រាជធានីភ្នំពេញ ៖ នៅរសៀលថ្ងៃទី១២ ខែសីហា ឆ្នាំ២០២០នេះ នាយកដ្ឋានគ្រប់គ្រងសន្ដិសុខឯកជន នៃអគ្គស្នងការដ្ឋាននគរបាលជាតិ បានបំភ្លឺ ករណីមានជម្លោះក្នុងហាងផឹកស៊ី យីហោ…
រាជធានីភ្នំពេញ ៖ នៅរសៀលថ្ងៃទី១២ ខែសីហា ឆ្នាំ២០២០នេះ នាយកដ្ឋានគ្រប់គ្រងសន្ដិសុខឯកជន នៃអគ្គស្នងការដ្ឋាននគរបាលជាតិ បានបំភ្លឺ ករណីមានជម្លោះក្នុងហាងផឹកស៊ី យីហោ «វិមានព្រិល» ក្នុងខណ្ឌចំការមន រាជធានីភ្នំពេញ ដែលបង្កដោយលោកផ្កាយ១ ជិន សាមីឌី អនុប្រធាននាយកដ្ឋានគ្រប់គ្រងសន្ដិសុខឯកជន កាលពីយប់ថ្ងៃទី១១ សីហា ២០២០ ។
បើតាមសេចក្ដីបំភ្លឺនេះ លោកឧត្តមសេនីយ៍ត្រី ជិន សាមីឌី បានសារភាពទទួលស្គាល់កំហុស ពិតជាបានឈ្លោះប្រកែកគ្នា ដោយពាក្យសម្ដីជាមួយមិត្តភក្តិ អំឡុងពេលហូបចុកនោះពិតប្រាកដមែន ប៉ុន្ដែពុំបានប្រើអាវុធបាញ់គំរាម ឬបង្ករបួសស្នាមដល់ម្ចាស់ហាង វិមានព្រិល នោះទេ រីឯរឿងហេតុនេះ ភាគីពាក់ព័ន្ធបានព្រមព្រៀងគ្នាដោយជម្រើសផ្សះផ្សាបញ្ចប់រឿង នៅអធិការដ្ឋាននគរបាលខណ្ឌចំការមន រួចរាល់ផងដែរ ។
ដោយឡែក នាយកដ្ឋានគ្រប់គ្រងសន្ដិសុខឯកជន បានធ្វើការអប់រំ ណែនាំ លោកឧត្តមសេនីយ៍ត្រី ជិន សាមីឌី ដោយធ្វើកិច្ចសន្យាបញ្ឈប់សកម្មភាពឆ្គាំឆ្គងបែបនេះ នៅទីសាធារណៈបន្ដទៀត និងក៏បានធ្វើកំណត់ហេតុដកហូតអាវុធ ព្រមទាំងអនុវត្តវិន័យរបស់កងកម្លាំងនគរបាលជាតិ ។
គួររម្លឹកឡើងវិញដែរថា លោកផ្កាយ១ម្នាក់ ដែលគេស្គាល់ថា ជាអនុប្រធាននាយកដ្ឋាន មានជម្លោះក្នុងហាងផឹកស៊ី ស្រាប់តែដកកាំភ្លើងគំរាមគូជម្លោះ ហើយព្យាយាមរត់គេចផ្អើលសមត្ថកិច្ចដេញតាមឆ្លងខណ្ឌធ្វើការឃាត់ខ្លួនបានមកវិញ នៅវេលាម៉ោង១និង១០នាទីរំលងអធ្រាត្រ ឈានចូលថ្ងៃ ទី១២ សីហា ឆ្នាំ២០២០ នៅចំណុចហាងផឹកស៊ីយីហោ «វិមានព្រិល» ស្ថិតតាមបណ្ដោយផ្លូវ១៦៣ សង្កាត់ទួលទំពូង១ ខណ្ឌចំការមន ដែលម្ចាស់ហាងត្រូវបានស្គាល់ មានឈ្មោះ លីលី ស្នាក់នៅផ្ទះ១៣៦ ក្នុងហាង «វិមាន កែវព្រិល»តែម្តង ។
