ខេត្តព្រៃវែងជាប់ចំណាត់ថ្នាក់លេខ១ ដោយទទួលបានទិន្នផលស្រូវខ្ពស់ជាងគេ
- ព្រៃវែង
ខេត្តព្រៃវែង ៖ លោក អ៊ុក សំណាង ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តព្រៃវែង បានអោយដឹងនៅរសៀលថ្ងៃទី៩ ធ្នូ…
ខេត្តព្រៃវែង ៖ លោក អ៊ុក សំណាង ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តព្រៃវែង បានអោយដឹងនៅរសៀលថ្ងៃទី៩ ធ្នូ នេះថា បើទោះបីជាខេត្តព្រៃវែង បានទទួលរងផលប៉ះពាល់ដោយជំនន់ទឹកភ្លៀង ដែលធ្វើអោយខូចខាតផលស្រូវប្រមាណជា៣៨៥០ហិកតាក្តី ប៉ុន្តែយើងបានស្តារឡើងវិញបានទាំងស្រុង ហើយដោយសារតែយើងមានប្រពន្ធ័ធារាសាស្ត្រខ្វាត់ខ្វែង និងមេឃបានទំលាក់ភ្លៀងបានគ្រប់គ្រាន់ផងនោះ ធ្វើអោយខេត្តព្រៃវែងនៅរក្សាបានចំណាត់ថ្នាក់លេខ១ដដែល លើវិស័យកសិកម្មសំរាប់ឆ្នាំ២០២០នេះ។
លោក អ៊ុក សំណាង បានបន្តទៀតថា សំរាប់ការប្រមូលផលស្រូវរដូវវស្សា គិតត្រឹមថ្ងៃទី៧ ខែធ្នូ នេះ កសិករទូទាំងខេត្តធ្វើស្រូវបាន ២១៤,៦៥២ហិកតា ហើយប្រមូលផលបាន ៦៩២,៣០២តោន គិតជាមធ្យមស្មើនិង៣,២៣តោនក្នុង១ហិកតា ចំណែកកការបង្កបង្កើនផលស្រូវរដូវ ប្រាំងវិញ គិតមកដល់ត្រឹមថ្ងៃទី៧ធ្នូនេះដែរ ប្រជាកសិករធ្វើការសាបព្រួសបាន លើផ្ទៃដីសរុប៥៣,០០៣ហិកតា។
លោកប្រធានមន្ទីរបានបញ្ជាក់ផងដែរថា ក្រៅពីកសិកម្មដំណាំស្រូវ ប្រជាកសិករនៅក្នុងខេត្តព្រៃវែង ធ្វើការបង្កបង្កើនផលដំណាំសាកវប្បកម្ម និងឧស្សាហកម្មរយ:ពេលខ្លី បានចំនួន២៥៧០ហិកតា ក្នុងនោះបន្លែគ្រប់មុខបានចំនួន៦៣០ហិកតា និងដំណាំឧស្សាហកម្មបានចំនួន ១,៩៤០ហិកតា ដែលដំណាំឩស្សាហកម្មទាំងនោះរួមមាន ពោតក្រហម១,៣៨០ហិកតា សណ្ដែកបាយ៥១៩ហិកតា សណ្ដែកដី៧ហិកតា ដំណាំល្ង១ហិកតា អំពៅ៣ហិកតា និងឈូក៣០ហិកតា។
ដោយឡែកសំរាប់ការនាំស្រូវចេញទៅក្រៅប្រទេសវិញ គិតចាប់ពីថ្ងៃទី២២ ខែឧសភា ដល់ថ្ងៃទី០៥ ខែធ្នូ២០២០ ខេត្តព្រៃវែងនាំស្រូវចេញទៅប្រទេសវៀតណាម សរុបបានចំនួន ៧១៩,៦៩៣តោន ក្នុងនោះតម្លៃស្រូវ IR504 លក់បាន ១,០៤០រៀលក្នុង១គីឡូក្រាម ស្រូវ OM5451 តម្លៃ១,០០០រៀល ស្រូវចម្រុះបានតម្លៃ១,០៦០រៀល និងស្រូវផ្ការំដួលបានតម្លៃ១,១៥០រៀលក្នុង១គីឡូក្រាម៕
ចែករំលែកព័តមាននេះ