ខេត្តកណ្តាល៖ ដោយសារទ្រាំនិងការជេរប្រមាថ និងគំរាមសម្លាប់មួយពូជជាច្រើនដងពេក បងបង្កើតបានដាក់ពាក្យបណ្តឹងទៅសមត្ថកិច្ចអោយឃាត់ខ្លួនប្អូនបង្កើតតែម្តង ។
ហេតុការណ៍នេះ បានកើតឡើងនៅថ្ងៃទី៣០ កញ្ញា វេលាម៉ោង៨និង០០នាទីនៅចំណុចផ្ទះជនរងគ្រោះ ស្ថិតភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល។ ជនរងគ្រោះឈ្មោះម៉ាន រ៉ហីម៉ាស់ ភេទស្រី អាយុ៥០ឆ្នាំ ជនជាតិខ្មែរឥស្លាម មានទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល ជាអ្នកលក់ដូរ ។
ជនសង្ស័យឈ្មោះម៉ាន យូសុះ ភេទប្រុស អាយុ៣៣ឆ្នាំ ជនជាតិខ្មែរឥស្លាម មានទីលំក្នុងភូមិជាមួយបងប្រុសជាជនរងគ្រោះ។ មន្ត្រីនគរបាលក្រុងតាខ្មៅបានប្រាប់អោយដឹងថា នៅវេលាកើតហេតុខាងលើ ពេលដែលជនរគ្រោះកំពុងតែអង្គុយលេងជាមួយម្តាយនៅក្នុងផ្ទះ ស្រាប់តែជនសង្ស័យមិនដឹងជាខឹងរឿងអ្វីទេ បានដើរចូលមកជេរប្រមាថ ហើយទាញយកកំណាត់ឈើជ្រុង និងកំសៀវទឹកគប់ តែមិនត្រូវទេ បន្ទាប់មកទៀត ជនសង្ស័យបានស្ទុះទៅយកកាំបិតប៉័ងតោ និងទួណឺវីសកាន់នៅជាប់ដៃគំរាមកាប់សំលាប់ចោលទាំងពូជ ហើយបានជិះម៉ូតូចេញពីផ្ទះបាត់ទៅ។
ដោយជនរងគ្រោះនិងអ្នកផ្ទះមានការភ័យខ្លាចនិងអំពើគំរាមកំហែងជាច្រើនលើកច្រើនសារពីសំណាក់ជនសង្ស័យលែងបានទៀត ទើបមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលដើមមៀនជួយអន្តរាគមន៍ឃាត់ខ្លួនជនសង្ស័យបានរួមទាំងវត្ថុតាងនៅថ្ងៃទី១ តុលា យកមកសាកសួរនៅប៉ុស្តិ៍រួចបញ្ជូនបន្តមកកាន់អធិការដ្ឋាននគរបាលក្រុងតាខ្មៅដើម្បីបន្តចាត់ការតាមនីតិវិធី។
ចែករំលែកព័តមាននេះ