ខេត្តមណ្ឌលគិរី ៖ ផ្កាយពីរប៉ូលិសព្រំដែនម្នាក់ ត្រូវបានតុលាការសម្រេចឲ្យឃុំខ្លួន ក្រោយរកឃើញជាប់ពាក់ព័ន្ធករណីបទល្មើសព្រៃឈើ នៅស្រុកអូររាំង ខេត្តមណ្ឌល
គិរី។ សេចក្តីរាយការណ៏បានឲ្យដឹងទៀតថា ជនត្រូវចោទឈ្មោះ ពៅ សុធារ៉ាន់ ភេទប្រុស អាយុ៤៣ឆ្នាំ ជនជាតិខ្មែរ សញ្ជាតិខ្មែរ ទីកន្លែងកំណើតភូមិពពេល ឃុំពពេល ស្រុកត្បូងឃ្មុំ ខេត្តកំពង់ចាម ទីលំនៅបច្ចុប្បន្ននៅផ្ទះលេខC៦៥ សង្កាត់ស្រះចក ខណ្ឌដូនពេញ រាជធានីភ្នំពេញ។
បច្ចុប្បន្ន មានមុខរបរអនុប្រធាននាយកដ្ឋាននគរបាលការពារព្រំដែនគោក ហើយត្រូវបានចោទប្រកាន់ពីបទ «កាប់គាស់រុករានដីព្រៃ ឆ្ការដុត និងឈូសឆាយដីព្រៃ ដើម្បីយកដីធ្វើជាកម្មសិទ្ធិ» ប្រព្រឹត្តនៅចំណុចភ្នំរហាំង ស្ថិតនៅភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី កាលពីថ្ងៃទី០៩ ខែកញ្ញា ឆ្នាំ២០២០ បទល្មើសព្រហ្មទណ្ឌមានចែង និងផ្តន្ទាទោសតាមបញ្ញត្តិមាត្រា៦២ ចំណុច១ និងមាត្រា៥៦ ចំណុច៤ នៃច្បាប់ស្តីពី តំបន់ការពារធម្មជាតិ។
សូមបញ្ជាក់ថា កាលពីថ្ងៃទី៣០ កញ្ញា ២០២០ កម្លាំងសមត្ថកិច្ចចម្រុះប្រមាណជាង១០០នាក់ បានបើកប្រតិបត្តិការដ៏ធំចុះទៅកន្លែងកើត មានករណីរុករានដីព្រៃរបស់រដ្ឋដ៏ធំសម្បើម នៅចំណុចភ្នំរហាំង ជាប់ព្រំដែនកម្ពុជា-វៀតណាម ។ ក្នុងសំណុំរឿងនេះមានមន្ត្រីខ្លះត្រូវបានចាប់ខ្លួន ហើយខ្លះទៀតបានរត់គេចខ្លួនបាត់ស្រមោល ដែលពួកគេស្ថិតក្នុងអង្គការចាត់តាំងក្នុងការប្រព្រឹត្តសកម្មភាពកាប់រានដីព្រៃរាប់រយហិចតាយកជាកម្មសិទ្ឋផ្ទាល់ខ្លួន ដោយដាក់ឈ្មោះទីតាំងនោះថា ដំណាក់ឥន្ទ្រី ។
យោងតាមលិខិតរបស់ក្រសួងមហាផ្ទៃ ដែលបានចុះកាលបរិច្ឆេតកាលពីថ្ងៃទី ២៥ ខែកញ្ញា ឆ្នាំ២០២០ ក្នុងករណីកាប់រាន និងឈូសឆាយ ដីព្រៃ យកធ្វើជាកម្មសិទ្ធិដោយខុសច្បាប់ ឋិតក្នុងភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី សម្ដេចអគ្គមហាសេនាបតីតេជោ ហ៊ុន