នៅព្រឹកថ្ងៃទី១២ ឧសភា នេះ នៅគណៈកម្មាធិការជាតិអូឡាំពិកម្ពុជា បានរៀបចំពិធីសំណេះសំណាល ក៏ដូចជាពិធីចុះអនុស្សរណៈរវាងស្រាបៀរអង្គរ និងគណៈកម្មាធិការជាតិអូឡាំពិកម្ពុជា
នៅព្រឹកថ្ងៃទី១២ ឧសភា នេះ នៅគណៈកម្មាធិការជាតិអូឡាំពិកម្ពុជា បានរៀបចំពិធីសំណេះសំណាល ក៏ដូចជាពិធីចុះអនុស្សរណៈរវាងស្រាបៀរអង្គរ និងគណៈកម្មាធិការជាតិអូឡាំពិកម្ពុជា ដើម្បីសម្តែងកិច្ចគាំទ្រ ចំពោះអត្តពលិកជម្រើសជាតិដែលនឹងទៅប្រកួតតំណាងប្រទេសកម្ពុជាយើង នាកីឡាអាស៊ីហ្គេមលើកទី២៨ ប្រទេសសិង្ហបុរី ខាងមុខនេះ។
ដូចដែលលោក លោកជំទាវ អ្នកឧកញ្ញា លោក លោកស្រី អ្នកនាង កញ្ញា ជ្រាបហើយថា ស្រាបៀរអង្គរមានប្រវត្តិគាំទ្រវិស័យកីឡាជាតិចាប់តាំងតែពីពេលដែលរោងចក្រស្រាបៀរអង្គរបានចាប់ផ្តើមដំណើរការ កាលពី៥០ឆ្នាំមុនម្ល៉េះ។ នៅរយៈពេលប៉ុន្មានឆ្នាំកន្លងមកនេះ ស្រាបៀរអង្គរបានចូលរួមសហការជាមួយ NOCC ក្នុងការឧបត្ថម្ភលើកទឹកចិត្តកីឡារជម្រើសជាតិយើង។ ជាក់ស្តែងក្នុងឆ្នាំ២០១១ ស្រាបៀរអង្គរបានជួយឧបត្ថម្ភអត្តពលិកជាតិចូលរួមប្រកួតកីឡាស៊ីហ្គេមលើកទី២៦ប្រទេសឥណ្ឌូណេស៊ី ។ បន្ទាប់មកទៀត ស្រាបៀរអង្គរក៏បានចូលរួមឧបត្ថម្ភឲ្យក្រុមកីឡាករជម្រើសជាតិកម្ពុជាទៅចូលរួមប្រកួតកីឡាអូឡាំពិកទីក្រុងឡុង ក្នុងឆ្នាំ២០១២។ នៅឆ្នាំ២០១៣ ស្រាបៀរអង្គរក៏បានចូលរួមឧបត្ថម្ភលើកទឹកចិត្តអត្តពលិកជម្រើសជាតិទៅប្រកួតកីឡាស៊ីហ្គេមលើកទី២៧ ប្រទេសមីយ៉ាន់ម៉ា ជាបន្តទៀត។ ហើយនៅឆ្នាំ២០១៤ ស្រាបៀរអង្គរ តាមរយៈគណៈកម្មាធិការជាតិអូឡាំពិកម្ពុជា បានជួយឧបត្ថម្ភកីឡាករទៅចូលរួមប្រកួតកីឡាអាស៊ី លើកទី១៧ ដែលជាព្រឹតិ្តការណ៍មួយធ្វើឲ្យខ្មែរគ្រប់រូបចងចាំមិនភ្លេច។
ជ័យជំនះមេដាយមាសរបស់ សន សៀវមី គឺជាផ្លែផ្កានៃការខិតខំហ្វឹកហាត់ និងការតាំងចិត្តយ៉ាងខ្ជាប់ខ្ជួនអស់រយៈពេលជាច្រើនឆ្នាំ ។ នាងគឺជាយុវនារីខ្មែរគំរូម្នាក់ គួរឲ្យស្ងើចសរសើរ នាងបានបញ្ជាក់ថា អ្វីៗពិតជាអាចសម្រេចទៅបានឲ្យតែយើងមានឆន្ទៈពិតប្រាកដ ពោលគឺគ្មានអ្នកណាម្នាក់អាចបញ្ឈប់អ្នកក្នុងការសម្រេចក្តីសុបិនរបស់អ្នកបានឡើយ។
