ខេត្តឧត្តរមានជ័យ ៖ បើតាមសេចក្តីរាយការណ៍បានឱ្យដឹងថា ស្ពានអូរជីក នៅចំណុចបឹងតាម៉ុក ទឹកជំនន់បានហក់ឡើងខ្លាំង ដោយមានកម្ពស់ប្រមាណ៣.៨៣សង់ទីម៉ែត្រ ស្ទើរតែជន់លិចស្ពានឈានចូលដល់ការប្រកាសអាសន្ន ខណៈពេលមានទឹកភ្លៀងធ្លាក់ជាបន្តបន្ទាប់ជាប់គ្នា ចាប់ពីថ្ងៃទី៣ រហូតមកដល់ថ្ងៃទី៩ ខែសីហា ឆ្នាំ២០២០នេះ ស្ថិតនៅក្នុងភូមិអូរជញ្ជៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ។
បើតាមប្រជាពលរដ្ឋអ្នកភូមិបានរៀបរាប់ថា ស្ពានអូរជី កកន្លងមក ជារៀងរាល់ឆ្នាំតែងតែកើតមានទឹកជំនន់ហូរចេញពីបឹងតាម៉ុក ជន់លិចស្ពាន រួមទាំងទីលំនៅឋានរបស់ប្រជាពលរដ្ឋ និងបង្កឱ្យស្ទះចរាចរណ៍ក្នុងការធ្វើដំណើរឆ្លងកាត់ផងដែរ។ ខណៈនេះក្នុងរយៈពេល៤ទៅ៥ថ្ងៃ ត្រូវបានទឹកភ្លៀងធ្លាក់ជាប់ៗគ្នាធ្វើឱ្យទឹកបឹងតាម៉ុក ហក់ឡើងខ្លាំងហូរកាត់ស្ពានអូរជីក ស្ទើរតែជន់លិចទៅហើយ បើទឹកភ្លៀងនៅតែធ្លាក់ទៀតនោះ វាអាចនឹងជន់លិចពុំខាន ខណៈនេះពលរដ្ឋមានការព្រួយបារម្ភយ៉ាងខ្លាំង។
ចំណែកលោក ញើន កួន ប្រធានមន្ទីរធនធានទឹកខេត្ត បានឱ្យដឹងកាលពីព្រឹកថ្ងៃទី៩ ខែសីហានេះថា ទឹកបឹងតាម៉ុក បានហក់ឡើងកម្ពស់៣.៨៣សង់ទីម៉ែត្រ និងជិតឈានចូលដល់ការប្រកាសអាសន្ន ខណៈនេះបើទឹកភ្លៀងនៅតែធ្លាក់បន្តទៀតនោះ ទឹកជំនន់អាចឡើងកម្ពស់៤.២០សង់ទីម៉ែត្រ នោះនឹងឈានចូលដល់ការប្រកាសអាសន្នហើយ ហើយក៏ត្រូវជម្លៀសប្រជាពលរដ្ឋទៅរកទីទួលសុវត្ថិភាពផងដែរ ប៉ុន្តែពេលនេះទីតាំងបឹងតាម៉ុក យើងមានទ្វារទឹកមួយកន្លែងសម្រាប់រំដោះទឹកផងដែរ៕
ចែករំលែកព័តមាននេះ