សែន បានយល់ព្រមតាមសំណើរបស់ក្រសួងមហាផ្ទៃ ក្នុងការបន្តចាត់ចែង អនុវត្តនីតិវិធី ច្បាប់ចំពោះករណីការកាប់រានឈូស ឆាយដីព្រៃរដ្ឋធ្វើជាកម្មសិទ្ធិ ។ឈរលើមូលដ្ឋាននេះ ដើម្បីថែរក្សាការពារ និងទប់ស្កាត់ការកាប់រាន និងជួយឆាយបំផ្លាញព្រៃឈើ ដែលជាទ្រព្យសម្បត្តិរបស់ជាតិ យកធ្វើជាកម្មសិទ្ធិពីសំណាក់ជនខិលខូចដោយខុសច្បាប់បន្តទៀត។
ក្រសួងមហាផ្ទៃ សូមធ្វើការណែនាំដល់រដ្ឋបាលខេត្តមណ្ឌលគិរី ត្រូវអនុវត្តនូវ វិធានការមួយចំនួនដូចខាងក្រោម ០១-ត្រូវធ្វើការបដិសេធរាល់ឯកសារទិញលក់ និងឯកសារផ្ទេរសិទ្ធិ កាន់កាប់ដីធ្លី ដោយខុសច្បាប់ ក្នុងតំបន់នោះ ប្រគល់ជូនរដ្ឋបាលខេត្តមណ្ឌលគិរី គ្រប់គ្រងដីព្រៃ ដែលបានដកហូត រក្សាទុក ជាទ្រព្យសម្បត្តិរបស់រដ្ឋ ០២-មិនត្រូវអនុញ្ញាតអោយបង្កើតជា សហគមន៍ព្រៃឈើ អូរគ្លី នៅក្នុងភូមិពូឆបឃុំដាក់ដាំស្រុកអូររាំង ខេត្តមណ្ឌលគិរីនោះទេ ព្រោះនាំឲ្យកើតមានបទល្មើសព្រៃឈើកាន់តែច្រើនឡើង ពិបាកក្នុងការគ្រប់គ្រង និងទប់ស្កាត់ ម្យ៉ាងទៀតតំបន់នេះ នឹងគៀកហឹង តំបន់ដែលមិនទាន់ឯកភាពគ្នាក្នុង ការខណ្ឌសីមា បោះបង្គោលព្រំដែនជាមួយភាគីវៀតណាម ដែលងាយស្រួលឲ្យជនល្មើសលួចកាប់បំផ្លាញព្រៃឈើនិងដឹកជញ្ជូនទៅកាន់ប្រទេសវៀតណាម ។ ០៣-ត្រូវធ្វើការដាក់ កម្លាំងនគរបាលការពារព្រំដែនគោកនៃស្នងការដ្ឋាននគរបាលខេត្តមណ្ឌលគិរី ដោយ សហការជាមួយមន្ត្រីបរិស្ថាន និងរដ្ឋបាលព្រៃឈើដែលប្រចាំការនៅទីនោះអោយទទួលខុសត្រូវក្នុងការគ្រប់គ្រង និងការពារជាបណ្ដោះអាសន្ននៅទីនោះ ដោយមិនត្រូវអនុញ្ញាតឲ្យមានការចេញចូលក្នុងតំបន់នោះជាដាច់ខាត និង០៤-ត្រូវធ្វើការរុះរើរោងយាម នឹងខ្ចុះនៅតាមមាត់អូរចំនួនពីរកន្លែង រួមទាំងស្លាកឈ្មោះថា ដំណាក់ឥន្ទ្រី ។
ចំពោះផ្ទះចំនួន ០២ កន្លែងនៅលើខ្នងភ្នំ ត្រូវរក្សាទុកជូននគរបាលការពារព្រំដែនដើម្បីដាក់កម្លាំងប្រចាំការនៅទីតាំងកើតហេតុនោះ៕
ចែករំលែកព័តមាននេះ