សារព័ត៌មានបរទេស កាលពីពេល ថ្មីៗកន្លងមកផ្សាយថា លោកហ៊ីរ៉ូស៊ី អូងា៉វា៉ ចៅហ្វាយខេត្តហ្វូ៊គូអូកា ភាគខាងត្បូងប្រទេសជប៉ុន រីករាយណាស់ដែលតំបន់ឧស្សាហកម្មក្នុងយុគសម័យបដិវត្តន៍ «Meiji» ទាំង២៣កន្លែង ដោយមានមួយក្នុងចំណោមនោះ គឺអណ្តូងរ៉ែ «មីអីុកេ» ស្ថិតនៅខេត្តហ្វូ៊គូអូកា បានចុះបញ្ជីជាបេតិកភណ្ឌពិភពលោកដោយអង្គការយូណេស្កូ ។
លោកអូង៉ាវ៉ា បញ្ជាក់ថា នឹងរក្សាទុកទីតាំងដ៏សំខាន់ផ្នែកប្រវត្តិសាស្ត្រនោះជាបេតិកភណ្ឌផ្នែកវប្បធម៌រហូតដល់កូនចៅជំនាន់់ក្រោយ ។
កាលពីមុនមានរបាយការណ៍ថា ចិន និងកូរ៉េខាងត្បូងអាចប្រើសិទ្ធិជំទាស់លើការបោះឆ្នោតឱ្យតំបន់ឧស្សាហកម្មនោះជាបេតិកភណ្ឌពិភពលោក ដោយប្រទេសទាំង២យល់ឃើញស្របគ្នាថា តំបន់ឧស្សាហកម្ម៧កន្លែងក្នុងចំណោម២៣កន្លែងនោះ គឺជាទីតាំងដែលទ័ពជប៉ុនយកធ្វើជាកន្លែងឃុំឃាំង និងប្រើកម្លាំងជនជាតិចិន និងកូរ៉េ ដូចទាសករក្រោមអំណាចរបស់ចក្រពត្តិជប៉ុនដែលគ្រប់គ្រងលើដែនសមុទ្រកូរ៉េ កាលពីឆ្នាំ១៩១០ និងការឈ្លានពាននៅចិន កាលពីឆ្នាំ១៩៣១ ក្រោយមកជប៉ុនចាញ់សង្គ្រាមលោកលើកទី២នាឆ្នាំ១៩៤៥ ។
ប្រតិភូរបស់រដ្ឋាភិបាលក្រុងតូក្យូនៅយូណេស្កូ នឹងសាងសង់វិមានអនុស្សាវរីយ៍ចំពោះអ្នកស្លាប់ទាំងអស់នៅក្នុងតំបន់ឧស្សាហកម្ម ដោយទទួលការកោតសរសើរពីរដ្ឋាភិបាលកូរ៉េខាងត្បូងថា ជាចំណុចចាប់ផ្តើមនៃភាពទន់ភ្លន់របស់ជប៉ុនក្នុងរឿងប្រវត្តិសាស្ត្រដែលធ្វើឱ្យសម្ព័ន្ធភាពរវាងប្រទេសទាំង២ធូរស្រាល ប៉ុន្តែលោកហ៊្វូមីអូ គីស៊ីដា រដ្ឋមន្ត្រីក្រសួងការបរទេសជប៉ុននិយាយថា គោលជំហររបស់រដ្ឋាភិបាលស្តីពីពលករជនជាតិចិន និងកូរ៉េ ក្នុងយុគសម័យនោះនៅ រក្សាទុកដូចដើម ៕
ចែករំលែកព័តមាននេះ