រាជធានីភ្នំពេញ ៖ ខណៈដែលក្រសួងមហាផ្ទៃកំពុងពិនិត្យសំណើរសុំសម្បទាសិទ្ធិធ្វើនយោបាយរបស់អតីតមន្ត្រីគណបក្សប្រឆាំង៣រូបនោះ គណបក្សកាន់អំណាចបានប្រកាសស្វាគមន៍ចំពោះការស្នើសុំនេះ ។ នេះបើតាមអ្នកនាំពាក្យគណបក្សកាន់អំណាច ។ លោកសុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យកោះសន្តិភាពដឹងតាមទូរស័ព្ទ…
រាជធានីភ្នំពេញ ៖ ខណៈដែលក្រសួងមហាផ្ទៃកំពុងពិនិត្យសំណើរសុំសម្បទាសិទ្ធិធ្វើនយោបាយរបស់អតីតមន្ត្រីគណបក្សប្រឆាំង៣រូបនោះ គណបក្សកាន់អំណាចបានប្រកាសស្វាគមន៍ចំពោះការស្នើសុំនេះ ។ នេះបើតាមអ្នកនាំពាក្យគណបក្សកាន់អំណាច ។
លោកសុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យកោះសន្តិភាពដឹងតាមទូរស័ព្ទ នៅថ្ងៃទី២៨សីហា ឆ្នាំ២០២០ បានស្វាគមន៍ចំពោះការស្នើសុំសម្បទាសិទ្ធិធ្វើនយោបាយរបស់អតីតគណបក្សប្រឆាំងទាំង៣រូបនេះ ។
លោកសុខ ឥសាន បន្តថា មិនចាំបាច់ឆ្ងល់ចំពោះការសុំសិទ្ធិនយោបាយរបស់ពួកគាត់ទេ ព្រោះច្បាប់ស្តីពីវិសោនធកម្មច្បាប់ស្តីពីគណបក្សនយោបាយ និងនីតិវិធីរបស់ក្រសួងមហាផ្ទៃបានបើកទូលាយឲ្យពួកគាត់ហើយក្នុងចំណោម១១៨នាក់ហ្នឹង បើគាត់ចង់បាននីតិសម្បទា ធ្វើនយោបាយឡើងវិញ គឺគាត់ធ្វើតាមច្បាប់និងការណែនាំរបស់ក្រសួងមហាផ្ទៃ ។ លោកបញ្ជាក់ថា ៖«បើគាត់ចង់ធ្វើនយោបាយជាសិទ្ធិនយោបាយរបស់គាត់នៅពេលគាត់ដាក់ស្នើសុំទៅបានហើយ ។ ជាងនេះបង្ហាញឆ្លុះបញ្ចាំងឲ្យឃើញថា គាត់មិនខ្លាចការគំរាមកំហែងរបស់អតីតមេរបស់គាត់ ។ ព្រោះកន្លែងទៅមេគាត់ដែលទណ្ឌិតក្រៅច្បាប់ តែងតែលាបពណ៌ឲ្យ សមាជិកក្នុងចំណោម១១៨នាក់ហ្នឹងថា បើអ្នកណាសុំនីតិសម្បទាសិទ្ធិធ្វើនយោបាយឡើងវិញ គឺជាការត្បត់ ។ តែពេលនេះយើងឃើញថា ទោះបីមានការគំរាមកំហែងក្តី ក៏ពួកគេមិនខ្លាចដែរ» ។
អ្នកនាំពាក្យដដែលក៏បានលើកឡើងថា ការដែលសមាជិកអតីតគណបក្សប្រឆាំងសុំសម្បទានសិទ្ធិធ្វើនយោបាយឡើងវិញនេះ ក៏បង្ហាញពីការអស់ជំនឿរបស់ពួកគេលើកមេរបស់គេហើយ ។ ចំពោះការសុំសម្បទានសិទ្ធិនយោបាយរបស់លោក សុន ឆ័យ ដែលគេសង្កេតឃើញថា ជាអ្នកប្រឆាំងខ្លាំងជាងគេយ៉ាងណាក្តី លោក សុខ ឥសាន បានគូសបញ្ជាក់ថា ទោះបីគេឃើញអ្នកណាប្រឆាំងខ្លាំងជាងគេក្តី មិនប្រាកដថាអ្នកនោះច្បាស់ប្រឆាំងទេ ផ្ទុយទៅវិញគេធ្វើប្រឆាំងខ្លាំងទៅ តែតាមពិតធ្វើការឲ្យគណបក្សប្រជាជនកម្ពុជាក៏មានដែរ ។
