ខេត្តកណ្តាល ៖ កាលពីវេលាម៉ោង៨និង៣០នាទីយប់ថ្ងៃទី២២ ខែតុលា ឆ្នាំ២០២០ មានបុរសម្នាក់មិនដឹងមានគំនុំរឿងអ្វី ឬមានបញ្ហាអ្វីទេ ស្រាប់តែចូលទៅក្នុងប៉ុស្តិ៍នគរបាលរដ្ឋបាលដើមឫស ស្ថិតនៅភូមិរលួស ឃុំដើមឫស ស្រុកកណ្ដាលស្ទឹង ខេត្តកណ្ដាល រួចស្រែកគំរាមថា «អញនឹងស.ម្លា.ប់ប៉ូលិសប៉ុស្តិ៍ចោលទាំងអស់»។
![](https://kohsantepheapdaily.com.kh/wp-content/images/2020/10/642e92efb79421734881b53e1e1b18b6-36.jpg)
យោងតាមរបាយការណ៍របស់ប៉ូលិសស្រុកកណ្តាលស្ទឹងបានអោយដឹងថា ជនសង្ស័យឈ្មោះ ខាត់ សុខា ភេទប្រុស អាយុ៣២ឆ្នាំ មុខរបរមិនពិតប្រាកដ មានផ្ទុកសារធាតុញៀនផងដែរ ។
![](https://kohsantepheapdaily.com.kh/wp-content/images/2020/10/d9d4f495e875a2e075a1a4a6e1b9770f-41.jpg)
យោងតាមប្រភពខាងលើបានឱ្យដឹងថា នៅមុនពេលកើតហេតុ ជនសង្ស័យបានជិះម៉ូតូជាមួយមិត្តភក្តិម្នាក់ទៀតឈ្មោះ ឡុង មកឈប់នៅជិតប៉ុស្តិ៍នគរបាលរដ្ឋបាលឃុំដើមឫស រួចឈ្មោះ ឡុង បានជិះម៉ូតូចេញទៅបាត់ ។ ចំណែកជនសង្ស័យបានដើរសំដៅចូលទៅក្នុងប៉ុស្តិ៍ប៉ូលិស រួចស្រែកជេរឡូឡាថា «អញនឹងស.ម្លា.ប់ប៉ូលិសប៉ុស្តិ៍ចោលទាំងអស់» ។
![](https://kohsantepheapdaily.com.kh/wp-content/images/2020/10/c0c7c76d30bd3dcaefc96f40275bdc0a-50.jpg)
យោងតាមប្រភពដដែលបានបន្តឱ្យដឹងបន្តថា ភ្លាមៗនោះ កម្លាំងប៉ុស្តិ៍នគរបាលបាលរដ្ឋបាលដើមឫស បានចេញមកសួរនាំ ហើយជនសង្ស័យបានស្រែកសួរថា «អាធារ៉ា មេប៉ុស្តិ៍វាទៅណា អញស.ម្លា.ប់វាចោល» រួចជនសង្ស័យក៏ស្ទុះទៅវាយកញ្ចក់ប៉ុស្តិ៍បែកអស់ចំនួន២ផ្ទាំង និងស្រែកថា នឹងស.ម្លា.ប់ប៉ូលិសអោយងាប់ទាំងអស់ ។
![](https://kohsantepheapdaily.com.kh/wp-content/images/2020/10/67c6a1e7ce56d3d6fa748ab6d9af3fd7-36.jpg)
ភ្លាមនោះ លោកនាយប៉ុស្តិ៍នគរបាលរដ្ឋឃុំដើមឫស បានធ្វើការឃាត់ខ្លួនជនសង្ស័យបញ្ជូនមកអធិការដ្ឋាននគរបាលស្រុកកណ្តាលស្ទឹងតែម្តង ដើម្បីកសាងសំណុំរឿងបន្តចាត់ការតាមនីតិវិធីច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