ខេត្តប៉ៃលិន ៖ ប្រជាពលរដ្ឋចំនួន១៥គ្រួសារ ដែលសង់ផ្ទះនៅលើដីចំណីផ្លូវ នាំគ្នាដេកមិនលក់បក់មិនល្ហើយ ព្រួយបារម្ភពីសុវត្ថិភាព និងនាំគ្នាស្រែកទ្រហោយំ ដោយចោទអ្នកមានលុយមានដីចម្ការនៅខាងក្រោយផ្ទះរបស់ខ្លួន សង់ទំនប់ខ្ពស់ផុតដំបូលផ្ទះ លុះពេលភ្លៀងខ្លាំងម្តងៗ…
ខេត្តប៉ៃលិន ៖ ប្រជាពលរដ្ឋចំនួន១៥គ្រួសារ ដែលសង់ផ្ទះនៅលើដីចំណីផ្លូវ នាំគ្នាដេកមិនលក់បក់មិនល្ហើយ ព្រួយបារម្ភពីសុវត្ថិភាព និងនាំគ្នាស្រែកទ្រហោយំ ដោយចោទអ្នកមានលុយមានដីចម្ការនៅខាងក្រោយផ្ទះរបស់ខ្លួន សង់ទំនប់ខ្ពស់ផុតដំបូលផ្ទះ លុះពេលភ្លៀងខ្លាំងម្តងៗ គេយកគ្រឿងចក្រ បើកទំនប់ទឹក ដោយមានចេតនាពន្លិចលំនៅឋានរបស់ខ្លួន ដើម្បីឱ្យពួកគេរុះរើផ្ទះចេញ។ ចំណែកមេការ ដែលមើលការខុសត្រូវឱ្យថៅកែ អ្នកមាននោះ បានអះអាងថា ទឹកហូរបុកខ្លាំងបណ្តាលឱ្យលិចលង់ផ្ទះប្រជាពលរដ្ឋទាំងនោះ ដោយសារតែភ្លៀងខ្លាំងទប់អត់ជាប់។
ហេតុការណ៍ប្រជាពលរដ្ឋចោទអ្នកមានលុយ មានដីនៅក្បែរផ្ទះ មានចេតនាបើកទំនប់ទឹកឱ្យហូរលិចផ្ទះរបស់ខ្លួន បានកើតឡើងកាលពីវេលាម៉ោង១១ និង៣០នាទីព្រឹកថ្ងៃទី១១ ខែតុលា ឆ្នាំ២០២០ ស្ថិតនៅជាប់នឹងផ្លូវជាតិលេខ៥៧ ក្នុងភូមិទឹកចេញ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។ បើតាមប្រភពព័ត៌មានពីបុរសម្នាក់ ឈ្មោះ ដុំ ពៅ អាយុ៣០ឆ្នាំ ប្រពន្ធឈ្មោះ ពិន មីនា អាយុ២៨ឆ្នាំ រស់នៅភូមិខាងលើ បានរៀបរាប់ឱ្យដឹងថា ៖ ពួកគេមានការព្រួយបារម្ភយ៉ាងខ្លាំង ខណៈទឹកនៅលើទំនប់ដីអ្នកមានលុយម្នាក់ ឈ្មោះ សា ចំរើន ហៅអឿង អតីតប្រធានមន្ទីរពាណិជ្ជកម្មខេត្តប៉ៃលិន បានហូរចូលទៅក្នុងផ្ទះរបស់ខ្លួន អស់រយៈពេល២យប់មកហើយ ព្រោះគេបិទទំនប់ខាងក្រោមកន្លែងផ្សេង មិនឱ្យហូរចេញ ក៏ចាល់ហូរចូលមកផ្ទះរបស់ខ្លួននៅក្បែរផ្លូវជាតិតែម្តង។
