អា​ម៉ូ​ញ៉ូ​ម​នីត្រាត ជិត​៣​ពាន់​តោន ផ្ទុះ​បំផ្លាញ​កំពង់​ផែ​បេ​រូត ចម្ងាយ ៩​គីឡូម៉ែត្រជុំវិញ(វីដេអូ) – Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

អា​ម៉ូ​ញ៉ូ​ម​នីត្រាត ជិត​៣​ពាន់​តោន ផ្ទុះ​បំផ្លាញ​កំពង់​ផែ​បេ​រូត ចម្ងាយ ៩​គីឡូម៉ែត្រជុំវិញ(វីដេអូ)

8 ខែ មុន

ទីក្រុង​បេ​រូត ៖ មន្ត្រី​និយាយ​ថា ការ​ផ្ទុះ​ដ៏​ខ្លាំង​មួយ រញ្ជួយ​រដ្ឋធានី​បេ​រូត ប្រទេស​លី​បង់ បាន​សម្លាប់​មនុស្ស​យ៉ាង​ហោច​ណាស់ ១០០​នាក់ និង​រង​របួស​ជាង ៤.០០០​នាក់​ផ្សេង​ទៀត…

ទីក្រុង​បេ​រូត ៖ មន្ត្រី​និយាយ​ថា ការ​ផ្ទុះ​ដ៏​ខ្លាំង​មួយ រញ្ជួយ​រដ្ឋធានី​បេ​រូត ប្រទេស​លី​បង់ បាន​សម្លាប់​មនុស្ស​យ៉ាង​ហោច​ណាស់ ១០០​នាក់ និង​រង​របួស​ជាង ៤.០០០​នាក់​ផ្សេង​ទៀត បណ្តាល​មក​ពី​ការ​ឆាបឆេះ​ឃ្លាំង​ផ្ទុក​សារធាតុ​គិ​មី​អា​ម៉ូ​ញ៉ូ​ម​នីត្រាត ដ៏​ធំ​នៅ​កំពង់​ផែ​បេ​រូត ។

ការ​ផ្ទុះ​ដ៏​ខ្លាំងក្លា​នេះ បាន​កើតឡើង​ប្រហែល​ម៉ោង ៦​ល្ងាច (​ម៉ោង​ក្នុង​ប្រទេស​លី​បង់​) ថ្ងៃ​អង្គារ ទី​៤ សីហា ២០២០ នៅ​តំបន់​កំពង់​ផែ​បេ​រូត ។ ដំបូង​ឡើយ គេ​ឃើញ​មាន​អគ្គិភ័យ​ឆេះ និង​ការ​ផ្ទុះ​តូច​ៗ​ជា​ច្រើន ហើយ​បន្ទាប់​មក ការ​ផ្ទុះ​ដ៏​ធំ​មួយ​លាន់ឮ​ឡើង ធ្វើ​ឲ្យ​បំផ្លាញ​អគារ និង​ផ្ទះ​នៅ​ជុំវិញ​កំពង់​ផែ រាប​ដល់​ដី ។

ក្រុម​អ្នកជំនាញ​រញ្ជួយ​ដី បាន​វាស់វែង​ពី​កម្លាំង​នៃ​ខ្យល់​របស់​វា បាន​បំផ្លាញ​ទៅ​ដល់​បង្អួច​នៅ​អាកាសយានដ្ឋាន​អន្តរជាតិ​ទីក្រុង​បេ​រូត ដែល​មាន​ចម្ងាយ ៩​គីឡូម៉ែត្រ (​ស្មើនឹង​ទំហំ​រញ្ជួយ ៣.៣ រ៉ិ​ច​ទ័​រ​) ។

ខ្សែ​វី​ដេ​អូ បាន​បង្ហាញ​អោយ​ឃើញ​ពី​ការ​ផ្ទុះ​ក៏​ខ្លាំង​នេះ មាន​អណ្តាតភ្លើង​ឆាបឆេះ​យ៉ាង​សន្ធោសន្ធៅ លាយ​ផ្សែង​ខ្មួលខ្មាញ់ បន្ទាប់​មក​មាន​ពពក​ប៉ោង​ហោះ​ឡើង​ទៅ​លើ​មេឃ ពេល​នោះ​ព្យុះ​ដ៏​ខ្លាំង​មួយ​បាន​ហោះ​កាត់​ទៅ​កម្ទេច​ទីក្រុង​ធំ​បំផុត​របស់​ប្រទេស​លី​បង់ ។

