ខេត្តសៀមរាប ៖ បើយោងតាមរបាយការណ៍របស់រដ្ឋបាលសាលាខេត្ត គិតត្រឹមថ្ងៃទី៣ ខែមករា ឆ្នាំ២០២១ គ្រឿងបង្គំនៃផ្ទះចំនួន ១៣៩ខ្នង ក្នុងចំណោមផ្ទះចំនួន ៤៣០ខ្នង…
ខេត្តសៀមរាប ៖ បើយោងតាមរបាយការណ៍របស់រដ្ឋបាលសាលាខេត្ត គិតត្រឹមថ្ងៃទី៣ ខែមករា ឆ្នាំ២០២១ គ្រឿងបង្គំនៃផ្ទះចំនួន ១៣៩ខ្នង ក្នុងចំណោមផ្ទះចំនួន ៤៣០ខ្នង របស់ពលរដ្ឋ ដែលបានស្មគ្រ័ចិត្តរុះរើចេញពីដីចំណីស្ទឹងដែលស្ថិតនៅក្នុងភូមិមណ្ឌល៣ (ភូមិរោករាក) សង្កាត់ស្លក្រាម ក្រុងសៀមរាប ចាប់ពីស្ពាននាគ ទៅដល់ស្ពានអង្គរទៅនៅទីតាំងថ្មី ត្រូវបានក្រុមការងារនៃរដ្ឋបាល ក្រុងសៀមរាប ដឹកនាំដោយលោក នួន ពុទ្ធារ៉ា អភិបាលក្រុងសៀមរាប ជួយដឹកជញ្ជូនចេញទៅទីតាំងថ្មី នៅក្នុងភូមិរុនតាឯក ស្រុកបន្ទាយស្រី ខេត្តសៀមរាប។
ការដឹកជញ្ជូនដោយរថយន្តជាច្រើនគ្រឿង ទៅជួយដឹកសម្ភារ និងគ្រឿងឈើបង្គំ នៃផ្ទះពលរដ្ឋ ដែលបានរុះរើចេញពីដីចំណីស្ទឹង ទៅរស់នៅទីតាំងថ្មីនេះ គឺដើម្បីរួមចំណែកគាំទ្រដល់គម្រោងសាងសង់ហេដ្ឋារចនាសម្ព័ន្ធចំនួន ៣៨ខ្សែ និងការស្តារស្ទឹងសៀមរាប ឡើងវិញ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងដើម្បីរួមចំណែក សម្រាលដល់ការលំបាករបស់ពលរដ្ឋជាម្ចាស់សំណង់ មិនរៀបរយ លើដីចំណីមាត់ស្ទឹងសៀមរាប ដែលបានស្ម័ត្រចិត្តធ្វើការរុះរើទៅនៅទីតាំងថ្មីនោះផងដែរ។
គួរបញ្ជាក់ផងដែរថា ពលរដ្ឋជាម្ចាស់សំណង់មិនរៀបរយ ដែលស្ម័ត្រចិត្តធ្វើការរុះរើទៅនៅទីតាំងថ្មី ចេញពីដីចំណីមាត់ស្ទឹងសៀមរាប នឹងទទួលបានគោលនយោបាយដីស្របច្បាប់ ទំហំ២០ម៉ែត្រ គុណនឹង ៣០ម៉ែត្រ ដែលស្ថិតក្នុងភូមិធម្មជាតិរុនតាឯក ស្រុកបន្ទាយស្រី ជាមួយនឹងការបោះបង្គោលព្រំយ៉ាងច្បាស់លាស់ មានអណ្តូងទឹកប្រពន្ធ័ភ្លើង បង្គន់អនាម័យ និងការរៀបចំហេដ្ឋារចនាសម្ព័ន្ធ សមស្រប ទៅតាមតម្រូវការក្នុងជីវភាព រស់នៅរបស់បងប្អូនប្រជាពលរដ្ឋផងដែរ៕ ដោយ ៖ ច័ន្ទ រស្មី
ចែករំលែកព័តមាននេះ