រាជធានីភ្នំពេញ ៖ នារីម្នាក់ត្រូវបានម្ចាស់ផ្ទះប្រទះឃើញបាត់បង់ជីវិតក្នុងសភាពហើមស្អុយរលួយ ក្នុងបន្ទប់ផ្ទះជួល ស្ថិតតាមបណ្តោយផ្លូវវេងស្រេង ក្នុងសង្កាត់ស្ទឹងមានជ័យទី៣ ខណ្ឌមានជ័យ បង្កការភ្ញាក់ផ្អើលកាលពីវេលាម៉ោង១២និង៣០នាទីថ្ងៃត្រង់ថ្ងៃទី២២ ខែកក្កដា ឆ្នាំ២០២០ ។
នារីរងគ្រោះពុំត្រូវបានស្គាល់អត្តសញ្ញាណនោះទេ មានវ័យជាង២០ឆ្នាំ និងមានមុខរបរជាកម្មការនីរោងចក្រ ស្នាក់នៅបន្ទប់ជួលក្នុងភូមិឃុំកើតហេតុខាងលើ ។ កន្លងមក នារីរងគ្រោះមានទំនាក់ទំនងស្នេហាជាមួយបុរសម្នាក់ និងឧស្សាហ៍ចេញចូលទៅមកបន្ទប់ជួលជាមួយគ្នាផងដែរ ប៉ុន្តែអ្នកទាំង២មិនបានរស់នៅជាអចិន្ត្រៃយ៍គ្នាមួយគ្នាឡើយ ។
តាមប្រភពព័ត៌មានពីបុរសជាម្ចាស់ផ្ទះជួលបានអោយដឹងថា ជាច្រើនថ្ងៃមកហើយ គាត់បានឃើញបន្ទប់ជួលរបស់នារីរងគ្រោះចាក់សោពីខាងក្រៅ ខណៈដែលគាត់មិនបានឃើញនារីងគ្រោះចេញពីបន្ទប់ទៅធ្វើការដូចសពមួយដងនោះទេ ។ លុះនៅវេលាកើតហេតុខាងលើ បុរសជាម្ចាស់ផ្ទះបានព្យាយាមគោះទ្វារ និងស្រែកហៅនារីរងគ្រោះផងដែរ ប៉ុន្តែមិនលឺសម្លេងឆ្លើយតបវិញសោះ ។ ដោយសារមានការងឿងឆ្ងល់ពេក គាត់ក៏បានហៅបងប្អូនអោយជួយគាស់បន្ទប់ លុះគាស់បានបន្តិច ទ្វារក៏រប៉ើកបានពាក់កណ្តាល ពេលនោះគាត់សម្លឹងមើលតាមប្រឡោះទ្វារ ស្រាប់តែប្រទះឃើញនារីរងគ្រោះដេកស្តូកស្តឹងនៅខាងក្នុង ។ ភ្លាមៗនោះ គាត់ និងបងប្អូន មិនបាននៅបន្តគាស់ទ្វារទៀតឡើយ គឺបានរាយការណ៍ទៅកាន់សមត្ថកិច្ចមូលដ្ឋានអោយចុះអន្តរាគមន៍ពិនិត្យនៅកន្លែងកើតហេតុ ។
ក្រោយទទួលបានព័ត៌មានខាងលើនោះភ្លាម កម្លាំងនគរបាល រួមទាំងកម្លាំងកងរាជអាវុធហត្ថ និងនគរបាលជំនាញកោសល្យវិច្ច័យ បានចុះទៅពិនិត្យជាក់ស្តែង ដើម្បីស្វែងរកមូលហេតុ និងការពិតនៃការបាត់បង់ជីវិតរបស់នារីរងគ្រោះ ។
យ៉ាងណាមិញ គិតត្រឹមវេលាម៉ោង៤រសៀលថ្ងៃដដែលនេះដែរ នគរបាលជំនាញ ពុំទាន់ធ្វើការពិនិត្យលើសពនារីរងគ្រោះនៅឡើយនោះទេ ប៉ុន្តែតាមសមត្ថកិច្ចបញ្ជាក់ជាជំហានដំបូង គឺអាចជាករណី «ឃាតកម្ម» ព្រោះករណីនេះ ជនរងគ្រោះបានបាត់បង់ជីវិតនៅខាងក្នុងបន្ទប់ ទាំងត្រូវគេចាក់សោរពីក្រៅ ម្យ៉ាងវិញទៀតសពនារីរងគ្រោះក៏មានស្នាមខ្សែភ្លើងរឹតដៃផងដែរ ។
អ្វីជាការកត់សម្គាល់ជុំវិញករណីខាងលើនេះ បើតាមប្រភពពីមន្ត្រីសមត្ថកិច្ចបានអោយដឹងថា នារីរងគ្រោះខាងលើត្រូវជាមិត្តស្រីរបស់សពបុរសម្នាក់ដែលទើបនឹងប្រទះឃើញបាត់បង់ជីវិតកាលពីព្រឹកមិញ ដោយសារខ្យល់.គ នៅឯសង្កាត់ស្ទឹងមានជ័យទី៣ដូចគ្នា ស្ថិតក្នុងខណ្ឌមានជ័យ ។ បុរសរងគ្រោះមានឈ្មោះ ពៅ ពុត ភេទប្រុស អាយុ៣១ឆ្នាំ មុខរបរកម្មកររោងចក្រ ស្នាក់នៅកន្លែងកើតហេតុ មានស្រុកកំណើតនៅភូមិរោងដំរី ឃុំស្វាយចេក ស្រុករំដួល ខេត្តស្វាយរៀង ។
យ៉ាងណាមិញ គេនៅពុំទាន់ដឹងថា ករណីទាំង២នេះអាចមានជាប់ពាក់ព័ន្ធគ្នា ឬយ៉ាងណឡើយ ខណៈនារីរងគ្រោះត្រូវបានសមត្ថកិច្ចបញ្ជាក់ថា បាត់បង់ជីវិតមុនបុរសជាគូរស្នេហ៍ ចន្លោះពី៣ទៅ៤ថ្ងៃ ។
ទោះជាយ៉ាងណាមិញ លទ្ធផលពិតនៃករណីខាងលើនេះ ពុំទាន់ត្រូវបានលាតត្រដាងអោយដឹងពីដំណើររឿងហេតុឡើយ រង់ចាំនគរបាលជំនាញធ្វើការសាកសួរនាំព័ត៌មានបន្ថែម និងពិនិត្យវិច្ច័យលើសពអោយបានច្បាស់ល្អិតល្អន់ផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