AFP ផ្សាយកាលពីពេល ថ្មីៗនេះថាដោយសារតម្លៃនៅក្រុងឡង់ដ៍ ចក្រភពអង់គ្លេសកើនខ្ពស់ជា រឿយៗ ធ្វើឱ្យពលរដ្ឋជាច្រើនស៊ូទ្រាំមិនបាន ត្រូវរិះរកជម្រើសផ្សេងចំណាយអស់តិច ដូចជាផ្លាស់ទៅរស់នៅលើទូកដែលកំពុងទទួលការពេញនិយម ។
ពលរដ្ឋភាគច្រើននិយមរស់នៅលើទូក ព្រោះសប្បាយរីករាយ និងមិនចំណាយប្រាក់ច្រើន បើប្រៀបធៀបទៅនឹងការទិញផ្ទះ ប៉ុន្តែបញ្ហាបានកើតឡើងច្រើនជាងការរស់នៅជាប្រក្រតីលើគោកដែលមានភ្លើង និងទឹកគ្រប់គ្រាន់បង្កលក្ខណៈងាយស្រួល រួមទាំងបង្គន់អនាម័យដោយមិនចាំបាច់ត្រូវដោះស្រាយដោយខ្លួនឯង ។
លោកជីម ប្រាយដេន អាយុ៣៩ឆ្នាំដែលរស់នៅលើទូកជាង២ឆ្នាំជាមួយគូស្នេហ៍ បានរៀបរាប់ថា ពលរដ្ឋភាគច្រើនងាកទៅរស់នៅលើទូក ដោយមិនខ្វល់ថាតើមានបញ្ហាអ្វីខ្លះកើតឡើងទេ? អ្នកខ្លះទៀតចាំបាច់ត្រូវរស់នៅលើទូកដោយសារគ្មានជម្រើសផ្សេង ។ អ្នកចំណូលថ្មីទាំងនេះរមែងជួបបញ្ហាច្រើនដូចជាសំឡេងម៉ាស៊ីនកាណូត និងការប្រឈមមុខនឹងអាកាសធាតុត្រជាក់ សំណើមជាដើម ។ ទូកមួយគ្រឿងមានតម្លៃប្រហែល១សែនផោន ឬជាង៣ម៉ឺនដុល្លារ ចាត់ទុកថាថោកជាងផ្ទះនៅក្រុងឡុងដ៍ដែលមានតម្លៃចាប់ពី៨សែនដុល្លារ និងតម្លៃកាន់តែកើនខ្ពស់ជារៀងរាល់ឆ្នាំប្រហែល១១%បង្កឱ្យពលរដ្ឋភាគច្រើនងាកទៅទិញទូកធ្វើជាជម្រក ។
ចំពោះកំណើនដ៏ឆាប់រហ័សរវាងទូកទាំងនោះធ្វើឱ្យកើតមានការដណ្ដើមយកកន្លែងចត និងកើតមានបញ្ហាតានតឹងរវាងអ្នករស់នៅលើទូក និងអ្នករស់នៅតាមមាត់ទន្លេបង្កឱ្យលាន់ឮសំឡេងម៉ាស៊ីនកាណូត ឬទូកបញ្ចេញផ្សែង ។ ក្រៅពីនេះទូកជាច្រើនគ្រឿងទទួលប័ណ្ណអនុញ្ញាតដោយកំណត់ពេលបម្លាស់ទីទូកនៅរៀងរាល់១៤ថ្ងៃម្ដង ជំនួសការចតជាអចិន្ត្រៃយ៍ ។ ត្រង់ចំណុចនេះអាចមានបញ្ហាដល់អ្នកប្រើទូកព្រោះកន្លែងចតទូកមានកំណត់ ការបម្លាស់ទីញឹកញាប់ធ្វើឱ្យពួកគេមិនអាចរស់នៅបានដោយងាយស្រួល និងខាតបង់លើការចំណាយ មិនខុសពី ការជួលផ្ទះនៅក្រុងឡុងដ៍ ។
នាយកដ្ឋានការពារទន្លេ និងស្ទឹងនៅក្រុងឡុងដ៍បញ្ជាក់ថា ការចេញប័ណ្ណអនុញ្ញាតនោះគឺតម្រូវឱ្យអ្នកណាមិនបានទទួលប័ណ្ណអនុញ្ញាត ត្រូវចាកចេញ ។ សហគមន៍អ្នកនៅលើទូកបានប្រឆាំងនឹងការចេញប័ណ្ណអនុញ្ញាតនោះដោយបានរិះគន់ថានឹងធ្វើអោយមនុស្សជាច្រើនគ្មានទីជម្រក តែអ្នកនាំពាក្យរបស់នាយកដ្ឋាន ថ្លែងថានាយកដ្ឋានមិនចង់ឱ្យពលរដ្ឋគ្រប់រូបយល់ថាទូកជាជម្រើសនៃទីស្នាក់អាស្រ័យមានតម្លៃថោកទេ ប៉ុន្តែចង់ឱ្យពួកគេយល់ថា វាជាយានប្រើសម្រាប់សម្រាកលំហែកាយ ៕
ចែករំលែកព័តមាននេះ