ខេត្តបន្ទាយមានជ័យ ៖ បុរសជាជនជាតិថៃចំនួន២នាក់បានបើកត្រាក់ទ័រដឹកស្មៅក្បែរព្រំដែន ស្រាប់តែកិនចំមីនតោន បណ្តាលឱ្យផ្ទុះបាត់បង់ជីវិតទាំងពីរនាក់ ។
ហេតុការណ៍ខាងលើនេះបានកើតឡើងកាលពីវេលាម៉ោង១និង៥២នាទីរសៀលថ្ងៃទី២៧ ខែតុលា ឆ្នាំ២០២០ នៅចំណុចព្រំដែនត្រង់បង្គោលឡាក់លេខ៤៣ ត្រង់ចំណុចTA.៥៤៧.២៧៤ ដែលឈមនឹងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
បុរសដែលបាត់បង់ជីវិតទាំង២នាក់ខាងលើនេះមិនស្គាល់អត្តសញ្ញាណនោះទេ គ្រាន់តែដឹងថាជាជនជាតិថៃទាំង២នាក់ ។
លោកវរសេនីយ៍ឯក សេស វិបុល អធិការនគរបាលស្រុកអូរជ្រៅបានប្រាប់ថា មុនពេលកើតហេតុ មានបុរសជាជនជាតិថៃចំនួន២នាក់ ដោយបុរសម្នាក់ជាអ្នកបើកត្រាក់ទ័រ ចំណែកម្នាក់ទៀតជាអ្នករួមដំណើរ ក្រោយពេលត្រឡប់ពីច្រូតស្មៅវិញ ក៏ដឹកស្មៅតាមត្រាក់ទ័រ ធ្វើដំណើរតាមបន្ទាត់ព្រំដែនសត្រង់ចំណុចកើតហេតុខាងលើ ស្រាប់តែកិនចំមីនតោនផ្ទុះ បណ្តាលឱ្យបាត់បង់ជីវិតទាំង២នាក់ភ្លាមៗនៅនឹងកន្លែងកើតហេតុ ដោយជនរងគ្រោះដាច់សាច់ជាចំរៀកៗ ដាច់ដៃដាច់ជើង ដោយឡែកត្រាក់ទ័រ១គ្រឿងបានដាច់ជាពីរ ។
លោកអធិការនគរបាលស្រុកអូរច្រៅបានបញ្ជាក់ថា ក្រោយពេលមានករណីជនជាតិថៃ២នាក់ជួបគ្រោះថ្នាក់បាត់បង់ជីវិតដោយសារផ្ទុះមីនតោនរួចមក គេឃើញកងកម្លាំងសមត្តកិច្ចភាគីថៃបានចុះមកពិនិត្យ ហើយនាំយកសពជនរងគ្រោះទាំង២នាក់ ព្រមទាំងត្រាក់ទ័រចូលក្នុងទឹកដីថៃវិញ៕ (កែសម្រួលដោយ ៖ ធីតា)
ចែករំលែកព័តមាននេះ