ខេត្តកំពង់ឆ្នាំង ៖ ដោយពិនិត្យឃើញនូវករណីគ្រោះថ្នាក់ចរាចរណ៍ ដែលកើតឡើងដោយសារគោយន្តគ្មានភ្លើងបំភ្លឺ ឬចំណាំងផ្លាតពីខាងក្រោយកន្លងមក កាលពីវេលាព្រឹកថ្ងៃទី០៤ ឧសភា ២០១៥ នៅប៉ុស្តិ៍នគរបាលរដ្ឋបាលកំពង់ឆ្នាំង ដែលមានការចូលរួមពីអាជ្ញាធរ-ក្រុង-សង្កាត់ នគរបាលចរាចរណ៍ក្រុង បានកោះហៅប្រជាពលរដ្ឋជាម្ចាស់គោយន្តម្ចាស់គោយន្តចំនួន២៥គ្រឿង នៅក្នុងសង្កាត់កំពង់ឆ្នាំង ធ្វើការផ្សព្វផ្សាយពីច្បាប់ចរាចរណ៍ផ្លូវគោក និងណែនាំឱ្យបំពាក់ចំណាំងផ្លាតពីក្រោយគោយន្តទាំងអស់ ដើម្បីទប់ស្កាត់គ្រោះថ្នាក់ចរាចរណ៍នៅពេលយប់ ដែលកើតឡើងពីការមើលមិនឃើញនេះ ។
លោក ហង្ស ប៊ុនហាក់ អធិការរងនគរបាលក្រុងកំពង់ឆ្នាំងទទួលបន្ទុកសណ្តាប់ធ្នាប់ បានអប់រំ និងផ្សព្វផ្សាយពីច្បាប់ចរាចរណ៍ផ្លូវគោក ដោយពន្យល់ឱ្យម្ចាស់គោយន្តទាំងអស់យល់អំពីហានិភ័យនៃការបើកបរគោយន្តពេលយប់នៅលើផ្លូវជាតិ ដែលគ្មានភ្លើងបំភ្លឺពីមុខ និងពិសេសគ្មានបំពាក់ចំណាំងផ្លាតពីក្រោយ។
លោកណែនាំទៀតថា ការចតគោយន្តនៅតាមផ្លូវជាតិ ឬផ្លូវលំត្រូវចតនៅកៀនចិញ្ចើមផ្លូវឱ្យផុតពីតួផ្លូវ ដែលយានយន្តធ្វើចរាចរណ៍ បើមិនចតដូចការណែនាំនេះទេ ពេលមានគ្រោះថ្នាក់ចរាចរណ៍កើតឡើង គឺយើងជាម្ចាស់គោយន្តជាអ្នកទទួលខុសត្រូវសងគេ និងមានទោសចំពោះមុខច្បាប់។
នៅក្នុងក្រុងកំពង់ឆ្នាំង មាន៤សង្កាត់ និងមានអ្នកប្រើប្រាស់គោយន្តប្រមាណ៩០គ្រឿង នៅពេលខាងមុខនេះ អាជ្ញាធរ និងសមត្ថកិច្ចក្រុងកំពង់ឆ្នាំង នឹងអញ្ជើញម្ចាស់គោយន្តទាំងអស់ មកផ្សព្វផ្សាយច្បាប់ចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ចរាចរណ៍ ដែលបណ្តាលមកពីការមិនយល់ច្បាប់ និងការបើកបរប្រើប្រាស់គោយន្តកែច្នៃ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