ខេត្តស្វាយរៀង ៖ លោកស្រី រាជ្យ សារី ក្រុមប្រឹក្សាភិបាលសហគមន៍ផ្គត់ផ្គង់កសិផលស្វាយរៀង ហៅកាត់ថា សាក់(SAC)តំណាងឲ្យសមាជិកសហគមន៍អ្នកដាំបន្លែសុវត្ថិភាព ដែលជាបន្លែសរីរាង ចំនួន៣០០គ្រួសារ នៅខេត្តស្វាយរៀងបានសំណូមពរសូមឲ្យរាជរដ្ឋាភិបាល ជាពិសេសសម្តេចតេជោ ហ៊ុនសែន មេត្តាជួយអន្តរាគមន៍ទៅក្រសួងសេដ្ឋកិច្ចហិរញ្ញវត្ថុលើកលែងការបង់ពន្ធ ដោយសហគមន៍ផ្គត់ផ្គង់កសិផលស្វាយរៀង ជួបបញ្ហាខាតទុនជាប់គ្នា២ឆ្នាំមកហើយ។
ក្នុង១ឆ្នាំខាតដើមទុន៥ទៅ៦លានរៀល គឺបង់ប៉ាតង់១ឆ្នាំ១,២០០,០០០រៀល និងបង់ពន្ធប្រចាំខែលើការលក់កសិផល(បន្លែ)ដែលលក់ចេញទាំងដុលត្រូបង់ពន្ធចំនួន០១ភាគរយ ដូច្នេះក្នុង១ខែត្រូវខាតដើមទុន៣៥០,០០០រៀលទៅ៤០០,០០០រៀល ហើយបើនៅតែបង់ពន្ធបែបនេះសហគមន៍ និងដួលក្ស័យទុនជាក់ជាមិនខាន។លោកស្រី រាជ្យ សារី មានប្រសាន៍បែបនេះ នារសៀលថ្ងៃទី៥ វិច្ឆិកា ២០២០ នៅមជ្ឈមណ្ឌលប្រមូលផ្តុំកសិផលស្វាយរៀងស្ថិតនៅភូមិភ្នៅឃុំតាសួស ស្រុកស្វាយជ្រំ ខេត្តស្វាយរៀង។
លោកស្រី រាជ្យ សារី បានប្រាប់កោះសន្តិភាពថា សហគមន៍ផ្គត់ផ្គង់កសិផលស្វាយរៀង ហៅថា សាក់ បានបង្កើតឡើងនៅថ្ងៃទី២៣ ខែវិច្ឆិកា ឆ្នាំ២០១១ ដោយមានការគាំទ្រពីមន្ទីរកសិកម្មរុក្ខាប្រមាញ់ និងនេសាទខេត្ត អង្គការJICA ជប៉ុន និងមានការគាំទ្រពីក្រសួងកសិកម្មផងដែរ។ SAC មានគណៈកម្មការចំនួន០៦រូបស្រី៤រូប និងក្រុមប្រឹក្សាភិបាលចំនួន៧រូបស្រី៥រូប។ មានសមាជិកចំនួន៣០០គ្រួសារ ដែលប្រកបមុខរបរកសិកម្ម ដាំបន្លែសុវត្ថិភាព តាមគោលការណ៍ធម្មជាតិសរីរាង្គ ដោយដាំជាលក្ខណៈគ្រួសារ តាមទំហំដីរៀងខ្លួន។ ហើយបង្កើតជាក្រុមតាមភូមិ១ក្រុមមានតំណាងម្នាក់ជាអ្នកប្រមូលបន្លែពីសមាជិកដឹកមកមជ្ឈមណ្ឌល អ្នកបច្ចេកទេសកសិកម្មនៃសហគមន៍ បានរៀបចំផែនការដាំបន្លែ បណ្តេញ កុំឲ្យជាន់គ្នា គឺធានាផ្គត់ផ្គង់បន្លែតាមតម្រូវការថ្ងៃដែលម៉ូយបញ្ជាទិញ។
តម្លៃបន្លែសរីរាង មានប្រភេទផ្លែត្រសក់១គីឡូ ២,៥០០រៀល ទៅ៣,០០០រៀល ពេលមានប្រទេសជិតខាងនាំចូលច្រើនចុះតម្លៃដល់២,០០០រៀល។ ត្រឡាច១គីឡូ ២,០០០រៀល សណ្តែកកួរ ១គីឡូ ៤,៥០០រៀល។ ប្រភេទស្លឹកផ្ទី ជន្លង់១គីឡូ២,២០០រៀល ស្ពៃខៀវ ស្ពៃចង្កឹះ ១គីឡូ៤,០០០រៀល ស្ពៃក្រញ៉ាញ់១គីឡូ៣,០០០រៀលទៅ៥,០០០រៀល ខាត់ណា ១គីឡូ៦,៥០០រៀល ត្រកួន ១គីឡូ២,០០០រៀល កញ្ឆែត ១គីឡូ៤,០០០រៀល ជីគ្រប់មុខ១គីឡូ៤,០០០រៀល ស្លឹកគ្រៃ២,០០០រៀល។ លោកស្រីបន្តទៀតថា