រាជធានីភ្នំពេញ ៖ នៅក្នុងវិស័យមីក្រូហិរញ្ញវត្ថុកម្ពុជា មានគ្រឹះស្ថានមីក្រូហិរញ្ញវត្ថុជាច្រើនបានចុះបញ្ជីនៅធនាគារជាតិនៃកម្ពុជាក៏ប៉ុន្តែក្នុងចំណោមមីក្រូហិរញ្ញវត្ថុទាំងអស់នោះ
រាជធានីភ្នំពេញ ៖ នៅក្នុងវិស័យមីក្រូហិរញ្ញវត្ថុកម្ពុជា មានគ្រឹះស្ថានមីក្រូហិរញ្ញវត្ថុជាច្រើនបានចុះបញ្ជីនៅធនាគារជាតិនៃកម្ពុជាក៏ប៉ុន្តែក្នុងចំណោមមីក្រូហិរញ្ញវត្ថុទាំងអស់នោះ មានតែមីក្រូហិរញ្ញវត្ថុចំនួន៧ប៉ុណ្ណោះដែលមានអាជ្ញាប័ណ្ណពីធនាគារជាតិនៃកម្ពុជាឲ្យទទួលប្រាក់បញ្ញើសន្សំពីអតិថិជន ។ នៅដំណាច់ឆ្នាំ ២០១៤ នេះ មីក្រូហិរញ្ញវត្ថុទាំង៧ដែលទទួលប្រាក់បញ្ញើសន្សំពីអតិថិជនទូទាំងប្រទេសកម្ពុជា មានទឹកប្រាក់ប្រមាណ៨៩៧លានដុល្លារសហរដ្ឋអាមេរិក ។
តាមប្រសាសន៍របស់លោក បណ្ឌិត ប៊ុន មុន្នី ប្រធានសមាគមមីក្រូហិរញ្ញវត្ថុកម្ពុជា និងជានាយកប្រតិបត្តិគ្រឹះស្ថានមីក្រូហិរញ្ញវត្ថុស្ថាបនាលីមីតធីត បានឲ្យដឹងថា ប្រាក់បញ្ញើសន្សំពីអតិថិជនក្នុងឆ្នាំ២០១៤ មានចំនួន៨៩៧លានដុល្លារសហរដ្ឋអាមេរិក ដែលមានអតិថិជនដាក់ប្រាក់ចំនួន១.១២២.៦៣០នាក់ ។
លោកបន្តថា បើយើងប្រៀបធៀបប្រាក់បញ្ញើសន្សំពីអតិថិជនក្នុងឆ្នាំ២០១៤ និងឆ្នាំ២០១៣ ឃើញថា មានកំណើនទ្វេដងគឺ១០០ភាគរយដែលកាលពីឆ្នាំ២០១៣កន្លងមកនេះ ប្រាក់បញ្ញើដែលទទួលបានពីអតិថិជនក្នុងសមាគមមីក្រូហិរញ្ញវត្ថុកម្ពុជា មានប្រមាណ៤៤៥លានដុល្លារសហរដ្ឋអាមេរិកប៉ុណ្ណោះ។ នេះអាចបញ្ជាក់ថា អតិថិជនកាន់តែមានទំនុកចិត្តមកលើគ្រឹះស្ថានមីក្រូហិរញ្ញវត្ថុនៅក្នុងព្រះរាជាណាចក្រកម្ពុជាយើងដែលធនាគារជាតិនៃកម្ពុជា បានផ្ដល់អាជ្ញាប័ណ្ណ និងអាចបញ្ជាក់ពីប្រាក់ចំណូលប្រជាជនកម្ពុជាយើងផងដែរ ។
សម្រាប់ប្រាក់កម្ចីដែលមីក្រូហិរញ្ញវត្ថុចំនួន៣៧ក្នុងសមាគមមីក្រូហិរញ្ញវត្ថុកម្ពុជាផ្ដល់ជូនអតិថិជនមានប្រមាណ២.០២៨លានដុល្លារសហរដ្ឋអាមេរិកដែលមានអ្នកប្រើប្រាស់ចំនួន១.៧៧៩.១៧១នាក់ ។ បើធៀបនឹងឆ្នាំ២០១៣ ឃើញថាកើនឡើងប្រហែលជា៥០ភាគរយ ។
គួរបញ្ជាក់ថា នៅពេលថ្មីៗកន្លងមកនេះ មានមីក្រូហិរញ្ញវត្ថុប្រមាណ១០០គ្រឹះស្ថានបានចុះបញ្ជីនៅក្នុងធនាគារជាតិនៃកម្ពុជា ហើយការចុះបញ្ជីនេះដែរ មិនមែនមានន័យថា ធនាគារជាតិផ្ដល់អាជ្ញាប័ណ្ណឲ្យនោះទេ លុះត្រាតែមីក្រូហិរញ្ញវត្ថុទាំងនោះអនុវត្តនូវគោលការណ៍មួយចំនួនរបស់ធនាគារជាតិ ដូចជាមានឆន្ទៈជួយសម្រួលដល់ប្រជាពលរដ្ឋដោយយកការប្រាក់ទាបសមល្មមដែលអតិថិជនអាចទទួលយកបានជាដើម ។ ការចុះបញ្ជីនេះគ្រាន់តែជាការគេចលេសឲ្យផុតពីចំណាត់ការរបស់ធនាគារជាតិនៃកម្ពុជា ចំពោះគ្រឹះស្ថានមួយចំនួនផ្ដល់កម្ចីដល់ប្រជាពលរដ្ឋដោយយកការប្រាក់ខ្ពស់ហួសហេតុតែប៉ុណ្ណោះ ។
ទាក់ទងនឹងរឿងនេះដែរ លោកបណ្ឌិត ប៊ុន មុន្នី ក្នុងនាមប្រធានសមាគមមីក្រូហិរញ្ញវត្ថុកម្ពុជា ក៏បានសំណូមពរដល់ប្រជាពលរដ្ឋទាំងអស់សូមមានការប្រុងប្រយ័ត្នខ្ពស់ និងប្រើប្រាស់សេវាកម្មរបស់មីក្រូហិរញ្ញវត្ថុណាដែលមានអាជ្ញាបណ្ណ័ប្រកបរបរត្រឹមត្រូវពីធនាគារជាតិនៃកម្ពុជា ។ ម្យ៉ាងទៀត ដើម្បីផ្ដល់ទំនុកចិត្តដល់អតិថិជនរបស់ខ្លួននោះដែរ មីក្រូហិរញ្ញវត្ថុដែលមានអាជ្ញាបណ្ណ័ទាំងអស់បានខិតខំប្រឹងប្រែង បង្កើតសេវាកម្មល្អៗដល់អតិថិជន និងកាត់បន្ថយការប្រាក់សម្រាប់អតិថិជនដែលប្រើប្រាស់កម្ចីឥណទាន និងផ្ដល់ទំនុកចិត្តខ្ពស់បន្ថែមទៀតសម្រាប់ប្រាក់បញ្ញើរបស់អតិថិជនដែលបានដាក់ក្នុងគ្រឹះស្ថានមីក្រូហិរញ្ញវត្ថុនីមួយៗ ៕
ចែករំលែកព័តមាននេះ