«របាំ​បើករបង​» ប្រពៃណី​ដ៏​សំខាន់​ក្នុង​ពិធី​មង្គលការ​នៅ​ខេត្តតាកែវ


ខេត្តតាកែវ​៖​របាំ​បើករបង​ដែល​ជា​ប្រពៃណី​ដ៏​សំខាន់​ក្នុង​ពិធី​មង្គលការ នៅ​តែ​មាន​វត្តមាន​នៅ​ឡើយ​​ក្នុង​ខេត្តតាកែវ ព្រោះ​ប្រជាជន​យល់​ថា​ទំនៀមទម្លាប់​នេះ បាន​ជួយ​លើកកម្ពស់​តម្លៃ​ស្ត្រី និង​កូនស្រី ។

លោក​ជេ​ត ពិសុទ្ធ ប្រធាន​មន្ទីរ​វប្បធម៌ និង​វិចិត្រសិល្បៈ​ខេត្ដតាកែវ បានឱ្យ​ដឹង​កាលពី​ពេល ថ្មី​ៗ​កន្លង​មក​ថា កម្មវិធី​បើករបង​នៅ​ក្នុង​ពិធី​មង្គលការ គឺជា​ប្រពៃណី​មួយ​ដែល​មាន​តាំងពី​ដូនតា​យូរ​លង់​ណាស់​មក​ហើយ ដែល​មាន​៣​របង គឺ​របង​រមាស របង​ដំរី និង​របង​លោក​មេបា ក្នុង​ការ​លើកកម្ពស់​តម្លៃ​របស់​កូនស្រី ។ ដោយសារ​តែ​កម្មវិធី​បើករបង​នេះ មាន​អត្ថន័យ​ជ្រាលជ្រៅ​ក្នុង​ការ​លើកកម្ពស់​តម្លៃ​របស់​កូនស្រី ដូច្នេះ​ប្រជាពលរដ្ឋ​នៅ​ក្នុង​ខេត្ត​នេះ​នៅ​តែ​បន្ត​អនុវត្ត​តាម​ព្រៃ​ណី​នេះ រហូត​មក​ដល់​សព្វថ្ងៃ​ក្នុង​ពិធី​មង្គលការ​កូនប្រុស​កូនស្រី​របស់​ខ្លួន ។ នេះ​បើ​តាម​សម្រង់​ការ​ផ្សាយ​ពី​វិទ្យុ​​ជាតិ ។

លោក​ប្រធាន​មន្ទីរ​វប្បធម៌​បាន​ថ្លែង​តាម​ការ​សម្ភាស​ពី​វិទ្យុជាតិ​ថា «​ការ​បន្ត​អនុវត្ត​កម្មវិធី​របាំ​បើក​របង​ក្នុង​កម្មវិធី​អាពាហ៍ពិពាហ៍​នេះ គឺជា​ការ​អភិរក្ស​តម្លៃ​ទំនៀមទម្លាប់​វប្បធម៌​ខ្មែរ ដើម្បី​ទុក​ឱ្យ​កូន​ចៅ​ជំនាន់​ក្រោយ​អនុវត្ដ និង​ប្រតិបត្ដិ​តាម កុំឱ្យ​ទំនៀមទម្លាប់​នេះ​បាត់បង់ ខណៈ​កម្មវិធី​បើករបង​នេះ​ស្ទើរតែ​ពុំ​មាន​លើកយក​មក​អនុវត្ត​នៅ​ក្នុង​ពិធី​មង្គលការ របស់​ប្រជាពលរដ្ឋ​នៅ​តាម​រាជធានី​ខេត្ត​មួយ​ចំនួន​ទៀត ដោយ​យល់​ថា​ខាត​ពេលវេលា និង​ខាតបង់​ប្រាក់​ផង ។

មន្ទីរ​វប្បធម៌​កំពុង​តែ​អភិរក្ស តែ​ត្រូវ​បន្ថយ​បទ​ចម្រៀង​ជា​ច្រើន​ឱ្យមក​នៅ​មួយ​បទ និង​កាត់​បន្ថយ​ពេលវេលា​ដែល​យើង​អភិរក្ស អភិរក្ស​ដែល​ថែ​រក្ស​នូវ​ទម្រង់​ដើម ដែល​ដើម​កំណើត​ចម្រៀង​នៅ​ដដែល អ៊ីចឹង​យើង​មើលទៅ​លើ​ចម្រៀង គឺ​ឃើញ​ការ​អភិរក្ស គឺ​មិន​មាន​កាត់​ចោល​ទេ​»​។

