ខេត្តស្វាយរៀង ៖ បុរសជាជាងឈើធ្វើតុទូម្នាក់ត្រូវបានគេប្រទះឃើញបាត់បង់ជីវិតនៅក្នុងបន្ទប់ ដោយសមត្ថកិច្ចដាក់ការសង្ស័យថា ជនរងគ្រោះបាត់បង់ជីវិតដោយសារខ្យល់គរ ។ ហេតុការណ៍ខាងលើនេះបានកើតឡើងកាលពីវេលាម៉ោងប្រមាណជា៤និង២០នាទីព្រឹកទៀបភ្លឺថ្ងៃទី១០ កក្កដា ឆ្នាំ២០២០ នៅភូមិមេភ្លើង…
ខេត្តស្វាយរៀង ៖ បុរសជាជាងឈើធ្វើតុទូម្នាក់ត្រូវបានគេប្រទះឃើញបាត់បង់ជីវិតនៅក្នុងបន្ទប់ ដោយសមត្ថកិច្ចដាក់ការសង្ស័យថា ជនរងគ្រោះបាត់បង់ជីវិតដោយសារខ្យល់គរ ។
ហេតុការណ៍ខាងលើនេះបានកើតឡើងកាលពីវេលាម៉ោងប្រមាណជា៤និង២០នាទីព្រឹកទៀបភ្លឺថ្ងៃទី១០ កក្កដា ឆ្នាំ២០២០ នៅភូមិមេភ្លើង សង្កាត់ស្វាយរៀង ក្រុងស្វាយរៀង ខេត្តស្វាយរៀង ។
ជនរងគ្រោះឈ្មោះកែវ រ៉េ ភេទប្រុស អាយុ៣៤ឆ្នាំ ជាជាងឈើធ្វើតុទូ ស្នាក់នៅភូមិឃុំកើតហេតុខាងលើ និងមានស្រុកកំណើតនៅខេត្តកំពង់ធំ ។
បើតាមស្ត្រីជាម្ចាស់ផ្ទះឈ្មោះអ៊ុក អាយុ៥៧ឆ្នាំ ស្នាក់នៅផ្ទះកើតហេតុខាងលើបានឲ្យសមត្ថកិច្ចដឹងថា មុនពេលកើតហេតុ នៅវេលាម៉ោង៦យប់ថ្ងៃទី៩ កក្កដា ឆ្នាំ២០២ ជនរងគ្រោះបានផឹកស្រា ដោយអត់ហូបបាយនោះទេ គឺផឹកស្រារាល់ល្ងាចមិនដែលហូបបាយទេ ក្រោយពីផឹកស្រាស្រវឹងហើយ ជនរងគ្រោះបានចូលទៅដេកនៅក្នុងបន្ទប់ផ្ទះជាន់ផ្ទាល់ដីតែម្នាក់ឯង។
តាមប្រភពដដែលបានបន្តថា លុះព្រឹកថ្ងៃកើតហេតុ មានស្ត្រីម្នាក់ឈ្មោះឈុនប្រុក អាយុ៤៧ឆ្នាំ ដែលដេកនៅលើផ្ទះនោះដែរ បានចុះពីលើផ្ទះមកក្រោម ក៏ចូលទៅដាស់ជនរងគ្រោះឲ្យក្រោក ស្រាប់តែសភាពរាងកាយរបស់ជនរងគ្រោះរឹងបាត់ទៅហើយ ដោយមិនដឹងថាបាត់បង់ជីវិតតាំងពីពេលណានោះទេ ទើបនាំគ្នាផ្អើលឆោឡោប្តឹងសមត្ថកិច្ចឲ្យមកពិនិត្យតែម្តង។
តាមសមត្ថកិច្ចនគបាលក្រុងស្វាយរៀងបានឲ្យដឹងថា ជនរងគ្រោះជាកូនកំព្រា គ្មានប្រពន្ធកូននោះទេ ។ ដោយជីវភាពក្រីក្រ ទើបជនរងគ្រោះបានមករស់នៅជាមួយម្ចាស់ផ្ទះឈ្មោះអ៊ុក អស់រយៈពេលជាង៦ឆ្នាំមកហើយ ដោយសុំម្ចាស់ផ្ទះធ្វើជាម្តាយធម៌ និងដោយមានជំនាញចេះធ្វើតុ កៅអី ទូ ហើយស្ត្រីម្ចាស់ផ្ទះក៏ទទួលធ្វើជាកូនធម៌ ព្រមទាំងបានបើកសិប្បកម្មធ្វើតុ កៅអី និងទូលក់រហូតមក ដោយមានដាក់កូនជាងបីបួននាក់ធ្វើការជាមួយ។
តាមប្រភពដដែលបានបន្តថា ប៉ុន្មានឆ្នាំចុងក្រោយនេះ ជនរងគ្រោះតែងតែផឹកស្រារាល់ល្ងាច ជួនកាលផឹកទាំងថ្ងៃពេលណាគ្មានការងារធ្វើឬពេលថ្ងៃសម្រាក ហើយពេលផឹកស្រាគឺជនរងគ្រោះមិនដែលឃើញចេះក្លែមឬហូបបាយទេ ផឹកអត់បាយ ទើបបណ្តាលខ្យល់គ បាត់បង់ជីវិតបែបនេះ។
សមត្ថកិ្ចបានបញ្ជាក់ថា តាមការពិនិត្យនិងធ្វើកោសលវិច្ច័យរបស់ក្រុមគ្រូពេទ្យគឺពុំមានឃើញមានស្លាកស្នាមអ្វីគួឲ្យសង្ស័យនោះទេ ដូច្នេះក្រុមគ្រូពេទ្យបច្ចេកទេសបានធ្វើការសន្និដ្ឋានថា ជនរងគ្រោះបាត់បង់ជីវិតដោយសាខ្យល់គ។
ក្រោយពីពិនិត្យរួច សមត្ថកិច្ចបានហៅរថយន្តសាមុយមកដឹកសពយកទៅតម្កល់ធ្វើបុណ្យតាមប្រពៃណី នៅវត្តព្រៃឆ្លាក់ ក្នុងសង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង៕ (កែសម្រួលដោយ ៖ ធីតា)
ចែករំលែកព័តមាននេះ