ប្រភពបន្តថា បុរសដែលដកកាំភ្លើងខ្លីគំរាម ត្រូវបានឱ្យដឹងមានឈ្មោះ ជិន សាមីឌី ភេទប្រុស អាយុ៣២ឆ្នាំ ជាអនុប្រធាននាយកដ្ឋានគ្រប់គ្រង់សន្តិសុខឯកជន មានឋានន្តរស័ក្ដិជាឧត្ដមសេនីយ៍ត្រីពាក់ផ្កាយ១ សមត្ថកិច្ចបានដកហូតកាំភ្លើងម៉ាកCF 98 មួយដើម និងរថយន្តឡិចស៊ីស RX400h ពណ៌ទឹកប្រាក់ ពាក់ស្លាកលេខ នគរបាល 2-7119 មួយគ្រឿងផងដែរ។
តាមប្រភពព័ត៌មានឱ្យដឹងថា មុនពេលកើតហេតុ គឺបុរសខាងលើបានចូលទៅផឹកស៊ីនៅភោជនីយដ្ឋាន «វិមានព្រិល» ដែលជាភោជនីយដ្ឋានទើបនឹងបើកសម្ភោធនៅយប់នេះ (ថ្ងៃកើតហេតុ) ខណៈពេលអង្គុយផឹកស៊ីបានបន្តិច ស្រាប់តែឌឺដងដាក់គ្នាជាមួយនឹងមិត្តស្រី(អតីតសង្សារចាស់ ដែលមកជាមនុស្សប្រុសថ្មី) ដែលអង្គុយផឹកស៊ីនៅតុក្បែរនោះ ដែលគេដឹងថា ជាសមត្ថកិច្ចដូចគ្នាដែរភ្លាមៗនោះ ត្រូវបានស្ត្រីម្ចាស់ហាងឈ្មោះលីលី នាំគ្នាឃាត់ ទើបបុរសផ្កាយ១ បានបើករថយន្តចេញទៅក្រៅបាត់ ។ (នារីជាអតីតសង្សារចាស់របស់លោកផ្កាយ១ ត្រូវជាមិត្តភក្តិរបស់ស្ត្រីម្ចាស់ហាង វិមានព្រិល)
ប្រភពបន្តទៀតថា លុះមួយសន្ទុះក្រោយមក បុរសផ្កាយ១បានបើករថយន្តឡិចស៊ីស របស់ខ្លួនត្រលប់មកវិញ បានមកឈប់នៅខាងមុខហាង រួចហើយក៏បានដកកាំភ្លើងខ្លី អាមេគំរាម អ្នកនៅក្នុងហាងផឹកស៊ី គាប់ជួនពេលនោះដែរ មានកម្លាំងសមត្ថកិច្ចមូលដ្ឋានល្បាតនៅទីនោះឃើញ ស្រាប់តែបុរសខាងលើបានព្យាយាមបើករថយន្តដើម្បីរត់គេច តែពេលនោះដែរ ។
កម្លាំងសមត្ថកិច្ចបានបោះដៃតាមវិទ្យុទាក់ទង អោយគ្រប់បណ្ដាខណ្ឌជួយឃាត់តាមភិនភាគរថយន្តរហូតដល់ចំនុចផ្លូវជាតិលេខ១ ជិតសាលាអន្តរជាតិប៊ែលធី សង្កាត់ច្បារអំពៅ១ ខណ្ឌច្បារអំពៅ ទើបឃាត់រថយន្ដ និងអ្នកបើកបរ ព្រមទាំងដកហូត អាវុធខ្លី ម៉ាក CF98 ពណ៌ខ្មៅ មួយដើម ទើបកម្លាំងសមត្ថកិច្ច នាំខ្លួនបុរសខាងលើ ទៅធ្វើការសាកសួរនៅ អធិការនគរបាលខណ្ឌចំការមនតែម្ដងទៅ ៕
ចែករំលែកព័តមាននេះ