រាជធានីភ្នំពេញ ៖ តារាចម្រៀងជើងចាស់នៅតែទទួលការគាំទ្រមិនចេះរីកស្ងួតអ្នកស្រី ហ៊ឹម ស៊ីវន រហូតមកទល់ពេលនេះ នៅតែបម្រើអារម្មណ៍ប្រិយមិត្តដូចពីមុនដោយមិនមានចិត្តដកថយ ឬសុំសម្រាកឆ្ងាយពីវិថីសិល្បៈនោះឡើយ។ មុននឹងមានជីវិតភ្លឺចិញ្ចាចនៅលើដងវិថីសិល្បៈអ្នកស្រី ហ៊ឹម ស៊ីវន ក៏ធ្លាប់ជួបនូវជីវិតតស៊ូច្រើនក្នុងក្រុមគ្រួសារ និងនៅលើអាជីពសិល្បៈដ៏មានដំណើរវែងឆ្ងាយនេះដែរ។
ស្នាដៃដែលទទួលបានពីអាជីពសិល្បៈ ៖
អ្នកស្រី ហ៊ឹម ស៊ីវន ទើបតែទទួលបានពានរង្វាន់ «ចម្រៀងប្រជាប្រិយខ្មែរ» នៃកម្មវិធីអាណាចក្រតារាកាលពីអំឡុងឆ្នាំ២០១៣ ដោយក្នុងឆាកជីវិតជាអ្នកចម្រៀងដែលមានឈ្មោះកងរំពង អ្នកស្រីទទួលបានពាននេះមួយប៉ុណ្ណោះ ដោយមិនដែលបានប័ណ្ណកិត្តិយសពីក្រសួង ឬស្ថាប័នណានោះទេ។ ក្រៅពីនេះ អ្នកស្រីទទួលបាននូវមេដាយមុនីសារភ័ណ្ឌថ្នាក់ធិបឌិន ពីសម្តេចកិត្តិព្រឹទ្ធបណ្ឌិតឆ្នាំ២០១២ ដោយសារតែអ្នកស្រីបានចំណាយពេលច្រៀងចម្រៀងផ្សព្វផ្សាយការអភិវឌ្ឍស្រុកទេសផង និងចម្រៀងកាកបាទក្រហមផង ព្រមទាំងមានបទចម្រៀងផ្សព្វផ្សាយស្តីពីកម្មវិធីអេដស៍ជាដើម។ ឆ្នាំ១៩៩២ បានចេញទៅសម្តែងនៅប្រទេសអាមេរិក បន្ទាប់មកមានបារាំង កាណាដា អូស្ត្រាលី ដោយប្រទេសទាំងអស់នោះអ្នកស្រីបានក្តាប់ឱកាសសម្តែងពីរបីលើករួចទៅហើយ ដោយប្រទេសខ្លះអ្នកស្រីទៅច្រៀងផ្សព្វផ្សាយដល់វិស័យព្រះពុទ្ធសាសនាជាដើម ដើម្បីជួយខ្មែរនៅទីនោះរកចំណូលកសាងវត្ត។
ប្រវត្តិនៃដំណើរមកកាន់ជីវិតសិល្បៈ ៖
អ្នកស្រីហ៊ឹម ស៊ីវន ជាអ្នកស្រុកឈើកាច់បាភ្នំនៃខេត្តព្រៃវែង ភូមិគោកសណ្តែក ឃុំរក្សជ័យ អ្នកស្រីមានបងប្អូនបង្កើតចំនួន៥នាក់ ប្រុស១ អ្នកស្រីជាកូនទី១។ កាលពីនៅកុមារភាពអ្នកស្រីធ្លាប់សិក្សានៅសាលាបឋមសិក្សាគោកសណ្តែក។កាលពីជំនាន់ប៉ុល ពត អ្នកស្រីបានបាត់បង់ឪពុកដោយត្រូវរស់នៅជាមួយជីតាមើលថែរក្សាអប់រំ និងឲ្យសិក្សាជំនាញភ្លេងបុរាណ ព្រោះតាំងពីដើមមកចាស់ទុំរបស់អ្នកស្រី ហ៊ឹម ស៊ីវន មានជំនាញខាងភ្លេងពិណពាធ្យ។ ក្នុង១៩៨២ ជីតារបស់អ្នកស្រីបានបញ្ជូនរូបអ្នកស្រីមកសិក្សានៅសាលាវិចិត្រសិល្បៈ ដោយរៀនរយៈពេល៥ឆ្នាំ មុខជំនាញសិក្សាមានដូចជារនាថឯក រួចបន្តសិក្សាខាងជំនាញល្ខោនច្រៀង ដោយចេះចម្រៀងសព្វបែបយ៉ាង។ អ្នកស្រីក៏ចូលមកបម្រើការងារក្នុងក្រុមសិល្បៈក្រសួងមហាផ្ទៃនាឆ្នាំ១៩៨៨ ដោយក្រុមអ័រកេស របស់ក្រសួងមហាផ្ទៃ នេះហើយធ្វើឲ្យមានមហាជនទទួលស្គាល់ច្រើនពីស្នាដៃ។ តារាចម្រៀងមានសំឡេងក្រអួនត្រូវចិត្តមហាជនគ្រប់ស្រទាប់អ្នកស្រី ហ៊ឹម ស៊ីវន បានរៀបរាប់ថា «ជីវិតសិល្បៈមានការតស៊ូច្រើនណាស់ រកចាំភាពកម្សត់ៗមិនឃើញនោះទេ ពេលមកដល់ចំណុចមួយនៃសិល្បៈមានភាពល្អប្រសើរ។ ប៉ុន្តែអ្វីដែលអ្នកស្រីមិនអាចបំភ្លេចបានកាលពីអ្នកស្រីនៅរៀន គឺក្រុមគ្រួសាររបស់អ្នកស្រីខ្វះខាតណាស់ ដោយក្នុងនាមជាកូនច្បងត្រូវចេះគិតគូរជួយអ្នកផ្ទះ គិតដល់ម្តាយ ដែលមើលថែរកូនៗពិតជាលំបាកណាស់។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