចមូលដ្ឋានបើកទ្វារបន្ទប់ចូលទៅ ទើបដឹងថា បុរសរងគ្រោះមានសភាពរឹង ហើយដេកស្លាប់នៅលើគ្រែពូក ដោយដណ្តប់ភួយទៀតផង។ ជំហានដំបូង សមត្ថកិច្ចជំនាញបានសន្និដ្ឋានថា ជនរងគ្រោះស្លាប់ដោយគាំងបេះដូង ហើយនៅក្នុងបន្ទប់ដេកនោះពុំមានសំភារធ្លាក់អារាត់អារាយនោះទេ៕
ចែករំលែកព័តមាននេះ