លោកបញ្ជាក់ថា៖«យើងមិនមានការព្រួយបារម្ភអ្វីចំពោះអ្នកសុំនីតិសម្បទាសិទ្ធិធ្វើនយោយនេះទេ តែយើងស្វាគមន៍ការធ្វើនីតិសម្បទាននយោបាយទាំងនេះ ។ ហើយការដែលគាត់បង្កើតគណបក្សនយោបាយជាសិទ្ធិរបស់គាត់ អត់ព្រួយអ្វីទេ ហើយយើងក៏មិនភ័យពីការប្រកួតប្រជែងអ្វីដែរ» ។
ជាមួយគ្នានោះដែរ លោក សុខ ឥសាន ក៏លើកឡើងពីករណីទណ្ឌិតសម រង្ស៊ីថា មិនអាចសុំសិទ្ធិធ្វើនយោបាយបាននោះទេ ពីព្រោះទណ្ឌិត សម រង្ស៊ី ត្រូវបានតុលាការកាត់ទោសឲ្យជាប់ពន្ធនាគាររួចហើយ គឺមានតែការចាប់ខ្លួនចូលគុកប៉ុណ្ណោះ ។ ទណ្ឌិតនេះមិនមានសិទ្ធិធ្វើនយោបាយឡើងវិញនោះទេ ។ ជាងនេះទណ្ឌិតនេះមិនមែនឈ្មោះក្នុងបញ្ជីជាសមាជិកអតីតគណបក្សសង្គ្រោះជាតិទាំង១១៨នាក់នោះទេ ដោយសារគាត់លាលែងប្រធានគណបក្ស និងសមាជិកបក្សរួចហើយ ។
ដោយឡែកចំពោះករណីលោកកឹម សុខា វិញ ក៏មិនបានធ្វើអ្វីបានដែលព្រោះគាត់កំពុង ស្ថិតក្នុងនីតិវិធីតុលាការ ។ លោកបញ្ជាក់ថា៖« ទោះបីកឹម សុខា ចង់សុំនីតិសម្បទាន សិទ្ធិធ្វើនយោបាយឡើងវិញក៏មិនបានដែរ ពីព្រោះគាត់ស្ថិតក្នុងនីតិវិធីតុលាការ» ។ ករណីលោកកឹម សុខា នេះដែរ លោកសុខ ឥសាន ក៏បានលើកឡើងថា ប្រសិនបើតុលាការមិនទាន់ជម្រះក្តីចប់សព្វគ្រប់នោះទេ គាត់មិនអាចសុំនីតសម្បទាសិទ្ធិធ្វើ នយោបាយបាននោះទេ ។ ចំពោះករណីស្នើសុំសម្បទាសិទ្ធិធ្វើនយោបាយរបស់អតីតមន្ត្រីបក្សប្រឆាំងទាំង៣នាក់ ត្រូវបានក្រសួងមហាផ្ទៃអះអាងមិនទាន់សម្រេចយ៉ាងណានោះទេ ។ នេះបើតាមលោកខៀវ សុភ័កអ្នកនាំពាក្យក្រសួងមហាផ្ទៃ ។ ការបញ្ជាក់របស់អ្នកនាំពាក្យក្រសួងមហាផ្ទៃ បន្ទាប់ពីលោក សុន ឆ័យ អតីតតំ ណាងរាស្ត្រមណ្ឌលភ្នំពេញ និងសមាជិកគណៈកម្មការនាយក២រូបទៀតនៃអតីតគណបក្សសង្គ្រោះជាតិ គឺលោក តាវ គឹមឈន និងលោក វ៉ា សាម៉ុន នៅថ្ងៃទី២៧ ខែសីហានេះ បានដាក់លិខិតទៅកាន់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ដើម្បីស្នើសុំលើកបម្រាម ផ្តល់នីតិសម្បទាឲ្យពួកគេអាច ធ្វើនយោបាយឡើងវិញ ។
នាយឧត្តមសេនីយ៍សន្តិបណ្ឌិត ខៀវ សុភ័គ អ្នកនាំពាក្យក្រសួងមហាផ្ទៃ បានឲ្យកោះ សន្តិភាពដឹកនៅថ្ងៃទី២៨ ខែសីហា ឆ្នាំ២០២០ថា ក្រសួងមហាផ្ទៃ បានទទួលស្នើសុំផ្តល់សិទ្ធិធ្វើនយោបាយរបស់អតីតបក្សប្រឆាំងទាំង៣នាក់រួចហើយ ។ លោកបន្តថា លិខិតស្នើសុំផ្តល់សម្បទានយោបាយឡើងវិញ ត្រូវបានបញ្ជូនទៅសម្តេច ក្រឡាហោម ស ខេង ឧបនាយករដ្ឋមន្ត្រីរួចហើយ ។ ប៉ុន្តែការសម្រេចបែបណាមិនទាន់ដឹង នោះទេព្រោះទើបទទួលបាន ។ លោកបញ្ជាក់ថា ៖«សម្តេចក្រឡាហោម ស ខេង បានចារឲ្យអគ្គលេខាធិការដ្ឋាន ចំនួន៣ ពិនិត្យ សំណើរសុំនេះហើយ ។ អីញ្ចឹងចាំមើលគេប្រជុំគ្នាសិន ព្រោះទើបទទួលបានល្ងាចមិញ(ថ្ងៃទី២៧សីហា)។ ចំពោះសំណួរថា តើពេលអាចនឹងដឹងលទ្ធផលនោះខ្ញុំសុំមិននិយាយទេ ព្រោះរយៈពេលលទ្ធផលមិនដឹងច្បាស់ដោយសារគេនៅប្រជុំពិភាក្សា» ។
