ខេត្តកំពង់ឆ្នាំង៖ ម្ចាស់កសិដ្ឋានមួយកន្លែង ស្ថិតក្នុងភូមិក្រាំងស្គារត្បូង ឃុំក្រាំងស្គារ ស្រុកទឹកផុស បាននឹងកំពុងបន្តអភិវឌ្ឍន៍ទីតាំងរបស់ខ្លួន ដើម្បីឱ្យក្លាយជាតំបន់ទេសចរណ៍កែច្នៃដ៏ទាក់ទាញ ដើម្បីស្រូបយកភ្ញៀវទេសចរជាតិ អន្តរជាតិមកទស្សនាកំសាន្ត ដោយបានធ្វើផ្ទះលំហែពីដើមប្ញស្សី…
ខេត្តកំពង់ឆ្នាំង៖ ម្ចាស់កសិដ្ឋានមួយកន្លែង ស្ថិតក្នុងភូមិក្រាំងស្គារត្បូង ឃុំក្រាំងស្គារ ស្រុកទឹកផុស បាននឹងកំពុងបន្តអភិវឌ្ឍន៍ទីតាំងរបស់ខ្លួន ដើម្បីឱ្យក្លាយជាតំបន់ទេសចរណ៍កែច្នៃដ៏ទាក់ទាញ ដើម្បីស្រូបយកភ្ញៀវទេសចរជាតិ អន្តរជាតិមកទស្សនាកំសាន្ត ដោយបានធ្វើផ្ទះលំហែពីដើមប្ញស្សី ដូចផ្ទះជនជាតិភាគតិច ផ្ទះលូ តង់ស្នាក់នៅ និងកែឆ្នៃកន្លែងទឹកធ្លាក់ដែលហូរធ្លាក់មកពីលើភ្នំជាដើម ។
មកដល់ពេលនេះ កសិដ្ឋានបានកសាងស្ពានប្ញស្សីមួយកន្លែង ឆ្លងកាត់អូរដែលមាន
ចន្តរទឹកហូរចុះពីលើតំបន់ព្រៃភ្នំ និងបានកែឆ្នៃធ្វើសួនច្បារជាប់មាត់អូរនៅកន្លែងមុជទឹក សំរាប់បំរើតម្រូវការរបស់ភ្ញៀវទេសចរ និងនៅក្បែរកន្លែងមុជទឹកនោះ ក៏មានខ្យូសជាច្រើនកន្លែង សំរាប់ភ្ញៀវអង្គុយលេងហូចចុកចំណីអាហារផងដែរ ។ ជាមួយគ្នានេះ សេវាម្ហូបអាហារវិញ ក៏មានម្ហូមអាហាររបស់ខ្មែរ និងបន្លែធម្មជាតិគ្រប់ប្រភេទដែលគ្មានជាតិគីមី និងមានតម្លៃសមរម្យ សំរាប់បំពេញចិត្តភ្ញៀវទេសចរដែលមកលេងកំសាន្ត។
មេការម្នាក់បានបញ្ជាក់ប្រាប់កោះសន្តិភាពថា ចំពោះកន្លែងស្នាក់នៅលំហែកាយវិញ កំពុងដំណើរការកសាងផ្ទះអំពីប្ញស្សីចំនួន៦ខ្នង(យកគំរូផ្ទះជនជាតិភាគតិច) ផ្ទះលូ២កន្លែងធ្វើបាន៨០%ហើយ និងបានធ្វើ តង់ស្នាក់នៅបានជាង៥០កន្លែង ដើម្បីបំរើអោយការស្នាក់នៅលេងកំសាន្តពេលយប់ ដោយមានបំពាក់ភ្លើងសូឡា និងបំពាក់ដុំហ្វាយ ហ្វាយ សំរាប់ប្រើប្រាស់ប្រព័ន្ធអិនធឺណែត ជូនភ្ញៀវមកស្នាក់នៅលំហែកាយផងដែរ ។
ទាក់ទងនិងតំបន់ទេសចរណ៍កែឆ្នៃមួយនេះ លោកសេង សាលី ប្រធានមន្ទីរទេសចរណ៍ ខេត្តកំពង់ឆ្នាំង បានឱ្យដឹងថា សព្វថ្ងៃ នៅកសិដ្ឋានគ្រីនហ្វាម បានទទួលភ្ញៀវទេសចរ មិនចាញ់រមណីយដ្ឋាន ទឹកធ្លាក់ស្រែអំពិល និងទឹកធ្លាក់ថ្មក្រាលប៉ុន្មានទេ គ្រាន់តែថា ពេលខ្លះភ្ញៀវចេញពីទឹកធ្លាក់ស្រែអំពិល ឈៀងចូលមកកសិដ្ឋានបៃតង ដើម្បីទស្សនាមួយពេលទៀតមុននឹងវិលត្រឡប់ទៅលំនៅដ្ឋានវិញ ។
យ៉ាងនេះក្តីកន្លងមក ខាងមន្ទីរជំនាញរបស់លោក បានចុះណែនាំពីការថែទាំអនាម័យ ការបដិសណ្ឋាកិច្ចចំពោះភ្ញៀវ និងណែនាំពីការយកសេវាសាធារណៈ ទៅតាមស្តង់ដាដែលកំណត់ដោយក្រសួងផងដែរ ។ ជាងនេះទៀតសម័យកូវីតនេះ ក៍បានណែនាំឱ្យម្ចាស់កសិដ្ឋាន ត្រូវយកចិត្តទុកដាក់ចំពោះភ្ញៀវមកលេងកំសាន្តត្រូវមានគម្លាតពីគ្នា ត្រូវពាក់ម៉ាស់ និងការលាងដៃនឹងសាប៊ូអាកុលជាដើម។
ចែករំលែកព័តមាននេះ