ខេត្តកណ្តាល ៖ បុរសម្នាក់ជាជាងសិប្បកម្មកែច្នៃគ្រឿងយន្តបានយកម៉ូទ័រមកអារនិងកាត់កែច្នៃគ្រាប់ពុំស្គាល់មួយប្រភេទ បណ្តាលអោយផ្ទុះបាត់បង់ជីវិតយ៉ាងអាណោចអាធ័ម ។
ហេតុការណ៍ខាងលើនេះបានកើតឡើងកាលពីវេលាម៉ោង១២និង៤៥នាទីថ្ងៃត្រង់ថ្ងៃទី២៧ ខែមិថុនា ឆ្នាំ២០២០ នៅចំណុចភូមិត្រពាំងព្រលិត ឃុំជ្រៃលាស់ ស្រុកពញាឮ ខេត្តកណ្តាល។
ជនរងគ្រោះឈ្មោះ អុី សារិន ហៅ ប៉ាត ភេទប្រុស អាយុ៥១ឆ្នាំ មុខរបរជាងសិប្បកម្មកែច្នៃគ្រឿងយន្តកសិកម្ម មានទីលំនៅភូមិត្រពាំងព្រលិត ឃុំជ្រៃលាស់ ស្រុកពញាឮ ខេត្តកណ្តាល។
តាមការបំភ្លឺពីកូនបង្កើតរបស់ជនរងគ្រោះឈ្មោះ យន ថានុង អាយុ២៥ឆ្នាំ បានឱ្យដឹងថា នៅអំឡុងប្រហែលជាង១០ឆ្នាំមុន ឪពុករបស់គាត់បានបង្កើតសិប្បកម្មកែច្នៃគ្រឿងយន្តកសិកម្មជាលក្ខណៈគ្រួសារ លុះនៅវេលាថ្ងៃកើតហេតុខាងលើ ឪពុករបស់គាត់បានយកគ្រាប់មួយប្រភេទពុំស្គាល់នោះទេ បន្ទាប់មកបានយកម៉ូទ័រមកអារ និងកាត់កែច្នៃនៅក្នុងរោងសិប្បកម្ម ខណៈនោះស្រាប់តែផ្ទុះគ្រាប់ បណ្ដាលឲ្យត្រូវជនរងគ្រោះបាត់បង់ជីវិតដោយដាច់សាច់ខ្ទាតជាបំណែកនៅជុំវិញកន្លែងកើតហេតុ ។
ក្រោយពេលកើតហេតុ សពជនរងគ្រោះត្រូវបានប្រគល់ជូនសាច់ញាតិដើម្បីយកទៅធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