យ៉ាងណាក្តីអ្នកនាំពាក្យក្រសួង បានអះអាងក្រៅពីអ្នកទាំង៣នាក់ខាងលើនេះមិនទាន់មានអតីតមន្ត្រីគណបក្សប្រឆាំងផ្សេងណាមកដាក់ពាក្យស្នើសុំសម្បទាសិទ្ធិធ្វើនយោបាយនោះទេ បន្ទាប់ពីមានសមាជិកអតីតគណបក្សប្រឆាំងនេះត្រូវបានផ្តល់សិទ្ធិធ្វើនយោបាយឡើងវិញមួយចំនួន ។ នៅក្នុងលិខិតរបស់មន្ត្រីទាំងបីរូប បានជម្រាបជូនសម្តេចក្រឡាហោម ស ខេង ថា រូបខ្លួនទាំងបីនាក់ដែលកំពុងស្ថិតនៅក្នុងការហាមឃាត់មិនឲ្យធ្វើសកម្មភាពនយោបាយសម្រាប់រយៈពេល៥ឆ្នាំ តាមអំណាចសាលដីកាលេខ៣៤០(ឆ) ករណីគណបក្សសង្គ្រោះជាតិ ចុះថ្ងៃទី១៦ ខែវិច្ឆិកា ឆ្នាំ២០១៧ របស់តុលាការកំពូល ។
ដោយផ្អែកតាមមាត្រា៤៥ថ្មី (ស្ទួនមួយ) នៃច្បាប់ស្តីពីគណបក្សនយោបាយដែលបង្កលក្ខណៈឲ្យអ្នកដែលត្រូវបានហាមឃាត់មិនឲ្យធ្វើសកម្មភាពនយោបាយ អាចទទួលបាននីតិសម្បទា ធ្វើនយោបាយឡើងវិញ។ ដូចនេះ សូមស្នើសុំសម្តេចក្រឡាហោម ឧបនាយករដ្ឋមន្ត្រី មេត្តាពិនិត្យតាមនីតិវិធី ដើម្បីផ្តល់នីតិសម្បទាធ្វើនយោបាយឡើងវិញដល់ពួកខ្លួនដោយក្តីអនុគ្រោះ។
គួរបញ្ជាក់ថា គិតមកដល់ពេលនេះ ក្រុមមន្ត្រីជាន់ខ្ពស់ នៃអតីតគណបក្សសង្គ្រោះជាតិ ចំនួន១២នាក់ហើយ ដែលបានដាក់ពាក្យស្នើសុំសិទ្ធិធ្វើនយោបាយឡើងវិញ។ ដោយក្នុងនោះមាន ៩នាក់ទទួលបានសិទ្ធិធ្វើនយោបាយឡើងវិញ មានដូចជា: ១. លោក គង់ គាំ ២. លោក គង់ បូរ៉ា ៣. លោក រៀល ខេមរិន្ទ្រ ៤. លោក ជីវ កត្តា ៥. លោក កង គឹមហាក់ ៦. លោក អ៊ូ ច័ន្ទរ័ត្ន ៧. លោក ច័ន្ធ សិលា ៨. លោកស្រី ទេព សិទ្ធី ៩. លោក ស៊ិន សុវណ្ណនី ។ ហើយអតីតមន្ត្រីដែលទទួលបានសិទ្ធិធ្វើនយោបាយ គឺមានមួយចំនួនបានបង្កើតគណបក្សដោយខ្លួនឯង ។
ចំណែកអតីតមន្ត្រីជាន់ខ្ពស់ នៃអតីតគណបក្សសង្គ្រោះជាតិ ចំនួនបីរូបដែលទើបតែដាក់ពាក្យស្នើសុំសិទ្ធិធ្វើនយោបាយឡើងវិញ មានដូចជាៈ លោក សុន ឆ័យ លោក តាវ គឹមឈន និងលោក វ៉ា សាម៉ុន ។ ការស្នើសុំរបស់មន្ត្រីជាន់ខ្ពស់អតីតគណបក្សសង្គ្រោះជាតិ៣រូបបន្ថែមទៀតនាពេលនេះ ធ្វើឲ្យអ្នកស្នើសុំនីតិសម្បទាធ្វើនយោបាយឡើងវិញសរុប ១២នាក់ហើយ ក្នុងចំណោមមន្ត្រីជាន់ខ្ពស់អតីតគណបក្សសង្គ្រោះជាតិចំនួន១១៨នាក់ ដែលត្រូវដកហូតសិទ្ធិធ្វើនយោបាយរយៈពេល៥ឆ្នាំដោយសាលដីកាតុលាការកំពូលកាលពីខែវិច្ឆិកាឆ្នាំ២០១៧៕
ចែករំលែកព័តមាននេះ