នាយក​រដ្ឋមន្ត្រី​លី​បង់ លោក ហា​សាន់ ឌៀប Hassan Diab បាន​និយាយ​ថា សារធាតុ​អា​ម៉ូ​ញ៉ូ​ម​នីត្រាត ចំនួន ២.៧៥០​តោន ដែល​ជា​ជី​កសិកម្ម ស្តុក​នៅ​ក្នុង​ឃ្លាំង​កំពង់​ផែ បាន​ផ្ទុះ​ឡើង បង្ក​ឱ្យ​មាន​គ្រោះ​មហន្តរាយ បែប​នេះ ។

លោកនាយក​រដ្ឋមន្ត្រី ហា​សាន់ ឌៀប និយាយ​ថា យើង​មិន​អាច​ទទួលយក​បាន​ទេ និង​បាន​ប្តេជ្ញា​ស៊ើបអង្កេត រក​មូលហេតុ​បង្ក​អោយ​មានការ​ផ្ទុះ​នេះ ។

អា​ម៉ូ​ញ៉ូ​ម​នីត្រាត គឺជា​សារធាតុ​គីមី មាន​រាង​ដុំ​ស​ថ្លា គ្មាន​ក្លិន ផ្សំ​ជា​ជី​កសិកម្ម ហើយ​វា​ក៏​ជា​ជា​មូលហេតុ​ធ្វើ​ឲ្យ​មាន​ឧស្សាហកម្ម​ផ្សេង​ៗ បាន​រង​ការ​ផ្ទុះ កើត​ឡើងជា​ច្រើន​ទស​វត្ស​មក​ហើយ ។

គ្រោះថ្នាក់​នោះ​គឺ នៅ​ពេល​អា​ម៉ូ​ញ៉ូ​ម​នីត្រាត ផ្សំ​ជាមួយ​ប្រេងឥន្ធនៈ វា​បង្កើត​ជា​គ្រឿងផ្ទុះ​ដ៏​ខ្លាំងក្លា​មួយ ដែល​ត្រូវ​បាន​គេ​ប្រើ​យ៉ាង​ទូលំទូលាយ នៅ​ក្នុង​ឧស្សាហកម្ម​សំណង់ ប៉ុន្តែ​ក៏​មាន​ក្រុម​បះបោរ ដូច​ជា​ក្រុម​តា​លី​បង់ ប្រើ​វា​សម្រាប់​ជា​គ្រឿង​បំផ្ទុះ​កែ​ច្នៃ ។

ប្រធាន​សន្តិសុខ​របស់​ប្រទេស​លី​បង់ លោក អា​បាស់ អ៊ី​ប្រា​ហ៊ី​ម បាន​និយាយ​ថា សំភារៈ​ទាំងនោះ ត្រូវ​បាន​រឹបអូស​បានជា​ច្រើន​ឆ្នាំ​មក​ហើយ និង​ត្រូវ​យក​មក​រក្សា​ទុក នៅ​ក្នុង​ឃ្លាំង​កំពង់​ផែ ដែល​មា​នទី​តាំងនៅ​ជិត​ផ្សារ​លក់ទំនិញ និង​កន្លែង​កម្សាន្ត​ពេល​យប់​ក្នុង​រដ្ឋធានី​បេ​រូត ។

មិន​ទាន់​មានការ​បញ្ជាក់​ផ្លូវការ​ណាមួយ​ពី​មន្ត្រី​ប្រទេស​លី​បង់​នៅឡើយ ថា​ការ​ផ្ទុះ​នេះ បង្ក​ឡើង​ដោយ​ចេតនា នោះ​ទេ ។

