រាជធានីភ្នំពេញ ៖ នារីម្នាក់បានចាញ់បោកជាមិត្តភក្តិ ដោយហៅតាមទូរស័ព្ទមកពីខេត្តកំពង់ស្ពឺប្រាប់ថា ឱ្យមកលេងភ្នំពេញ លុះមកដល់បាត់មិនឃើញមកទទួល ក៏បានដើរវង្វេងផ្លូវ ត្រូវបានលោកមេប៉ុស្តិ៍នគរបាលទំនប់ទឹកជួយសង្គ្រោះ និងផ្តល់ប្រាក់ ដើម្បីត្រឡប់ទៅកាន់ស្រុកកំណើតវិញផងដែរ ។
ករណីនេះ បង្កឱ្យមានការភ្ញាក់ផ្អើលកើតឡើងកាលពីវេលាម៉ោង១២ និង១៥នាទីថ្ងៃទី១៨ មិថុនា ២០១៥ ស្ថិតនៅខាងមុខសណ្ឋាគារម៉ារ៉ាឌី ក្បែរគល់ស្ពានអាកាសស្ទឹងមានជ័យ លើផ្លូវព្រះមុនីរ៉េត ក្នុងសង្កាត់ទំនប់ទឹក ខណ្ឌចំការមន ។
តាមប្រភពពីនគរបាលឱ្យដឹងថា នារីដែលដើរវង្វេងផ្លូវនេះមានឈ្មោះទី លី អាយុ១៩ឆ្នាំ ជាអ្នកលក់ចាប់ហួយ មានទីលំនៅក្នុងភូមិត្រពាំងថ្ម ឃុំសេនសាន ស្រុកឧត្តដុង្គ ខេត្តកំពង់ស្ពឺ ត្រូវប្រជាពលរដ្ឋប្រទះឃើញដើរវង្វេងផ្លូវតែម្នាក់ឯង ហើយបានរាយការណ៍មកកាន់កម្លាំងនគរបាលប៉ុស្តិ៍ទំនប់ទឹកឱ្យមកទទួលយក ។
មុនពេលមានការភ្ញាក់ផ្អើលនេះ នារីវ័យក្មេងរងគ្រោះបានធ្វើដំណើរតាមរថយន្តឈ្នួលមួយគ្រឿង ចេញពីផ្ទះទៅតាមការណាត់ជួបហៅតាមទូរស័ព្ទដៃពីនារីម្នាក់ឈ្មោះនី អាយុ២០ឆ្នាំ ដែលជាមិត្តភក្តិធ្លាប់ស្នាក់នៅក្នុងអង្គការជាមួយគ្នា ដោយបានប្រាប់ថា ឱ្យមកលេងភ្នំពេញ ។
តាមប្រភពដដែលបន្តថា លុះព្រឹកឡើងកាលពីវេលាម៉ោងជាង៦ព្រឹក នាងក៏មកដល់ចំណតផ្សារដើមគរទៅតាមការណាត់ ហើយក៏មានម៉ូតូឌុបមួយគ្រឿង ដឹកយកទៅដាក់មុខវត្តស្ទឹងមានជ័យ ហើយក៏បានឃើញស្ត្រីជាមិត្តភក្តិរូបនោះ បានជិះម៉ូតូជាមួយនឹងបុរសម្នាក់ មកអើតមើលបន្តិច ក៏ជិះម៉ូតូចេញទៅវិញបាត់ ដោយមិនបាននិយាយអ្វីជាមួយនាងឡើយ ។ ដោយរង់ចាំអស់ជាច្រើនម៉ោងមិនឃើញមកទទួលនាង ហើយទូរស័ព្ទក៏ហៅលែងចូល នាងក៏ចេះតែដើរៗទាំងមិនស្គាល់ផ្លូវសួរគេសួរឯង ក៏ត្រូវប្រជាពលរដ្ឋរាយការណ៍ប្រាប់កម្លាំងនគរបាលមូលដ្ឋាននាំខ្លួនទៅកាន់ប៉ុស្តិ៍នគរបាលទំនប់ទឹកតែម្តង ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