ឆ្នាំនេះ ស្រាបៀរអង្គរមានមោទនភាពជាថ្មីម្តងទៀត ក្នុងការចូលរួមសហការជាមួយ NOCC ក្នុងការឧបត្ថម្ភអត្តពលិកជាតិឲ្យទៅប្រកួតស៊ីហ្គេមលើកទី ២៨ ប្រទសសិង្ហបុរី តំណាងឲ្យកម្ពុជាយើង។
ប្អូនៗ ក្មួយៗ អត្តពលិកជាទីស្រឡាញ់ ស្រាបៀរអង្គរមានមោទនភាពជាពន់ពេកដែលមានឱកាសជួយឧបត្ថម្ភអ្នកទាំងអស់គ្នា។ ស្រាបៀរអង្គរតែងតែមានក្តីសង្ឈឹមជានិច្ច ចំពោះអ្នកទាំងអស់គ្នា ហើយយើងខ្ញុំសូមប្តេជ្ញាចិត្តថា និងផ្តល់រង្វាន់លើកទឹកចិត្តចំពោះគ្រប់អត្តពលិកដែលត្រឡប់មកមាតុភូមិវិញជាមួយមេដាយ។
មេដាយជាឯកត្ដបុគ្គលិក ៖
មេដាយមាស ១គ្រឿង = USD6,000.00
មេដាយប្រាក់ ១គ្រឿង = USD3,000.00
មេដាយសំរិទ្ឋ ១គ្រឿង = USD1,000.00
មេដាយជាក្រុម ៖
មេដាយមាស ១គ្រឿង = USD8,000.00
មេដាយប្រាក់ ១គ្រឿង = USD5,000.00
មេដាយសំរិទ្ឋ ១គ្រឿង = USD3,000.00
មេដាយសំរាប់ក្រុមបាល់ទាត់ ៖
ឈ្នះមួយប្រកួត = USD2,000.00
ឈានដល់ពាក់កណ្ដាលផ្ដាច់ព័ត្រ = USD5,000.00
កីឡារបស់កម្ពុជាមានភាពល្អប្រសើរហើយយ៉ាងណាក្តី ក៏យើងនៅមានរឿងរ៉ាវជាច្រើនទៀតដែលត្រូវធ្វើ។ ដូច្នេះស្រាបៀរអង្គរប្តេជ្ញាចិត្តគាំទ្រ និងលើកទឹកចិត្តដល់អត្តពលិកជាតិ ដើម្បីជាកិច្ចតបស្នងចំពោះការខិតខំប្រឹងប្រែងរបស់ពួកគេ។ ដរាបណាមានអត្តពលិកដែលប្រឹងប្រែងប្តូផ្តាច់ចំពោះប្រទេសជាតិ ស្រាបៀរអង្គរនឹងនៅតែគាំទ្រពួកគេជាបន្តទៀត។
ក្នុងនាមជាស្រាបៀរជាតិ យើងមានមោទនភាពចំពោះសមិទ្ធផលកីឡានានា ដែលជាតិយើងទទួលបាន។ ជាងនេះទៅទៀត ស្រាបៀរអង្គរជឿជាក់ថា ខ្លួនមានតួនាទីក្នុងការជួយជំរុញឲ្យខ្មែរគ្រប់ៗរូប សម្រេចក្តីសុបិនរបស់ខ្លួន។ យើងបានចាប់ផ្តើមកិច្ចការនេះ អស់រយៈពេល៥០ឆ្នាំមកហើយ ហើយយើងនឹងបន្តកិច្ចការនេះជាបន្តទៀតនាពេលអនាគត។
សូមចូលរួមជាមួយស្រាបៀរអង្គរក្នុងការគាំទ្រអត្ថពលិកជាតិទៅដណ្តើមមេដាយមាសនៅសិង្ហបុរី មោទនភាពបេះដូងខ្មែរ ជាពិសេសសូមជូនពរឲ្យអត្តពលិកបេះដូងខ្មែរទាំងអស់ឲ្យទទួលបានជ័យជំនះត្រឡប់មកមាតុភូមិវិញ៕
ចែករំលែកព័តមាននេះ