លោក​ប៉ាន់ សិរី​វុ​ឌ្ឍ អាចារ្យ​អាពាហ៍ពិពាហ៍​ខេត្ដតាកែវ មាន​ប្រសាសន៍​ថា «​បច្ចុប្បន្ន​ប្រជាពលរដ្ឋ​ក្នុង​ខេត្ដតាកែវ​នៅ​តែ​គោរព​ប្រតិបត្ដិ​នូវ​ទំនៀមទម្លាប់​ប្រពៃណី​របាំ​បើករបង​ក្នុង​ពេល​រៀបចំ​អាពាហ៍​ពិពាហ៍ ប៉ុន្ដែ​គ្រាន់តែ​កាត់​ឱ្យ​វេលា​ខ្លី​ជាង​មុន​តែ​ប៉ុណ្ណោះ​នោះ​ទេ ដើម្បី​យក​វេលា​ដល់​កូនប្រុស និង​កូនស្រី ។ ការ​បើករបង​បើ​យើង​រៀបរៀង​ឱ្យ​កើត​ថ្មី​មក​វិញ​គឺជា​រឿង​ល្អ​ហើយ ព្រោះ​រឿង​នេះ​មាន​តាំងពី​បុរាណ តែ​វា​គ្រាន់តែ​បាត់​ឯកសារ​ដើម​ទេ ហើយ​អ្វី​ដែល​នៅ​សល់​គឺ​ចម្រៀង អ៊ីចឹង​កន្លែង​ខ្លះ​ក៏​កាត់​ចោល កន្លែង​ខ្លះ​រក្សា​ទុក ប៉ុន្ដែ​វា​សំយោគ​ទៅ​តាម​ពេលវេលា ។ ឥឡូវនេះ​យើង​ការ​តែ​១​យប់​ពីរ​ថ្ងៃ អ្វី​ដែល​សំខាន់​នោះ គឺ​សំពះវេលា ខ្មែរ​អស់​វេលា​នៅ​ថ្ងៃត្រង់ ផុត​ពី​ថ្ងៃត្រង់​ទៅ​គឺ​ចប់​ហើយ ។ បើ​យើង​នៅ​តែ​អូស​បន្លាយ អត់​ទាន់​វេលា ដូច្នេះ​លោក​អាចារ្យ​ចាំបាច់​ណាស់​ដែ​ត្រូវ​ចេះ​កាត់កង ព្រោះ​លោក​អាចារ្យ​ជា​អ្នក​ទទួលខុសត្រូវ​វេលា ព្រោះ​វេលា​ជា​មាស ជា​ប្រាក់»។

លោក​អាចារ្យ​បាន​បញ្ជាក់​ថា របាំ​បើករបង​នេះ គេ​និយម​ប្រារព្ធ​ឡើង​នៅ​ក្នុង​ពិធី​ក្រុង​ពលី ឬ​មុន​ពិធីសូត្រមន្ត​នៃ​ថ្ងៃ​ចូល​រោង​មង្គលការ​។ នៅ​ក្នុង​ពិធី​នេះ​អ្នក​សម្តែង​មាន​គ្នា​ប្រហែល​ជាង​១០​នាក់ គឺ​មាន​អ្នកភ្លេង អ្នក​រាំ និង​អ្នក​ច្រៀង យ៉ាង​ពីរោះ​រណ្តំ ដើម្បី​សុំ​បើករបង​អាច​ចូល​ផ្ទះ​កូនស្រី ។

លោក​ប៉ាន់ សិរី​វុ​ឌ្ឍ បាន​ជំរុញ​ឱ្យ​ប្រជាពលរដ្ឋ​ចូលរួម​ថែរក្សា​វប្បធម៌​ក្នុង​កម្មវិធី​អាពាហ៍ពិពាហ៍​នេះ បន្ទាប់​ពី​មាន​ក្រុម​មួយ​ចំនួន​បាន​ចម្លង​វប្បធម៌​ពី​បរទេស​យក​មក​ប្រព្រឹត្ដ​ខុសឆ្គង ដែល​មិនមែន​ជា​វប្បធម៌​ប្រពៃណី​ខែ្ម​រ ។

លោក​ចាន់ វណ្ណ​រិ​ទ្ធ ជា​យុវជន​មួយ​រូប បាន​សម្ដែង​ការ​គាំទ្រ និង​ចូលរួម​ថែរក្សា អភិរក្ស របាំ​បើករបង ក៏​ដូច​ជា​ទំនៀម​មង្គលការ​ខ្មែរ ដើម្បី​ទុកជា​សម្បត្ដិ​វប្បធម៌​ដ៏​មាន​តម្លៃ​ថ្លៃថ្នូរ និង​បង្ហាញ​ដល់​បណ្ដា​ប្រទេស​មួយ​ចំនួន​កាន់តែ​បាន​ស្គាល់​ច្បាស់​ពី​វប្បធម៌​ខ្មែរ​ដ៏​ផូរផង់ ៕ ប្រភព​វិទ្យុជាតិ ផ្សាយ​បន្ត​ត​ដោយ​មន្ទីរ​វប្បធម៌​ខេត្ត

Facebook Google Twitter Email

Live

Sponsored News

ការស្ទង់មតិគេហទំព័រថ្មី




សូម​អរគុណ