រាជធានីភ្នំពេញ ៖ បុរសជាកម្មករសំណង់ម្នាក់ ក្រោយត្រឡប់មកពីធ្វើការងារដល់ផ្ទះជួលវិញបានផឹកស្រា១លីត្រជុំគ្នាជាមួយបងប្អូននិងមិត្តភក្ដិរួមការងាររួច ទើបហូបបាយអស់២ចាន បន្ទាប់មកទើបគាត់ចូលដេកជាមួយប្រពន្ធជាធម្មតា ។ លុះដល់ព្រឹកឡើង ពេលប្រពន្ធដាស់ឲ្យក្រោកទៅធ្វើការ ស្រាប់តែប្រទះឃើញបុរសរងគ្រោះបាត់បង់ជីវិតទៅហើយ ដោយពុំដឹងថា ជនរងគ្រោះបាត់បង់ជីវិតតាំងពីពេលណានោះទេ ។ ម្យ៉ាងទៀតក៏អត់បានដឹងថា ជនរងគ្រោះបាត់បង់ជីវិតដោយសារមូលហេតុអ្វីឱ្យពិតប្រាកដនោះដែរ ប៉ុន្តែត្រូវបាននគរបាលសង្ស័យថា បណ្ដាលមកពីខ្យល់គ ចំណែកនគរបាលប៉ុស្តិ៍ស្នោរ បានចុះទៅកាន់ទីនោះដើម្បីត្រួតពិនិត្យជាក់ស្ដែងភ្លាមៗផងដែរ។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោង៥និង៣០នាទីព្រឹកថ្ងៃទី៣១ ខែកក្កដា ឆ្នាំ២០២០ នៅចំណុចផ្ទះជួល ស្ថិតនៅក្នុងភូមិស្រែអំពិល សង្កាត់ស្នោរ ខណ្ឌកំបូល រាជធានីភ្នំពេញ។
បុរសរងគ្រោះឈ្មោះអ៊ាន ភាក់ អាយុ៣៩ឆ្នាំ មុខរបរកម្មករសំណង់ មានប្រពន្ធឈ្មោះយាន ឃន់ អាយុ៣៦ឆ្នាំ មុខរបរកម្មករសំណង់ និងមានកូនប្រុសម្នាក់និងស្រីម្នាក់នៅក្នុងបន្ទុកគ្រួសារ។ គ្រួសារនេះស្នាក់នៅផ្ទះជួលក្នុងភូមិកើតហេតុខាងលើ និងមានទីលំនៅអចិន្ត្រៃយ៍ផ្ទះលេខ៣ ក្រុម១ ភូមិត្រពាំងវែង ឃុំគោកធ្លកលើ ស្រុកជីក្រែង ខេត្តសៀមរាប ។
ស្ត្រីជាប្រពន្ធបាននិយាយថា ជារៀងរាល់ថ្ងៃ គាត់តែងតែក្រោកពីដំណេកមុនប្ដី ហើយរៀបចំដាំបាយដាំទឹកដើម្បីហូបមុននឹងចេញទៅធ្វើការ ដែលនេះគឺជាទម្លាប់ទៅហើយ មិនតែប៉ុណ្ណោះគាត់បានកំណត់ត្រឹមវេលាម៉ោង៥និង៥០នាទីព្រឹក ក្រោយពីរៀបចំរួចរាល់ ទើបគាត់ដាស់ប្ដីឲ្យក្រោកដើម្បីរៀបចំខ្លួនចេញទៅធ្វើការ។ ដោយឡែកនៅវេលាព្រឹកថ្ងៃកើតហេតុក៏ដូចច្នេះដែរ ក្រោយពីរៀបចំដាំបាយទឹករួច គាត់បានដាស់ប្ដីតាមទម្លាប់រាល់ថ្ងៃគាត់តែងស្រែកហៅផងនិងយកដៃទះគូទប្ដីផង ហើយរាល់ថ្ងៃទះតែបន្តិចគឺប្ដីភ្ញាក់ហើយ ប៉ុន្តែថ្ងៃនេះអត់កំរើកសោះ។
តាមប្រភពដដែលបានបន្តថា ខណៈនោះគាត់បានចាប់អង្រួនប្តី ស្រាប់តែសភាពរាងកាយរបស់ប្តីរឹងអស់ទៅហើយ ដោយអត់ដឹងថាបាត់បង់ជីវិតតាំងពីពេលណានោះទេ ទើបគាត់ស្រែកឆោរឡោបង្កឲ្យមានការភ្ញាក់ផ្អើលដល់សាច់ញាតិនិងអ្នកជិតខាងនាំគ្នាទៅជួយមើល ដោយមិនដឹថាប្ដីបាត់បង់ជីវិតដោយសារមូលហេតុអ្វីនោះឡើយ។
តាមប្រភពដដែលបានបន្តទៀតថា បន្ទាប់មកបានរាយការណ៍ជូននគរបាលប៉ុស្តិ៍ស្នោរឲ្យចុះទៅពិនិត្យមើល ហើយនគរបាលសង្ស័យថា ប្ដីគាត់បាត់បង់ជីវិតដោយខ្យល់គ។ ម្យ៉ាងទៀត កាលពីវេលាល្ងាចថ្ងៃទី៣០ ខែកក្កដា ក្រោយពីត្រឡប់មកពីធ្វើការងារវិញ ប្ដីគាត់បានផឹកស្រា១លីត្រជុំគ្នាជាមួយបងប្អូននិងមិត្តភក្ដិរួមការងារហើយហូបបាយអស់២ចាន បន្ទាប់មកទើបប្តីចូលដេកជាមួយគាត់ធម្មតា លុះព្រឹកឡើងស្រាប់តែបាត់បង់ជីវិតបែបនេះ ហើយមិនដឹងថាបាត់បង់ជីវិតតាំងពីពេលណានោះឡើយ៕ (កែសម្រួលដោយ ៖ ធីតា)
ចែករំលែកព័តមាននេះ