ប្រធានាធិបតី​អា​មេ​រិ​ក​លោក ដូ​ណា​ល់ ត្រាំ បាន​និយាយ​នៅ​ល្ងាច​ថ្ងៃ​អង្គារ​នេះ​ថា ឧត្តមសេនីយ៍​អា​មេ​រិ​ក បាន​ប្រាប់​គាត់​ថា​ការ​ផ្ទុះ​នេះ ហាក់ដូចជា​បណ្តាល​មក​ពី​គ្រាប់បែក​មួយ​ប្រភេទ ។ លោក ត្រាំ បាន​បន្ត​ថា “​វា​មើលទៅ​ដូច​ជា​ការ​វាយប្រហារ​ដ៏​គួរ​ឲ្យ​ភ័យ​ខ្លាច​” ។

ប៉ុន្តែ​នៅ​ពេល​អ្នកកាសែត​សួរ​អំពី​ការ​លើក​ឡើង​របស់​ប្រធានាធិបតី​អា​មេ​រិ​ក ថា​តើ​ពិត​ទេ ? អ្នកនាំពាក្យ​មន្ទីរ​ប៉ង់​តា​ហ្គោ​ន បាន​ឆ្លើយ​ប្រាប់ AFP ថា “​យើង​មិន​មាន​អ្វី​សម្រាប់​បកស្រាយ​ទេ​” ហើយ​ប្រាប់​អ្នកកាសែត ឲ្យ​ទាក់ទង​ទៅ​សេត​វិមាន ដើម្បី​សុំ​ការ​បំភ្លឺ ។

នៅ​ប្រទេស​លី​បង់ មន្ត្រី​កាកបាទក្រហម បាន​និយាយ​នៅ​ថ្ងៃ​ពុធ​នេះ​ថា ចំនួន​មនុស្ស​ស្លាប់​យ៉ាងតិច ១០០​នាក់ និង​រង​របួស​ជាង ៤.០០០​នាក់​ផ្សេង​ទៀត ។

ក្រុម​ស្រាវជ្រាវ និង​ក្រុម​ជួយ​សង្គ្រោះ នៅ​តែ​បន្ត​ធ្វើ នៅ​តំបន់​ជុំវិញ​កំពង់​ផែ ដោយ​មាន​កម្ទេចកម្ទី​បាក់បែក​ពី​អគារ រាយ​ប៉ាយ​ពាសពេញ​តំបន់​នោះ ។

ក្រុមប្រឹក្សាសន្តិសុខ​ជាតិ​របស់​ប្រទេស​លី​បង់ ក៏​បាន​ប្រកាស​គ្រាអាសន្ន ដាក់​បេ​រូត​ជា​តំបន់​គ្រោះ​មហន្តរាយ ។ ហើយ​លោកនាយក​រដ្ឋមន្ត្រី ក៏​បាន​អំពាវនាវ​ដល់​សម្ព័ន្ធមិត្ត​ឲ្យ​ផ្តល់​ជំនួយ​ដល់​ប្រទេស​លី​បង់​ផង​ដែរ ។

លោក​ប្រធានាធិបតី Michel Aoun ប្រកាស​ថា លោក​នឹង​បញ្ចេញ​ថវិកា​បន្ទាន់​ចំនួន ១០០​ពាន់​លាន​លី​រ៉ា (​ស្មើ ៦៦​លាន​ដុល្លារ​អា​មេ​រិ​ក​) ។

យ៉ាងណា ប្រទេស​លី​បង់​កំពុង​ស្ថិត​នៅ​ក្នុង​វិបត្តិ​សេដ្ឋកិច្ច​ដ៏​ធំ​ទៅ​ហើយ នៅ​តាម​មន្ទីរពេទ្យ​ទូ​ទាំង​ប្រទេស គ្របដណ្ដប់​ដោយ​ជំងឺ​រាតត្បាត​គឺ កូ​វី​ដ​-១៩ រួច​ទៅ​ហើយ ។

សហរដ្ឋអាមេរិក បារាំង កា​តា អ៊ី​រ៉​ង់ និង​អ៊ី​ស្រា​អែ​ល ស្ថិត​ក្នុង​ចំណោម​ប្រទេស​សម្ព័ន្ធមិត្ត ដែល​នឹង​ផ្តល់​និង​បញ្ជូន​ជំនួយ​មក​ដល់​ប្រទេស​លី​បង់ ៕

Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture
Picture