ខេត្តបន្ទាយមានជ័យ ៖ ក្រុមអ្នកភូមិបានមានប្រតិកម្មតវ៉ាចំពោះការសាងសង់ស្ថានីយថ្លឹងរថយន្ត ក្រោយពីមន្ត្រីជំនាញចុះសិក្សាគម្រោងសាងសង់ប៉ះពាល់ដល់ប្រជាពលរដ្ឋចំនួន៦០គ្រួសារ ។ ការតវ៉ានេះ បានធ្វើឡើងកាលពីថ្ងៃទី២៤ ខែវិច្ឆិកា ឆ្នាំ២០២០ នៅភូមិកូនដំរី សង្កាត់និមិត្ត ក្រុងប៉ោយប៉ែត ។
ក្រុមអ្នកភូមិទាំងនោះនិយាយថា មូលហេតុដែលពួកគាត់ធ្វើការតវ៉ាចំពោះគម្រោងកសាងស្ថានីយថ្លឹងរថយន្តថ្មីនេះ ព្រោះបានប៉ះពាល់ដល់ប្រជាពលរដ្ឋចំនួន៦០គ្រួសារ ដែលកំពុងរស់នៅសងខាងផ្លូវជាតិលេខ៥ ក្នុងភូមិកូនដំរី សង្កាត់និមិត្ត ក្រុងប៉ោយប៉ែត គឺប៉ះពាល់ដល់ការរស់នៅនិងប្រកបមុខរបរបស់ពួកគាត់ដែលមានផ្ទះថ្ម និងដំណាំកសិកម្ម ហើយក៏ជាដីមានកម្មសិទ្ធិស្របច្បាប់ ។
ក្រុមអ្នកភូមិទាំងនោះនិយាយទៀតថា នៅអំឡុងសប្តាហ៍នេះ មានមន្ត្រីជំនាញនិងអាជ្ញាធរមូលដ្ឋានចុះមកវាស់វែងសិក្សាគម្រោងកសាងស្ថានីយថ្លឹងរថយន្តថ្មី ដែលការវាស់វែងបានប៉ះពាល់ដល់អ្នកភូមិដែលរស់នៅតាមដងផ្លូវចំនួន៦០គ្រួសារ ។ ហេតុនេះហើយ ទើបពួកគាត់នាំគ្នាតវ៉ាមិនឱ្យកសាងលើគម្រោងថ្មីនេះដោយសារប៉ះផ្ទះសម្បែងពួកគាត់និងការរស់នៅ ហើយស្ថានីយថ្លឹងរថយន្តចាស់កំពុងដំណើរការមានរួចហើយនៅខាងកើតគម្រោងថ្មីប្រមាណជាង១គីឡូម៉ែត្រ។
លោក សុក ចាន់ថា ប្រធានមន្ទីរសាធារណការនិងដឹកជញ្ជូនខេត្ត ថ្លែងថា គម្រោងកសាងស្ថានីយថ្លឹងរថយន្តថ្មី នៅខាងលិចស្ថានីយថ្លឹងរថយន្តចាស់ប្រមាណជាង១គីឡូម៉ែត្រនេះ គឺមន្ត្រីជំនាញសហការជាមួយអាជ្ញាធរមូលដ្ឋានបានចុះសិក្សាជំហានដំបូងពីផលប៉ះពាល់ ។ គម្រោងកសាងស្ថានីយថ្លឹងរថយន្តថ្មីនេះ ជាប្រភេទផ្លូវ២ខ្សែទៅមក ដោយដាក់នៅកន្លែងទូលាយតាមលក្ខណៈបច្ចេកទេស ព្រោះស្ថានីយថ្លឹងរថយន្តចាស់នៅខាងកើតគ្នានោះតូចចង្អៀត ទើបក្រសួងឱ្យសិក្សាគម្រោងកសាងស្ថានីយថ្លឹងរថយន្តថ្មីនេះ ៕
ចែករំលែកព័តមាននេះ