ខេត្តរតនគិរី ៖ បុរសម្នាក់ឈ្មោះ សុខ ឡាយ ដែលអះអាងថាខ្លួនបម្រើការងារនៅក្នុងអគ្គបញ្ជាការដ្ឋានកងទ័ពជើងគោកទទួលបន្ទុកផ្នែកព័ត៌មាន កំពុងដើររើសទ័ពក្រៅក្របខណ្ឌ ធ្វើឲ្យប្រជាពលរដ្ឋមួយចំនួនក្នុងខេត្តរតនគិរីចាញ់បោកអស់លុយជាច្រើន ។
ជាក់ស្តែងបុរសម្នាក់ដែលអះអាងថាជាជនរងគ្រោះឈ្មោះ តុង ហាន រស់នៅក្នុងភូមិ-ឃុំ-ស្រុកអូរជុំ បានឲ្យដឹងថា ខ្លួន(តុង ហាន) បានត្រូវឈ្មោះ សុខ ឡាយ បង្គាប់ឲ្យយកលុយ១៥០០ដុល្លារជាថ្នូរនឹងការបានចូលបម្រើការងារនៅក្នុងអគ្គបញ្ជាការដ្ឋានកងទ័ពជើងគោកក្រសួងការពារជាតិ ប៉ុន្តែជនសង្ស័យបានឲ្យកក់លុយមុនចំនួន៦០០ដុល្លារអាមេរិក ។
បើតាមអ្នកឆ្លើយឆ្លងព័ត៌មានកោះសន្តិភាពបានស្រង់សម្តីជនរងគ្រោះបញ្ជាក់ឲ្យដឹងនៅរសៀលថ្ងៃទី១០ មិថុនា ២០១៥ថា ចាប់តំាងពីបង់លុយកក់៦០០ដុល្លារឲ្យទៅឈ្មោះ សុខ ឡាយ នោះរួចមក មកដល់ពេលនេះមានរយៈពេល៥ទៅ៦ខែហើយ មិនទាន់បានទទួលព័ត៌មានអ្វីបន្តិចឡើយពីជនសង្ស័យ ។
ជនរងគ្រោះក៍បានអំពាវនាវឲ្យប្រជាពលរដ្ឋនៅខេត្តរតនគិរីទំាងអស់បើបានទទួលព័ត៌មានខាងលើនេះហើយ សូមមានការប្រុងប្រយ័ត្ននិងស្នើឲ្យអាជ្ញាធរពាក់ព័ន្ឋចាត់វិធានការលើឈ្មោះ សុខ ឡាយនេះជាបន្ទាន់កុំឲ្យមានពលរដ្ឋចាញ់បោកបុគ្គលនេះទៀត ។
ជាមួយគ្នានេះដែរឈ្មោះ តុង ហាន ដែលអះអាងថាជាជនរងគ្រោះក្នុងរឿងឆបោកនេះ ក៍ត្រៀមប្តឹងទៅលោកនាយឧត្តមសេនីយ៍ មាស សុភា អគ្គមេបញ្ជាការរងនៃកងយោធពលខេមរភូមិន្ទ និង ជាមេបញ្ជាការកងទ័ពជើងគោកក្រសួងការពារជាតិផងដែរ ។
យ៉ាងណាក៍ដោយនៅរសៀលថ្ងៃពុធដដែលនេះ កោះសន្តិភាពមិនអាចរកការសុំបំភ្លឺបានទេពីឈ្មោះ សុខ ឡាយ ជុំវិញការចោទប្រកាន់ខាងលើ ៕
ចែករំលែកព័តមាននេះ