ខេត្តកណ្តាល ៖ នៅក្នុងរោងជាងមួយ ស្ថិតនៅក្នុងស្រុកអង្គស្នួល ខេត្តកណ្តាល មិនឆ្ងាយប៉ុន្មានពីរង្វង់ចោមចៅ លោក អ៊ូ វណ្ណឌី កំពុងឆ្លាក់សត្វខ្ទីងមួយក្បាល…
ខេត្តកណ្តាល ៖ នៅក្នុងរោងជាងមួយ ស្ថិតនៅក្នុងស្រុកអង្គស្នួល ខេត្តកណ្តាល មិនឆ្ងាយប៉ុន្មានពីរង្វង់ចោមចៅ លោក អ៊ូ វណ្ណឌី កំពុងឆ្លាក់សត្វខ្ទីងមួយក្បាល ដែលមានទម្ងន់មិនតិចជាង២តោនកម្ពស់ជិតពីរម៉ែត្រ ។ ជាមួយសហការីពីរនាក់ទៀតលោក ។
សិល្បករចម្លាក់ គ្រោងបញ្ចប់សមិទ្ធផលសត្វខ្ទីងនេះ ឲ្យរួចរាល់នៅក្នុងរយៈពេលពីរខែទៀត ។ បើរួចរាល់រូបសត្វខ្ទីងនេះ មានតម្លៃប្រមាណជា២ម៉ឺនដុល្លារ ។ ខ្លួនប្រានប្រលាក់ដោយប្រេងម៉ាស៊ីន ដែលមានលក្ខណៈមិនខុសពីជាងម៉ូតូ ឬជាងឡាននោះ លោកវណ្ណឌី ដែលមានសម្បុរខ្មៅ មាឌធំ ពុតមាត់តិចៗ ។
លោកបាននិយាយថា«ចម្លាក់នេះ ជាការប្រមូលផ្តុំគ្រឿងម៉ូតូចាស់ៗ មកផ្សារភ្ជាប់គ្នា ជាមួយការច្នៃប្រឌិតបែបសិស្បខ្មែរ ដែលលោកបានរៀនចេះពីសាលាសិល្បៈ» ។ លោកអ៊ូ វណ្ណឌី បានបែកគំនិតច្នៃគ្រឿងមូតូចាស់ៗ ធ្វើរូបសត្វ និងវត្ថុតាំងលម្អនេះ ដើម្បីចូលរួម ថែរក្សាបរិស្ថាន ដោយសារលោកបានមើលឃើញថា កាកសំណល់លោហៈទាំងនោះមានកំណើនឡើង ជារៀងរាល់ឆ្នាំ។ «ខ្ញុំបានផ្តើមធ្វើការងារតាំងពីឆ្នាំ២០០៧មក ប៉ុន្តែបានឈប់មួយរយៈទៅវិញ ដោយសារពុំសូវមានការគាំទ្រ ។ ទើបរយៈពេលចុងក្រោយនេះ មានការគាំទ្របន្តិច ពិសេសពីក្រសួងបរិស្ថាន ។ ក្រសួងបរិស្ថានបានយកចម្លាក់ដំរី ស្នាដៃមួយរបស់ខ្ញុំទៅតាំងនៅខេត្តមណ្ឌលគីរី »។
រូបសត្វដែលលោក អ៊ូ វណ្ណឌី បានឆ្លាក់កន្លងមកមានគោព្រៃ ដំរី ហនុមាន ជាដើម ។ លោកថា លោកអាចឆ្លាក់របស់របរផ្សេងៗទៀតបាន តាមការបញ្ជាទិញរបស់ពលរដ្ឋ ទោះបីជាការមានការលំបាក និងប្រឈមខាងសុខភាពបន្តិចក្តី ។ ស្នាដៃរបស់លោកត្រូវបានគេទិញយកទៅតាំងនៅផ្ទះ រមណីដ្ឋាន អាហារដ្ឋាន និងទីសាធារណៈជាដើម ។ ស្នាដៃរបស់លោកមួយមានតម្លៃពី១០០ដុល្លារដល់ម៉ឺនដុល្លារអាស្រ័យលើទំហំ និងប្រភេទ ក្បូរក្បាច់ចម្លាក់ ។ លោកថា ការងាររបស់លោកមានការលំបាក ។ ដើម្បីយកបំណែកលោកហៈ ដែលជាសំណល់គ្រឿងម៉ូតូ មកផ្សារភ្ជាប់គ្នា ឆ្លាក់ជារូបបាន គឺឆ្លងកាត់ដំណាក់កាលជាច្រើន។
មុនគេត្រូវលាងសម្អាត ផ្សារភ្ជាប់គ្នា កាច់ ឆ្លាក់តាមបែបសិល្បៈចម្លាក់ ហើយការងារទាំងអស់នោះ លោកវណ្ណឌីថា អាចប្រឈមការប៉ះពាល់សុខភាពដោយសារសំណល់ប្រេងម៉ាស៊ី និងមុតដៃ ជើង ទៀតផង ។ ទោះយ៉ាងណាអតីតនិស្សិតចម្លាក់សហសម័យ ពីសាលាភូមិន្ទវិចិត្រសិល្បៈ លោកអ៊ូ វណ្ណឌី ថា មិនរុញរាល់នៅក្នុងកិច្ចការរបស់ខ្លួននេះទេ ។ ដើម្បីចូលរួមចំណែកបរិស្ថាន លើកកម្ពស់តម្លៃសិល្បៈ និងសេដ្ឋកិច្ចគ្រួសារ លោកធ្វើការងារនេះ រហូតបើមានការគាំទ្រពីពលរដ្ឋនោះ ៕
ចែករំលែកព័តមាននេះ