ពួកគាត់មានការព្រួយបារម្ភខ្លាំងណាស់ ខណៈដេកយប់មិនលក់ឡើយ ព្រោះទំនប់ស្រះទឹករបស់អ្នកមានខាងលើ ខ្ពស់ជាងដំបូលផ្ទះរបស់ខ្លួន ហើយទឹកហូរពេញព្រៀបនៅលើខ្នងទំនប់ បើសិនជាភ្លៀងធ្លាក់កាន់តែខ្លាំង អាចនឹងហូរចូលទៅក្នុងផ្ទះរបស់ពួកគេ ជាពិសេសនៅពេលយប់ បើសិនជាកំពុងតែដេកលង់លក់នោះអាចនឹងមានគ្រោះថ្នាក់ដល់អាយុជីវិតខ្លួន និងកូនតូចៗ ជាក់ជាមិនខាន។ បើតាមសម្តីស្ត្រីម្នាក់ឈ្មោះ ទុំ ច្រិប អាយុ៥៣ឆ្នាំ ប្តីឈ្មោះ សូ គឿន អាយុ៥៣ឆ្នាំ បានរៀបរាប់ទាំងហូរទឹកភ្នែកឱ្យដឹងថា ៖ ពេលនេះមេការរបស់ថៅកែ ដែលមានដីនៅក្បែរផ្ទះរបស់គាត់ បានយកគ្រឿងចក្រទៅជីកកកាយដីទំបន់ទឹក បើកបង្ហូរឱ្យលិចលង់ផ្ទះរបស់ខ្លួន បណ្តាលឱ្យដាច់ដីគ្មានផ្លូវចូលទៅក្នុងផ្ទះនោះឡើយ។
គាត់មានការព្រួយបារម្ភចំពោះសុវត្ថិភាព ដោយសារតែទឹកហូរចូលទៅក្នុងផ្ទះរបស់ខ្លួន មានកម្ពស់ជាង១ម៉ែត្រ បណ្តាលឱ្យអណ្តែតសម្ភារឆ្នាំង ចាន អស់មួយចំនួន ហើយរាល់យប់ពេលមេឃភ្លៀងម្តងៗ ពួកគាត់ដេកមិនលក់នោះឡើយ ខ្លាចក្រែងតែគេយកគ្រឿងចក្រទៅជីកកកាយបើកទំនប់បង្ហូរមកលើផ្ទះ របស់ខ្លួនបណ្តាលឱ្យលង់ស្លាប់។ ប្រជាពលរដ្ឋដទៃទៀត ក្នុងចំណោម១៥គ្រួសារ បានរៀបរាប់ឱ្យដឹងដូចៗគ្នាថា ពួកគាត់ក៏មិនចង់រស់នៅលើដីចំណីផ្លូវខាងលើ ក្បែរដីអ្នកមាននេះដែរ។ តែធ្វើម៉េច បើពួកគាត់ក្រីក្រ គ្មានលទ្ធភាពទិញដីសង់ផ្ទះផ្ទាល់ខ្លួន។ តែបើអាជ្ញាធរខេត្ត ឬម្ចាស់ដីនៅខាងលើ ចង់ឱ្យពួកគេរុះរើចេញសូមរកដីមួយកន្លែង សមរម្យ នោះពួកគេនឹងចេញភ្លាមតែម្តង។
ប៉ុន្តែនៅពេលនេះ ពួកគេសុំឱ្យម្ចាស់ដីខាងលើ មេត្តាយោគយល់ និងអាណិតមេត្តាដល់ពួកគេ ដែលជាមនុស្សដូចគ្នា កុំធ្វើបាបដោយបើកទឹកទំនប់បង្ហូរ ពន្លិចផ្ទះ បែបនេះទៀត។ ចំណែកមេការរបស់ថៅកែដីចម្ការខាងលើម្នាក់ បានរៀបរាប់ឱ្យដឹងថា ៖ ពួកគេមិនបានបើកទំនប់ឱ្យលិចលង់ផ្ទះប្រជាពលរដ្ឋទាំងនោះទេ គឺគេជីកកកាយដីឱ្យទឹកហូរចូលទៅក្នុងប្រឡាយប៉ុណ្ណោះ ព្រោះភ្លៀងធ្លាក់រាល់ថ្ងៃមិនអាចឱ្យហូរទៅទំនប់ខាងក្រោមទាន់ពេលវេលា ទើបបណ្តាលឱ្យលិចលង់ផ្ទះប្រជាពលរដ្ឋដែលសង់នៅក្បែរប្រឡាយទឹក លើចិញ្ចឹមផ្លូវជាតិបែបនេះ៕ ដោយ ៖ នីយ៉ា
ចែករំលែកព័តមាននេះ