សហគមន៍ផ្គត់ផ្គង់កសិផលស្វាយរៀងបានដំណើការពីខែវិច្ឆិកា២០១១មក មុនដំបូងមានចុះកិច្ចព្រមព្រៀងផ្គត់ផ្គង់បន្លែជាមួយកាស៊ីណូឡាស្វីហ្គាស់សាន់ក្រុងបាវិតដល់ឆ្នាំ២០១២ សាក់បានពង្រីកខ្លួន បានចុះកិច្ចព្រមព្រៀងជាមួយផ្សារអ៊ីអន នៅរាជធានីភ្នំពេញ មាន០៤សាខា និងហាងលក់បន្លែសុវត្ថិភាពចំនួន៣តូបទៀតគឺបានជោគជ័យធ្វើឲ្យសមាជិក៣០០គ្រួសារមានជីវភាពល្អប្រសើរ។
ក៏ប៉ុន្តែមកដល់ឆ្នាំ២០១៨ -២០១៩ មានបញ្ហាប្រឈម និងចាប់ខាតដើមទុនដោយមានឈ្មួញនាំបន្លែពីប្រទេសជិតខាងចូលច្រើន គ្នានការបង់ពន្ធនាំចូល ធ្វើឲ្យតម្លៃបន្លែនៅលើទីផ្សារក្នុងស្រុកធ្លាក់ថ្លៃ ពិបាកក្នុងការប្រកួតប្រជែងទីផ្សារ បន្លែសុវត្ថិភាព បន្លែសរីរាង ត្រូវរៀបចំថ្នាល រោងសុវត្ថិភាព ត្រូវចំណាយប្រាក់ក្នុង១រោង៥,០០០ដុល្លារ កសិករត្រូវខ្ចីប្រាក់ពីធនាគារឯកជនមកដើម្បីរៀបចំរោងសុវត្ថិភាពតាមស្តង់ដាបច្ចេកទេស រៀបប្រពន្ធទឹក រៀបចំរោងជីកំប៉ុស្តិ៍ធម្មជាតិ។ ហើយបើដាំស្ពៃត្រូវប្រើរយៈពេល២៧ថ្ងៃទៅ៣០ថ្ងៃទើបប្រមូលផល សហគមន៍ប្រឈមក្នុងការប្រកួតប្រជែងទីផ្សារ។ អ្នកបរិភោគ មិនទាន់យល់ដឹងអំពីគុណប្រយោជន៍ នៃការបរិភោគបន្លែសុវត្ថិភាព បន្លែសរីរាង្គ បន្លែសុវត្ថិភាព គឺដាំក្នុងរោងសុវត្ថិភាព គ្របស្បៃមុងលីឡុង ប្រើប្រើសពូជ ជីធម្មជាតិ ជីសរីរាង្គ គ្មានការប្រើជីគីមី និងគ្មានថ្នាំពុល ធ្វើឲ្យសុខភាពអ្នកបរិភោគល្អប្រសើរ។
រីឯបន្លែដែលឈ្មួញនាំចូលពីប្រទេសជិតខាង គឺគេប្រើជីគីមី និងថ្នាំពុលកសិកម្ម ជាពិសេសការដាក់បូរ៉ាក់កសិកម្មការពារសម្រស់បន្លែ ដែលធ្វើឲ្យប៉ះពាល់ដល់សុខភាពអ្នកបរិភោគធ្ងន់ធ្ងរ ក៏ប៉ុន្តែឈ្មួញនាំចូលលក់តម្លៃថោក ប្រជាជនងាកទៅទិញបន្លែដែលគ្មានសុវត្ថិភាព។ លោកស្រីបានបញ្ជាក់ថា បើសមត្ថកិច្ច និងអាជ្ញាធរគ្រប់គ្រងទីផ្សារកសិកម្មមិនបានល្អបណ្តោយឲ្យឈ្មួញនាំចូលបន្លែគ្មានសុវត្ថិភាព ធ្វើឲ្យបន្លែសុវត្ថិភាពសហគមន៍ខ្វះទីផ្សារ និងដួលនៅពេលខាងមុខនេះ។ប្រជាសហគមន៍៣០០គ្រួសារអំពាវនាវសុំឲ្យរាជរដ្ឋាភិបាលមេត្តាជួយគាំទ្រ និងផ្តល់ទុនសម្រាប់ប្រកបមុខរបរកសិកម្ម និងបានចូលរួមអនុវត្តគោលនយោបាយភូមិមួយផលិតផលមួយឲ្យមានប្រសិទ្ធិភាព និងនិរន្តរភាព។ សូមលើកលែងដល់ការបង់ពន្ធ លើការលក់កសិផល របស់សហគមន៍ផ្គត់ផ្គង់កសិផលស្វាយរៀងនៅពេលកំពុងជួបវិត្តកូវីដ-១៩នេះដោយអនុគ្រោះ៕ ដោយ ៖ វ៉ាន់ ប៊ុនធឿន
ចែករំលែកព័តមាននេះ