ស្ថានីយអយស្ម័យយានក្រុងតូក្យូប្រារព្ធខួប100ឆ្នាំ
ស្ថានីយអយស្ម័យយានក្រុងតូក្យូ គឺជាមជ្ឈមណ្ឌលគមនាគមន៍ដ៏សំខាន់របស់ជប៉ុន ដោយមានរថភ្លើងច្រើនខ្សែចេញ-ចូលជាង៣០០០ជើងក្នុងមួយថ្ងៃ និងមានអ្នកដំណើរជាង៤សែននាក់ក្នុងមួយថ្ងៃ
ស្ថានីយអយស្ម័យយានក្រុងតូក្យូ គឺជាមជ្ឈមណ្ឌលគមនាគមន៍ដ៏សំខាន់របស់ជប៉ុន ដោយមានរថភ្លើងច្រើនខ្សែចេញ-ចូលជាង៣០០០ជើងក្នុងមួយថ្ងៃ និងមានអ្នកដំណើរជាង៤សែននាក់ក្នុងមួយថ្ងៃ ប៉ុន្តែក្នុងរយៈពេល១០០ឆ្នាំកន្លងមកស្ថានីយរថភ្លើងនោះបានក្លាយជាប្រវត្តិចងចាំសម្រាប់ប្រជាពលរដ្ឋជប៉ុន ។
រដ្ឋាភិបាលជប៉ុនចាប់ផ្តើមគម្រោងសាងសង់ស្ថានីយរថភ្លើងតាំងពីឆ្នាំ១៨៨៩ ប៉ុន្តែការសាងសង់ត្រូវបានផ្អាកដោយសារតែសង្គ្រាមរវាងចិន និងជប៉ុន និងសង្គ្រាមរុស្ស៊ីជាមួយជប៉ុន ។ លុះមកដល់ឆ្នាំ១៩៨០ ជប៉ុនចាប់ផ្តើមសាងសង់បន្ត ហើយរួចរាល់បើកឱ្យប្រើប្រាស់ជាផ្លូវការ នៅថ្ងៃទី២០ ធ្នូ ១៩១៤ ។
ស្ថានីយអយស្ម័យយានតូក្យូលេចធ្លោដោយអគារមានលក្ខណៈបែបអឺរ៉ុប ពណ៌ក្រហមជានិមិត្តរូបនៃការចេញម៉ូដរបស់លោកថាតស៊ូណូ ឃីនហ្គោ ក្នុងឱកាសដែលជប៉ុនឈ្នះសង្គ្រាមរុស្ស៊ី និងអ្វី្វគួរឱ្យកត់សម្គាល់ជាងនេះគឺពិតានអគារជាស្ថាបត្យកម្មតាមបែបអឺរ៉ុប ។
ទោះជាយ៉ាងណាក៏ដោយ អគារមួយនោះរងការបំផ្លិចបំផ្លាញខូចខាតក្នុងសង្គ្រាមលោកនិងក្រោយពីបានបញ្ចប់សង្គ្រាមលោកបានជួសជុលជាថ្មី ប៉ុន្តែបន្ថយពី៣ជាន់មកនៅសល់ត្រឹម២ជាន់ ។ នៅអំឡុងទសវត្ស១៩៨០ អភិបាលក្រុងតូក្យូមានគោលគំនិត រុះរើអគារស្ថានីយតូក្យូសម្រាប់សាងសង់ថ្មីឱ្យទាន់សម័យ ប៉ុន្តែទទួលការជំទាស់ពីមហាជន ។ ទីបំផុតអភិបាលក្រុងសម្រេចអភិរក្សទុកដោយកែលម្អបរិវេណនៅជុំវិញអគារឱ្យទាន់សម័យ រួមមានមជ្ឈមណ្ឌលពាណិជ្ជកម្ម និងបង្កលក្ខណៈងាយស្រួល ។
ម្យ៉ាងទៀតស្ថានីយអយស្ម័យយានតូក្យូជាទីតាំងដែលកត់ត្រាពី «ប្រវតិ្តលោហិតផ្នែកនយោបាយ» ក្រោយពីនាយករដ្ឋមន្ត្រីជប៉ុនចំនួន២រូប ត្រូវគេលួចធ្វើឃាតនៅទីនោះ ។ លោកនាយករដ្ឋមន្ត្រីហារ៉ា ថាកាស៊ី ត្រូវជនល្មើសលួចចាក់សម្លាប់នៅបរិវេណទ្វារខាងត្បូងស្ថានីយក្នុងឆ្នាំ១៩២១ ។ ចំណែកនៅឆ្នាំ១៩៣០ លោកនាយករដ្ឋមន្ត្រីអូសាស៊ី ហាម៉ាគូស៊ី ត្រូវខ្មាន់កាំភ្លើងលួចបាញ់រងរបួស និងស្លាប់បាត់បង់ជីវិតក្នុងពេលបន្ទាប់ ។
ស្ថានីយអយស្ម័យយាននោះបានរៀបចំប្រារព្ធខួបគម្រប់១០០ឆ្នាំ តាំងពីខែធ្នូ ២០១៤ រហូតដល់ថ្ងៃទី១៤ កុម្ភៈ ២០១៥ ដោយមានវីដេអូឃ្លីបរៀបរាប់ពីប្រវត្តិក្នុងអំឡុងពេល១សតវត្សកន្លងទៅ ៕
ចែករំលែកព័តមាននេះ