ខេត្តស្វាយរៀង ៖ ឈ្មួញដឹកទំនិញចេញចូលតាមច្រកទ្វារព្រំដែនទ្វេភាគីបុសមនត្អូញត្អែចោទថា មានកុងត្រូលជជុះជាច្រើនកន្លែងដាក់បណ្តាក់គ្នាដូចខ្យងឈរចាំយកលុយពីអ្នកបើករថយន្តដឹកទំនិញតូចធំ និងម៉ូតូរ៉ឺម៉កមិនដឹងថាមកពីស្ថាបន័ណាខ្លះទេ ជួយមើលផងទាន ! គឺចាប់ពីច្រកទ្វារព្រំដែនបុសមនមកដល់កែងផ្លូវជាតិលេខ១៣ មាន៤ទៅ៥កន្លែង ហើយមហាជនមានការព្រួយបារម្ភខ្លាចចម្លងមេរោគកូវីដ-១៩ មកសហគមន៍ ប្រសិនបើអ្នកទាំងនោះមិនបានអនុវត្តតាមវិធានការណ៍ការពារ ឬអនាម័យឲ្យបានត្រឹមត្រូវតាមការណែនាំរបស់ក្រសួងសុខាភិបាល។
ករណីត្អូញត្អែនេះកើតឡើងនៅព្រឹកថ្ងៃទី៨ ធ្នូ ២០២០នៅច្រកទ្វារព្រំដែនទ្វេភាគីបុសមន ឃុំបុសមន ស្រុករំដួល។ បើតាមមន្ត្រីម្នាក់ធ្វើការនៅច្រកទ្វារព្រំដែនទ្វេភាគីបុសមនសុំមិនបញ្ចេញឈ្មោះបានឲ្យដឹងថា ចាប់តាំងពីមានវិបត្តិកូវីដ-១៩ មកច្រកទ្វារតំបន់ព្រំដែនក្នុងខេត្តស្វាយរៀងត្រូវបានផ្អាកមិនអនុញ្ញាតឲ្យមានមនុស្ស និងនាំទំនិញចេញចូលពីប្រទេសវៀតណាម។
បន្លែផ្លែឈើ បន្លែនាំចូលមាន ស្ពៃក្តោប ស្ពៃបូកគោ ផ្កាខាត់ណា ការ៉ុត ដំឡូងបារាំង ខ្ទឹមស ខ្ទឹមក្រហម។ ផ្លែឈើមាន ប៉ោម សារី មៀន ក្រូច ដូង។ ទំនិញនាំចូលពីប្រទេសវៀតណាម ជាមធ្យមក្នុងមួយថ្ងៃចាប់ពី៣៦គ្រឿងទៅ៥០គ្រឿងក្នុងនោះបន្លែផ្លែឈើ មាន២០ទៅ២៥គ្រឿងក្នុងមួយថ្ងៃ ដឹកទៅលក់នៅរាជធានីភ្នំពេញ និងមានចែកចាយក្នុងខេត្តស្វាយរៀងព្រៃវែងផងដែរ។
ទាក់ទិនការនាំបន្លែផ្លែឈើ ពីប្រទេសវៀតណាមនេះដែរ លោក ផឹង និល ប្រធានសាខាការពារអ្នកប្រើប្រាស់កិច្ចការប្រកួតប្រជែង និងការបង្ក្រាបការក្លែងបន្លំ សាខាខេត្តស្វាយរៀង ហៅកាត់ថា ក.ប.ប បានមានប្រសាសន៍ថា បញ្ហាការនាំទំនិញ បន្លែ ផ្លែឈើ និងផលិតផលចំណីអាហារដែលនាំចូលពីប្រទេសជិតខាងគឺពិបាកគ្រប់គ្រងដោយ សមត្ថកិច្ចរបស់ក.ប.ប គឺគ្មានសិទ្ធិក្នុងការចុះត្រួតពិត្យទំនិញនៅតាមច្រកទ្វារព្រំដែនទេ ដូច្នេះអ្នកនាំចូលគេមិនបានគិតដល់បញ្ហាប៉ះពាល់ដល់សុខភាពនោះទេ ជាពិសេសខ្ទឹមស នាំចូលរាប់តោន បែបនេះដោយគ្មានការត្រួតពិនិត្យឲ្យបានត្រឹមត្រូវគឺប្រឈមយ៉ាងខ្លាំងទៅលើសុខភាពអ្នកបរិភោគ។
ដោយខ្ទឹមស ឈ្មួញដឹកជញ្ជូនផ្លូវឆ្ងាយ គេតែងតែដាក់ថ្នាំ រក្សាទុកឲ្យបានយូរ ការពារកុំឲ្យខ្ទឹមឆាប់ខូចដូច្នេះធ្វើឲ្យប៉ះពាល់ដល់សុខភាពអ្នកបរិភោគ គឺប៉ះពាល់ ក្រពះពោះវៀន ចុះខ្សោយ និងរលាកធ្ងន់ធ្ងរចាំបាច់ត្រូវការត្រួតពិនិត្យ។ ពីព្រោះសុវត្ថិភាពសុខភាពសាធារណៈសំខាន់ណាស់ត្រូវតែការពារទប់ស្កាត់ និងបង្ក្រាបទំនិញដែលមានសារធាតុគីមី ការពារអ្នកប្រើប្រាស់។ ទោះបីជាយ៉ាងណាក៏ដោយមហាជនសូមអំពាវនាវសូមឲ្យអាជ្ញាធរមានសមត្ថកិច្ចមេត្តាចុះពិនិត្យករណីខាងលើនេះផង៕ ដោយ ៖ វ៉ាន់ ប៊ុនធឿន
ចែករំលែកព័តមាននេះ