រាជធានីភ្នំពេញ ៖ បុរសម្នាក់បានបាត់បង់ជីវិតភ្លាមៗនៅនឹងកន្លែងកើតហេតុ ចំណែកបុរស២នាក់ផ្សេងទៀតបានរងរបួសធ្ងន់ ក្នុងគ្រោះថ្នាក់ចរាចរណ៍រវាងម៉ូតូ២គ្រឿងបុកគ្នាក្នុងទិសដៅបញ្ច្រាសគ្នា ។
ហេតុការណ៍ខាងលើនេះបានកើតឡើងកាលពីវេលាម៉ោង១១យប់ថ្ងៃទី៤ ខែកក្កដា ឆ្នាំ២០២០ នៅចំណុចមុខបញ្ជាការដ្ឋានកងទ័ពជើងគោក តាមបណ្តោយផ្លូវជាតិលេខ៤ ស្ថិតក្នុងភូមិព្រៃបឹង សង្កាត់កន្ទោក ខណ្ឌកំបូល រាជធានីភ្នំពេញ ។
ជនរងគ្រោះម្នាក់ដែលបាត់បង់ជីវិតខាងលើឈ្មោះ ផា វិបុល ភេទប្រុស អាយុ២៦ឆ្នាំ មុខរបរធ្វើការរោងចក្រ ស្នាក់នៅភូមិសាឡូង សង្កាត់កំបូល ខណ្ឌកំបូល រាជធានីភ្នំពេញ ជាអ្នកបើកបរម៉ូតូមួយគ្រឿងម៉ាកហុងដាអិចអ៊ែរ ពណ៌ក្រហម ពាក់ស្លាកលេខ ភ្នំពេញ 1BR-8628 ។ ចំណែកជនរងគ្រោះទាំង២នាក់ដែលរងរបួសធ្ងន់មិនស្គាល់អត្តសញ្ញាណនោះទេ អ្នកទាំង២ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៣ ពាក់ស្លាកលេខ ត្បូងឃ្មុំ 1A-3062 ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសម្នាក់ជិះម៉ូតូម៉ាកហុងដាអិចអ៊ែរ ពណ៌ក្រហម ទើបចេញពីកម្មពិធីខួបកំណើតមិត្តភក្តិ ដោយបើកបរតាមបណ្តោយផ្លូវជាតិលេខ៤ ក្នុងទិសដៅពីកើតទៅលិច លុះមកដល់ចំណុចកើតហេតុខាងលើ គេឃើញបុរស២នាក់ផ្សេងទៀតជិះមួយគ្រឿងម៉ាកហុងដាឌ្រីម ពណ៌ខ្មៅ ធ្វើដំណើរបញ្ច្រសទិសដៅគ្នាក្នុងល្បឿនលឿនដូចគ្នា បានបុកគ្នាចំពីមុខយ៉ាងពេញទំហឹង បណ្តាលឲ្យអ្នកបើកបរម៉ូតូម៉ាកអិចអ៊ែរបានបាត់បង់ជីវិតភ្លាមៗនៅកន្លែងកើតហេតុចំណែកអ្នកជិះម៉ូតូម៉ាកហុងដាឌ្រីមដែលរងរបួសធ្ងន់ទាំង២នាក់ត្រូវបានរថយន្តសាម៉ុយមកដឹកយកទៅសង្គ្រោះបន្ទាន់នៅឯមន្ទីពេទ្យ ។
ក្រោយពេលកើតហេតុ សមត្ថកិច្ចជំនាញបានចុះមកដល់ទីតាំងកន្លែងកើតហេតុធ្វើការវាស់វែងយកម៉ូតូទាំង២គ្រឿងទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយទៅតាមនីតិវិធី ។ ចំណែកសពជនរងគ្រោះត្រូវបានសមត្ថកិច្ចធ្វើកំណត់ហេតុ និងទាក់ទងទៅកាន់សាច់ញាតិឱ្យមកទទួលយកទៅធ្វើបុណ្យតាមប្រពៃណៃនៅឯស្រុកកំណើត ៕ (កែសម្រួលដោយ ៖ ធីតា)
ចែករំលែកព័តមាននេះ