រាជធានីភ្នំពេញ ៖ រថយន្តដឹកដីមួយគ្រឿង ដែលម្ចាស់អះអាងថា ហ្វ្រាំងមិនស៊ី ក៍បានជ្រុលទៅបុករថយន្តម៉ាកគាមួយគ្រឿងពីក្រោយ រងការខូចខាតខ្ទេចគូថខាងក្រោយ ហើយរថយន្តនោះក៍បានជ្រុលចង្កូតទៅបុកចំក្បាលរថយន្តស៊ីទែនដឹកប្រេងមួយគ្រឿងទៀត ដែលកំពុងឈប់ ហើយក៍ជ្រុលឡើងចិញ្ចើមផ្លូវ បុករ៉ឺម៉កលក់ទាអាំង បណ្តាលអោយក្រឡាប់រងការខូចខាត។ ទោះបីជាយ៉ាងណា គ្រោះថ្នាក់ខាងលើនេះ ពុំបណ្តាលអោយមនុស្សណាម្នាក់រងរបួសឡើយ។
គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោងប្រមាណ២រសៀលថ្ងៃទី២៦ ខែសីហា ឆ្នាំ២០២០ នៅចំណុចមហាវិថីឈ្នះ ឈ្នះ កែងផ្លូវឡុង ឈិន ស្ថិតក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។
រថយន្តដឹកដីដែលបង្កគ្រោះថ្នាក់ខាងលើម៉ាកហ៊ីយ៉ាន់ដាយ ពណ៌ស ពាក់ស្លាកលេខ សៀមរាប ៣A-២០៣៧ បើកបរ ដោយឈ្មោះ សាំង ជឿន ភេទប្រុសអាយុ ៣៤ឆ្នាំ មានលំនៅភូមិ ព្រៃវែង ឃុំទ្រៀល ស្រុកបារាយណ៍ ខេត្តកំពង់ធំ ។
តាមសាក្សីបានអោយដឹងថា នៅមុនពេលកើតហេតុ គេឃើញរថយន្តបង្កខាងលើ បានធ្វើដំណើរតាមមហាវិថីឈ្នះឈ្នះ ក្នុងទិសដៅពីកើតទៅលិច ក្នុងល្បឿនលឿន ។ លុះនៅពេលធ្វើដំណើរមកដល់ចំណុចស្តុបដែលជាកន្លែងកើតហេតុខាងលើ ក៍បានជ្រុលទៅបុក រថយន្តម៉ាក KAI ពណ៌ខ្លាញ់ក្តាម មួយគ្រឿង ពីក្រោយពេញទំហឹង បណ្តាលអោយរងការខូចខាតខ្ទេចគូថខាងក្រោយ។
តាមសាក្សីបានអោយដឹងទៀតថា បន្ទាប់មក រថយន្តបង្កក៍បានជ្រុលទៅខាងស្តាំដៃបុក ចំក្បាលរថយន្តស៊ីទែនដឹកប្រេង ពាក់ស្លាកលេខ ភ្នំពេញ ៣A-៦៣៣៤ ដែលកំពុងឈប់ស្តុប នៅកែងផ្លូវឡុងឈិន បណ្តាលអោយខ្ទេចមុខ ហើយរថយន្តដឹកដីក៍បានជ្រុលឡើងចិញ្ចើម ផ្លូវទៅបុករ៉ឺម៉កលក់ទាអាំង បណ្តាលអោយក្រឡាប់ រងការខូចខាត ប៉ុន្តែសំណាងល្អពុំបណ្តាលអោយមនុស្សរងរបួសនោះទេ ដោយសារ២នាក់ប្តីប្រពន្ធបានរត់គេចខ្លួនទាន់។
តាមប្រភពពីអ្នកបើកបររថយន្តបង្ក បានអោយដឹងថា មុនពេលកើតមានគ្រោះថ្នាក់ខាងលើ គាត់បានដឹកដីទន្លេមកពីស្រុកខ្សាច់កណ្តាល យកទៅដាក់នៅខណ្ឌសែនសុខ លុះពេលមកដល់កន្លែងកើតហេតុ ដោយសារតែហ្វ្រាំងមិនស៊ីក៍បានជួបគ្រោះថ្នាក់បែបនេះតែម្តង។
ស្របពេលគ្នានោះដែរ រថយន្តក្រឡុកស៊ីម៉ង់ត៍មួយគ្រឿងក៍បានបើកសរសៀៗក្បែររថយន្តស៊ីទែនប្រេងក៍បានផុងដីជាប់ផងដែរ ។ បន្ទាប់ពីកើតមានគ្រោះថ្នាក់ខាងលើ នគរបាលមូលដ្ឋាន ក៍បានចុះទៅសម្រួលចរាចរណ៍ និងបានសម្របសម្រួល ដោយម្ចាស់រថយន្តដឹកដីព្រមចេញថ្ងៃជួសជុល ៕ (កែសម្រួលដោយ ៖ ធីតា)
ចែករំលែកព័តមាននេះ